HECHOS 23 - Quichua Imbabura 2016

1Chai mandajpuralla tandanajushcata ricujushpami, Pabloca cashna nirca:

“Huauquicuna, cunan punllacamanmi Taita Diospaj ñaupajpica, ali yuyaihuan ali shunguhuambacha cazushpa causajuni” nircami.

2Shina nijpimi sacerdotecunata mandaj Ananías runaca, Pablota shimipi huajtachun chaipi shayanajujcunataca mandarca.

3Shina nijpimi Pabloca cashna nirca:

“¡Mishqui shimi jayaj shungumari cangui. Taita Diosmi candapash huajtanga! ¿Canga, mandashca shimipi nijujshnachu ñucata tapuchingapa tiyajungui? ¿Canga, mandashca shimita na cazushpachu, ñucata huajtachun mandangui?” nircami.

4Shina nijpimi, chaipi shayanajuj gentecunaca:

“¿Taita Dios churashca mandaj sacerdotetachu chashna shimi junda na alicachishpa rimangui?” ninajurca.

5Shina nijpimi Pabloca, cashna nirca:

“Tucui huauquicuna, sacerdotecunata pai mandaj cajtaca na yachapashcanichu. Dios Quilcachishca Shimipica: ‘Cambaj llactapi mandajtaca, ama na alicachishpa rimanguichu’ nijunmi” nircami.

6Pablo chashna nijushpaca, huaquingunaca saduceocuna, shujcunaca fariseocuna chaipi tandanajushcata ricushpami shinllipacha rimashpa cashna nirca:

“Tucui huauquicuna, ñuca taitaca fariseo cajpimi ñucapash fariseo cani. Shina cashcamandami, huañushcacuna causarinata cushijushpa shuyajushcamanda, cunanga cashna tapuchi tucujuni” nircami.

7Shina nijpimi fariseocunahuan, saduceocunahuan paicunapura ninanda fiñanajushpa, chai tandanajushca gentecunaca chaupirirca.

8Saduceocunaca, huañushcacuna causarinatapash, angelcuna tiyajtapash, espiritucuna tiyajtapash na crinllu carca. Ashtahuangarin, fariseocunaca, chaicunataca crinmi carca.

9Shina cashpami, mandashca Shimita yachachij fariseocunaca, ninandapacha fiñarishpa jatarishpaca, cashna ninajurca:

“Cai runa ima na alita rurashcapash na ricurinllu. Ashtahuangarin, shuj espíritu cashpa, shuj ángel cashpapash, paiman rimashca cajpica, Taita Diostaca na fiñachinachu canchi” ninajurcami.

10Paicunapura ninanda fiñanajujpimi, huaranga macanajuj runacunata mandajca, Pablota macashpa tucuchinga yashpa manllarca. Shina cashpami, macanajuj runacunata cayaj cachashpa, paicunapaj chaupimanda llujchishpa apachun mandarca. Shina cajpimi macanajuj runacunapaj jatun huasiman aparca.

11Chai tutallatami Apunchi Jesusca, Pabloman ricurishpa cashna nirca: “Pablo, ama manllaichu. Imashnami Jerusalenbi Ñucamanda villajurcangui, chashnallatami Roma pueblopipash villagrinapacha cangui” nircami.

Pablota huañuchingapami yarinajushca

12Chai cayandi punllami judiocunaca, Pablota imashna huañuchinatapash yarishpa cashna ninajurca: “Paita huañuchina punllacaman micuitapash na micushpa, ufiaitapash na ufiashpami tiyanajuna canchi. Chaita na pactachijpica, ‘ima llaquipash japishpami ali canman’ nishpami juramentunajurca.

13Chashna juramentushca runacunaca, chuscu chunga yalijshnami carca.

14Paicunami, sacerdotecunata mandajcunapajman, mandaj ancianocunapaj ñaupajman rishpa cashna ninajurca:

‘Chai ari nirishcata na pactachijpica, ima llaquipash japichun’ nishpami juramenturcanchi. ‘Pablota huañuchingacaman, imatapash na micunachu canchi’ nircanchimi.

15Cunanga: Cangunaca, mandajpuralla tandanajushcacunahuan, huaranga macanajuj runacunata mandajpajman rishpa: ‘Pablota ashtahuan ali tapuchingapa, cayapaca apamupai’ nij tucushpa pushamugripaichi. Shina pushamujpimi ñucanchica, ñambi huañuchingapa chapanajushun” ninajurcami.

16Chashna pacalla huañuchingapa yarishcata, Pablopaj panipaj churi uyashpami, macanajuj runacunapaj jatun huasiman yaicushpa, Pabloman villangapa rirca.

