1Sacerdotecunata mandaj Josuetami ricuchihuarca. Paica, Mandaj Diospaj angelpaj ñaupajpimi shayajurca. Josuepaj ali maqui quimiriapica, Satanasmi paita juchachingapa shayajurca.
2Mandaj Diosca, Satanastaca cashnami nirca: “Satanás, candaca Mandaj Diosllata jarcashpa rimachun. Candaca, Jerusalenda agllaj Mandaj Diosllata jarcashpa rimachun. ¿Nachu caica, rupajuj ninamanda llujchishca yamda caspishna?” nircami.
3Josueca, ninanda mapayashca churajunata churajushcami, angelpaj ñaupajpi shayajurca.
4Chaimandami chai angelca, paipaj ñaupajpi shayanajujcunataca: “Chai ninanda mapayashca churajunata llujchichigrichi” nishpami mandarca. Chai jipami, Josuetaca: “Cambaj juchata anchuchishpami, ninan juyailla churajunata churachini” nirca.
5Chai jipaca: “Mapa illaj mitrata Josuepaj umapi churachigrichi” nishpami mandarca. Shina nijpimi paicunaca, mapa illaj mitrata umapi churachishpa, churajunatapash churachinajurca. Mandaj Diospaj angelca chaita ricushpami shayajurca.
6Chai jipami, Mandaj Diospaj angelca, Josuetaca cashna nirca:
7“Tucuita Mandaj Diosca, cashnami nin:
‘Ñuca yachachishcacunata, mandashcacunata tucuita pactachishpaca,
Ñuca huasipica cambashmi mandangui.
Shinallata, Ñuca huasi patiocunatapashmi ricungui.
Caipi shayanajuj angelcunatashnami candapash churasha.
8Sacerdotecunata mandaj Josué,
cunanga cambash, cambaj ñaupajpi tiyarij cumbacunapash, ali uyaichi.
Cangunaca, ima shamunata ricuchijcunami canguichi.
Mushuj yura viñajujtashnami Ñucapajtalla rurajta apamuni.
9Josuepaj ñaupajpimi shuj rumita churarcani.
Chai shujlla rumipillami, canchis ñavicuna tiyajun.
Ñucami pai imashna cajtaca llagllashpa churasha.
Shinallata cai llactapi causajcunapaj juchatapash, shuj punllapillami anchuchisha.
Tucuita Mandaj Dios Ñucami chashna nini.
10Chai punllapica cangunaca, cangunapaj cumbacunata cayashpami,
cangunapaj uva yura ucucunapi,
higo yura ucucunapi tiyaringuichi’ ninmi Tucuita Mandaj Diosca” nircami.
Who We AreWhat We EelieveWhat We Do
2025 by iamachristian.org,Inc All rights reserved.
