2 PEDRO 1 - Quichua Imbabura 2016

“Alillachu capanguichi” nishcami

1Jesucristopajta ruraj apóstol Simón Pedromi cani. Alitalla ruraj ñucanchi Taita Diosmanda, Quishpichij Jesucristomandami, juyailla crinataca ñucanchishnallata japircanguichi.

2Taita Diostapash, ñucanchi Apunchi Jesustapash aliguta rijsishcamandaca, ninan juyaipash, ali causaigupash, cangunapi ashtahuan mirashca cachunmi munani.

Taita Dios munashcashna causanamanda

3Causaipi tucui ima ali canatapash, llaquishpa causanatapash, ninan ushaita charij Diosmi ñucanchiman caramurca. Chaitaca, ninan ushaita charij, ninanda alicachi tucushca Dios, ñucanchita cayashcamandami yachanchi.

4Paica, ninan ushaita charij cashpami, ninan juyailla caranacunata carashapacha nishca. Cai pachapica, na alita munaicunamandami ima na alicunata ruranapash shamun. Chaicunata saquishpami, Diosman rijchaj canata japigrichun chashna agllarca.

5Shina cashcamandami, caicunataca na cungashpa pactachina canguichi: Canguna crij cashcataca, aliguta causashpami ricuchina canguichi. Aliguta causashpaca, ashtahuan yachajushpami catina canguichi.

6Ali yachajushpaca, na ali munaicunata mishanami canguichi. Na ali munaicunata mishashpaca, na ñapash fiñarishpami causanguichi. Na ñapash fiñarishpaca, Diospajllami causanguichi.

7Diospajlla causashpaca, crijcunapura juyarishpami causanguichi. Chashna causashpaca, ashtahuan juyaihuanmi tucuicuna causanguichi.

8Chashna causana munaicuna cangunapi ashtahuan tiyajpica, na yanga causashpami, ñucanchi Apunchi Jesucristota rijsishcamandaca aligutapacha causanguichi.

9Ashtahuangarin, chashna causana munaita na charishpaca, caruta ricuitaca na ushaj runashnami canga. Paipaj juchacunata anchuchishcatapash cungashpami, ñausashna causanga.

10Juyashca crijcuna, chaimandami cangunaca, Dios cayashpa agllashcata yariajlla causashpa, ashtahuan shinlli tucuna canguichi. Caicunata pactachishpaca, napacha urmashpami causanguichi.

11Shina causanajujpimi, ñucanchita Mandaj, Quishpichij Jesucristoca, causaita causaicaman mandajuj llactaman yaicuchun saquinga. Paica na jarcashpami, cushijuihuan yaicuchun saquinga.

12Chaimandami, na llullashpa villajuj shimita ali yachajushcacuna cajpipash, ali shinlli crijcuna cajpipash, cutin cutin caicunata yarichijunataca na saquisha.

13Causajushpallata cangunata, shinllita tacurishpa yarichijushpaca “alitami rurajuni” yanimi.

14Ñuca ñalla huañunata, ñucanchi Apunchi Jesucristo villajpi yachashpami, caicunataca yarichijuni.

15Ñuca huañushca jipapash, cai villashcataca ama cungashpa yarianajuchunmi, tucui shunguhuan ucha yarichijuni.

Cristopaj ninan ushaita ricushcatami villanajushca

16Ñucanchi Apunchi Jesucristo ninan ushaihuan shamunataca, yanga umachishca parlocunatashnaca na yachachishcachu canchi. Ashtahuangarin, mandana ushaita charijtaca, ñucanchi ñavihuambacha ricushca cashpami yachachircanchi.

17Taita Diosca, Paipaj Churita ninanda alicachishpa, jatunyachishpami: “Caimi, Ñuca juyashca Churigu. Paimandami, ninanda cushijuni” nishpa rimajujmi, punchapamba jahua pachamanda uyarimurca.

18Jahua pachamanda chashna rimamujtaca, Diospajlla urcu jahuapi, Jesushuan pacta cashpami uyarcanchi.

19Profetacuna villashca Shimitapash charinchimi. Chai villashcacunaca, yana tutapi micha punchayachijshna aliguta villajujpimi, punllayajujpi llujshimuj luzeroshna, cangunapaj shunguta punchayachingacaman uyashpa catina canguichi. Chaita rurashpaca aligutami pactachinajunguichi.

20Caitarami pundaca yachana canguichi: Dios quilcachishca Shimipi ima nijujtaca, napacha ñucanchi yuyailla yachajui ushanachu canchi.

21Dios villashcataca, ima punllapash na gentepaj munailla villashcachu. Ashtahuangarin, Taita Diospajlla causanajuj runacuna cashpami, jucha illaj Diospaj Espíritu yarichijpi villanajushca.