AMÓS 4 - Quichua Imbabura 2016

1Basán llactamanda ali racuyashca huarmi huagracunashna causaj,

Samaria urcumanda huarmicuna, aliguta uyaichi.

Cangunaca, imagutapash na charijcunata quichushpa,

imagupash illajcunata llaquichishpami causanguichi.

Cangunapaj cusacunatapash: “Vinota apamugrichi, ufiangapa” nishpami causanguichi.

2Jucha illaj Mandaj Diosca, cashna nishpami juramenturca:

“Cangunata llaquichina punllacunami chayamujun.

Cangunataca, ganchocunahuan aisashpami apanga.

Cangunapaj miraicunatapash, pijita japina jirrucunahuanmi apanajunga.

3Chai punllapimi cangunaca, pirca utujucunata llujshinguichi.

Mandashpa tiyajuna huasicunamandapash, shitai tucunguichimi” ninmi Mandaj Diosca.

Israelcunaca, llaquichijpipash na manllarishcamanda

4“Bet-el shuti puebloman rishpa juchata rurashpa catigrichilla.

Gilgal shuti pueblopi, causajcunahuan ashtahuan na alicunata ruragrichilla.

Punllandi animalta cushpa huañuchingapa apanguichilla.

Chungamanda shujguta cungapapash, tucui quimsa punllata ringuichilla.

5Levadurahuan rurashca tandata apashpa, ninanda alicachingapa richilla.

Ofrendacunata cunajuchun, tucuicunata mañanguichilla.

Israelcunaca, chashna ruranatami munanguichi” ninmi Mandaj Diosca.

6Mandaj Diosca, cashnatapashmi nin:

“Ñucami, cangunataca tucuicunallata ninan yarjaihuan causachun saquircani.

Cangunapaj llactapica, ima micunallapash na tiyarcachu.

Chashna rurajpipash, cangunaca napacha Ñucapajman tigrarishpami causanguichi” ninmi Mandaj Diosca.

7“Granocunata tandachingapaca, quimsa quilla illajpillatami, tamiataca jarcarcani.

Shuj llactata tamiachishpapash, caishuj llactataca na tamiachircanichu.

Shujcunapica tamiachijujpi, shujcunapica na tamiachijpimi, tucuilla chaquirca.

8Ishcai llactacunamanda cashpapash,

na cashpaca, quimsa llactacunamanda cashpapash,

shuj llactapillami yacutaca ufiangapa shamunajurca.

Shina mañashpa ufiashpapash, yacunayaitaca na yalichircachu.

Shina llaquita apanajushpapash, napacha Ñucapajman tigrarishpami causarca” ninmi Mandaj Diosca.

9“Canguna tarpushca pambacunataca,

rupaihuan, huairahuan, lancha jurucunata cachamushpami tucuchircani.

Cangunapaj huertacunapi,

uva chagracunata, higo yuracunata,

olivo yuracunataca, langosta jurucunami micushpa tucuchirca.

Shina llaquichijpipash, napacha Ñucapajman tigrarishpami causarcanguichi” ninmi Mandaj Diosca.

10“Egipto llactata llaquichishcashnami, cangunataca llaquichisha.

Cangunapaj churicunatapash, jatun macanajuipi huañuchishca cachunmi saquircani.

Cangunapaj caballocunatapash, cangunata fiñajcunami aparca.

Cangunapaj macanajuj runacuna huañushca ninanda ashnayajpimi, maipipash chaitaca ashnachinajurca.

Chashna llaquicunata cachamujpipash, napacha Ñucapajman tigrarimushpami causarcanguichi” ninmi Mandaj Diosca.

11“Jatun Diosca, Sodoma pueblota, Gomorra pueblota llaquichishcashnami, ninanda llaquichircani.

Cangunaca caspita rupachijpi, ninanda rupajujshnami canguichi.

Chashna cashpapash, cangunaca napacha ñucapajman tigrarishpami causanguichi” ninmi Mandaj Diosca.

12“Israel gentecunalla, chaimandami cangunataca chashna llaquichigrini.

Chashna llaquichina cajpimi,

cangunaca Mandaj Dios ñucahuan tuparingapa, alichirishcami shuyana canguichi” ninmi.

13Paica, urcucunatapash, huairatapash churaj Diosmi.

Paillatami, Pai imata yarijushcataca cai pachapi causajcunaman villachun cachamun.

Paillatami, tutatapash punllayachin.

Paica, cai pachapi tiyaj urcucunatami purijun.

Paipaj Shutica, Tucuita Mandaj Taita Diosmi.