JEREMÍAS 27 - Quichua Imbabura 2016

Yugocunata rurashcamanda

1Judá llactata, Josías runapaj churi jatun mandaj Joacim runa mandai callarijujpimi, Mandaj Diosca Jeremiastaca cashna villachun mandarca:

2“Mandaj Diosca, cashnami nihuarca: ‘Huatana huascacunatapash, yugucunatapash rurangui.

3Chaicunataca, Edom, Moab, Amón shuti llactacunata jatun mandajcunapajman cachangui. Shinallata, Tiro shuti, Sidón shuti pueblocunata jatun mandajcunapajman cachangui. Chaicunataca, Judá llactata jatun mandaj Sedequiasta, Jerusalenman ricungapa shamuj runacunahuanmi cachana cangui.

4Paicunataca, paicunapaj jatun mandajcunata, cashna nichun cachangui: Tucuita Mandaj, Israelcunapaj Taita Diosca, cashnami nin: Cashna nishpami, cangunata mandajcunamanga villana canguichi.

5Ñucami, cai pachatapash, gentecunatapash, animalcunatapash, alpapi tucui imalla tiyajcunatapash, ninan ushaihuanmi rurarcani. Chaicunataca, piman cashpapash caranallami cani.

6Cunanga, tucui cai llactacunataca, Babilonia llactata jatun mandaj, Ñucapajta ruraj Nabucodonosor runapaj maquipimi churarcani. Sacha animalcunatapashmi, paipajta rurachun, churarcani.

7Tucui llactacunami, paitapash, paipaj churicunatapash, paipaj churipaj churicunatapash cazushpa causanajunga. Babilonia llacta gentecunata, shuj jatun mandajcuna llaquichishpa tucuchingacamanmi, chashna causanajunga.

8Maijan llacta cashpapash, maijan jatun mandaj cashpapash, Babilonia llactata jatun mandaj Nabucodonosor runata, yuguta aparinshna na cazujcunataca, ninandami llaquichisha. Espadahuan, yarjaihuan, jatun ungüihuanmi llaquichishpa tucuchisha. Mandaj Dios Ñucami, chashna nini.

9Shinallata cangunapaj profetacunata, yachajcunata, muscuipi ricujcunata, brujucunata, yumbucunataca, napacha uyanachu canguichi. Babilonia llactata jatun mandajpaj gañangunaca na tucushpami causanguichi nishpa, llullajcunataca na uyanachu canguichi.

10Paicunaca, cangunapaj llactamanda llujshishpa richunmi, llullashpa villanajun. Cangunata caimanda Ñuca calpachijpi, huañushpa tucurichunmi chashna ninajun.

11Ashtahuangarin, Babilonia llactata jatun mandajpaj gañan tucushpa, yuguta aparinshna cazunajujpica, paicunapaj llactapillata tarpushpa causanajuchun saquishallami’ ninmi Mandaj Diosca nichun cachangui” nijurcami.

12Judá llactata jatun mandaj Sedequías runamambash, tucui chai shimicunatami, cashna nishpa villarcani: Babilonia llactata jatun mandajpaj yuguta aparinshna, chai gentecunapajta rurashpa causashpa catichilla.

13Mandaj Diosca: “Babilonia llactata jatun mandajpajta rurangapa na munaj gentecunaca, espadahuan, yarjaihuan, jatun ungüihuanmi huañunga” nircami. ¿Cambash, cambaj gentecunapashchu, chashna huañungapa munanguichi?

14Profetacuna llullashpa: “Babilonia llactata jatun mandajpajtaca, na ruranachu canguichi” ninajujtaca, na uyanachu canguichi. Paicunaca llullashpallami chashna ninajun.

15Paicunaca, napash Ñuca cachajpitami, Ñuca shutipi llullashpa villanajun. Cangunapash, cangunaman llullashpa villaj profetacunapash, caimanda Ñuca llujchishpa cachajpi, huañuchunmi chashna ninajun ninmi Mandaj Diosca, nircanimi.

16Shinallata sacerdotecunatapash, tucui cai gentecunatapash cashnami nircani: Mandaj Diosca, cashnami nin: “Mandaj Diospaj huasipi ima charishcacunata apashcataca, Babilonia llactamanda ñami tigrachimunga nishpa, cangunaman profetacuna llullashpa villashcataca na uyanachu canguichi.

17Paicunataca, na cazunachu canguichi. Babilonia llactata jatun mandajpajta rurashpa causashpaca, causanguichimi. ¿Imashpata cai puebloca, llaquinayaita tucuchi tucunga?

18Paicuna cashpapash, profetacuna cashpapash, Mandaj Dios rimashcata villanajushpaca, tucuita Mandaj Diosta cunanllata mañachun ninimi. Chashna mañajpica, Mandaj Diospaj huasipi, Judá llactata jatun mandajpaj huasipi, Jerusalenbi ima charishcacuna puchushcataca, Babiloniaman na apangachu ninmi” nircanimi.

19Tucuita Mandaj Diosca, cai pueblopi puchushca jatun pilarcunamandapash, yacuta churana jatun pilonmandapash, caishuj uchilla tanquemandapash, chai tanqueta churana carretamandapash, tucui ima charishcacunamanda puchushcamandapashmi chashna nijun.

20Babilonia llactata jatun mandaj Nabucodonosor runaca, Joacim runapaj churi, Judá llactata jatun mandaj Jeconías runatapash, cai Judá llactapi tiyaj Jerusalenbi mandajcunatapash, prezu apajushpaca, chaicunataca na apashpami saquishca carca.

21Mandaj Diospaj huasipi, Judá llactata jatun mandajpaj huasipi, Jerusalenbi ima charishcacunata puchushcamandaca, tucuita Mandaj, Israelcunapaj Taita Diosca, cashnami nin:

22“Ñucallata ricungapa rishpa cutin tigrachimungacamanmi, Babilonia llactaman apai tucushpa, chaipi causanajunga. Chai jipaca, Ñucallata pushamushpami, cai pushtupillata cutin churasha” ninmi Mandaj Diosca.