17Shina villajpimi, patsaj macanajuj runacunata mandajpuramanda shuj runata Pablo cayashpa, cashna nirca:

“Cai huambragutaca, huaranga macanajuj runacunata mandaj runapajman pushapai. Paimi shuj villanata charipan” nircami.

18Shina nijpimi, huaranga macanajuj runacunata mandaj runapajman chai huambrata pushashpaca cashna nirca:

“Prezu tiyajuj Pablomi ñucata cayashpaca, ‘cai huambrataca cambajman pushapai’ nishpa cachamun. Paimi, canman shuj villanata charin ninmi” nircami.

19Shina nijpimi huaranga macanajuj runacunata mandajca, chai huambrata maquimanda aisashpa rishpaca:

“¿Imatata villanata charihuangui?” nishpa tapurca.

20Shina tapujpimi cashna nirca:

“Judiocunami: ‘Pablota ashtahuan ali tapuchishun’ nij tucushpalla: ‘Mandajpuralla tandanajushcapajman caya punlla pushamupai’ nishpa, canda mañangapa rimarinajun.

21Ashtahuangarin, ama umai tucupanguichu. Runacunaca, chuscu chunga yalimi huañuchingapa chapagrinajun. Paicunaca, cashna nishpami juramentushca: ‘Pablota huañuchingacaman micuitapash na micushpa, ufiaitapash na ufiashpami shuyagrinchi. Chaita na pactachijpica, ima llaquipash japishpami ali canman’ nirishcami. Cunanga, can imata nijtallami shuyashpa chapagrin” nircami.

22Chai huaranga macanajuj runacunata mandajman chashna villajpimi:

“Ñucaman cashna villashcataca, pimambash ama villanguichu” nishpa chai huambrataca tigrachirca.

Mandaj Felixpajmanmi, Pablotaca cachashca

23Patsaj macanajuj runacunata mandajcunataca, ishcaipurata cayashpami cashna nirca: “Iscun pacha tutapi, Cesarea puebloman richunga, ishcai patsaj macanajuj runacunata tandachinguichi. Shinallata caballopi tiyarij canchis chunga macanajuj runacunatapash, lanzata charij ishcai patsaj macanajuj runacunatapash tandachinguichi.

24Pablo tiyarichumbash, caballocunata alichishpa cunguichi. Paitaca, mandaj Félix runapajman ali chayachinguichi” nircami.

25Félix runaman cuchunmi, shuj fangapi cashna quilcashpa cacharca:

26“Claudio Lisias shuti ñucami, ninanda alicachi tucushca mandaj Félix, alillachu capangui nishpa cachapani.

27Cai runataca, judiocunami huañuchingapa munashpa prezu charinajushca. Paitaca, Roma llactapura cajta yachashpami, macanajuj runacunahuan rishpa cacharichircani.

28Imamanda chashna juchachinajujta yachangapa munashpami, mandajpuralla tandanajushcapaj ñaupajman pusharcani.

29Chaipimi, ‘paicunapaj mandashca shimicunata na pactachinllu’ nishpa juchachinajurca. Ñuca ricuipica, pai huañuchi tucuna ima na alitapash na rurashcachu carca. Prezuna huasipipash, na churanashnallami carca.

30Ashtahuangarin: ‘Judiocunamari, cai runataca huañuchingapa pacalla chapanajun’ nishpami villahuarca. Chaimandami, cambajman ucha cachamujuni. Paita huañuchingapa munajcunataca, ‘cambaj ñaupajpi imatapash nigrichi’ nircanimi. Candapash, ‘ali mandajushca capangui’ nipanimi” nirca.

31Chai macanajuj runacunaca, paicunata mandashcashnami Pablotaca, chai tutallata pushashpa, Antípatris pueblocaman rirca.

32Chai cayandi punllami, caballopi rij macanajuj runacuna, Pablota pushashpa richun, macanajuj runacunapaj jatun huasiman tigramurca.

33Chai cayandi punlla Cesarea puebloman chayashpaca, mandaj runaman quilcashca fangata punda cushpami, Pablotapash paipaj ñaupajpi saquirca.

34Chai quilcashca fangata chai mandaj quilca catishpaca:

“¿Maimandata cangui?” nishpami, Pablotaca tapurca.

Shina tapujpimi:

“Cilicia llactamandami capani” nirca.

35Shina nijpica:

“Canda juchachijcuna shamujpimi, can imata nijtapash uyasha” nirca.

Shina nishpaca, Herodes rurashca jatun huasipi Pablota churashpami, macanajuj runacuna ricuriachun cacharca.