DEUTERONOMIO 19 - Quichua Imbabura 2016

Pacajuna pueblocunamandami villajun(Núm. 35:9-28; Jos. 20:1-9)

1Canda Mandaj Taita Dios, canman carasha nishca llactacunapi causajcunata tucuchishpa, canda Mandaj Dios carajpimi, paicuna causashca pueblocunapi, huasicunata japishpa causanguichi.

2Canda Mandaj Taita Dios carashca llactapica, quimsa pueblocunatami shicanyachina canguichi.

3Canda Mandaj Taita Dios canman carashca llactataca, quimsapi chaupishpami, ñangunatapash alichina cangui. Chaicunamanmi huañuchijcunaca pacajungapa ringa.

4Huañuchij runa chaipi pacajushpa causangapaca cashnami canga: Na fiñanajushca cashpata, na yashcapi huañuchishca cashpallami, chaipi pacajushpa causai ushanga.

5Shuj runami, paipaj cumbahuan yamdangapa urcuman ringa. Chaipimi yamdata hachahuan fitijujpi, hacha jirruca caspimanda llujshishpa, paipaj cumbapi chayajpi chai cumbaca huañunga. Shinamandami, chai runaca chai pacajuna puebloman rishpa, chaipi causanga.

6Chai pacajuna pueblocuna yapa carupi cajpica, huañuchishcamanda randi huañuchij runa, catishpa japishpara huañuchinman. Paica napash fiñarishca cashpata, na huañuchina yuyaihuan huañuchishca cashcamandami paica na huañuchi tucuna carca.

7Chaimandami candaca: ‘Quimsa pueblocunata shicanyachingui’ nishpa mandani.

8Canda Mandaj Taita Diosca, cambaj ñaupaj taitacunaman juramentushpa canman carasha nishca tucui llactataca ashtahuanmi mirachinga.

9Chaitaca, tucui cai mandashcacunata, ñuca yachachishcashna cazushpa, pactachishpa causajpimi chashna ruranga. Canda Mandaj Taita Diostaca juyashpa, punllandi paita catishpami causana cangui. Shina cajpimi, pacajuna chai quimsa pueblocunamandaca, ashtahuan quimsata mirachishpa shicanyachina cangui.

10Canda Mandaj Taita Dios canman carashca llactapi, napash huañuchina cajpita huañuchishpa yahuar chai alpapica ama jicharichunmi chashna rurana cangui. Shina rurashpami chai yahuarmandaca na juchachi tucunguichi.

11Ashtahuangarin maijan cashpapash, paipaj cumbata na ricunayachishpa, pacalla chapashpa huañuchishpaca, chai pacajuna pueblocunamanmi pacajungapa calpanga.

12Shina cajpimi paitaca, paipaj pueblopi mandaj ancianocunallata, chai pueblomanda llujchinajuchun cachanga. Shina llujchijpimi, huañuchishcamanda randi huañuchij runaca paitapash huañuchinga.

13Paitaca na llaquijunachu cangui. Shina rurashpami Israelpurapica yangata yahuarta jichajcuna illajpi, tucuipi ali causanguichi.

14Mandaj Taita Dios canman carashca llactapi causajushpaca, cambaj cumbapaj alpa mujundaca na suchuchinachu cangui. Chai mujundaca, ñaupa taitacuna churashpa saquishcami.

Llullashpa villajcunata imata ruranamanda

15Ima na alita, ima juchata rurashcata, shujlla villajpica, shinami canga yashpa, na pitapash llaquichinallachu cangui. Ashtahuangarin ishcai cashpa, quimsa cashpapash villajpillami llaquichina cangui.

16Pita cashpapash, chashnapachami nishpa, llullashpa villangapami shamunga.

17Shina shamujpica, juchachij runatapash, juchachi tucun runatapashmi, Mandaj Diospaj ñaupajpi, sacerdotepajman, juezcunapajman pushana cangui.

18Juezcunaca, ishcanditallata alipacha tapuchishpami, paipaj huauquita yangamanda juchachishcata yachaj chayanga.

19Shina cajpimi, paipaj huauquita imashna llaquichingapa munashcashna, llullaj runataca llaquichinga. Shina rurashpami, cangunapaj chaupimandaca na alita anchuchinguichi.

20Shina rurashcata caishujcuna uyashpa manllarishpami, cangunapurapica chashna na alita rurajcunaca na ashtahuan tiyanga.

21Chashnami chai na alita ruraj runataca na llaquishpa, huañuchijpica, paitapashmi huañuchina, ñavita surcujpica, paitapashmi ñavita surcuna, quiruta llujchijpica, paitapashmi quiruta llujchina, maquita faquijpica, paitapashmi maquita faquina, chaquita faquijpica, paitapashmi chaquita faquina canga.