APOCALIPSIS 2 - Quichua Imbabura 2016

Canchis pueblopi tandanajuj crijcunamanmi villashca:Éfeso pueblopi crijcunamanmi villashca

1Éfeso pueblopi tandanajuj crijcunapaj angelman cashna quilcangui: ‘Canchis luzerota ali maquipi charijuj, curita rurashca canchis candelerocunapaj chaupipi purijuj Ñucami, cashna nini:

2Can tucuita, shinllitapacha imata rurashpa pactachijujtapash, na ñapash fiñarijtapash alimi yachani. Canga, na alicunataca na ricunayachij cajtapash yachanimi. “Apostolcunami canchi” ninajujpipash, llullacuna cajtaca, canllata ricushpami, ali yachashcangui.

3Ninan llaquita apajushpapash, na ñapash fiñarishpami, imata cashpapash na saquishpa, ñucata juyaimanda shinllitapacha tucuita rurashpa pactachijushcangui.

4Shina cajpipash, callari juyaita saquishcamandami, candaca ninanda na alicachini.

5Punda alita rurajushcata saquishpa pandarishcata yarishpami, ninanda llaquirina cangui. Punda alita rurajushcataca, cutinmi rurashpa catina cangui. Na alita rurashcamanda, can na llaquirijpica, cambajman ñapash shamushpami, cambaj candelero tiyajujtapash quichushpa anchuchisha.

6Ashtahuangarin, nicolaitacuna na alita ruranajujta millanayachishpaca, alitamari rurajungui. Chai rurashcacunataca, ñucapashmi millanayachini.

7Maijambash rinrita charijca, tandanajuj crijcunaman Diospaj Espíritu villajujta uyanguichi: Na alita mishajcunamanmi, causaita caraj quirupi fucushcata micuchun carasha. Chaica, Taita Dios causajuj, juyailla llacta chaupipimi shayajun’ nishpa quilcangui.

Esmirna pueblopi crijcunamanmi villashca

8Esmirna pueblopi tandanajuj crijcunapaj angelman, cashna quilcangui: ‘Ñucami, callarichijpash, tucuchijpash cani. Ñucami, huañushca cashpapash cutin causarircani. Ñucami cashna nijuni:

9Can imatalla rurajujtapash, llaquita apajujtapash, imagu illaj cajtapash alimi yachani. (Shina cashpapash, canga ninan charijmi cangui). Shinallata, “judiocunami canchi” ninajushpapash, canda na ali shimicunata rimanajujtaca yachanimi. Paicunaca, napacha judiocunachu, ashtahuangarin, Satanasta alicachingapa tandanajujcunami.

10Llaquichi tucuna cashpapash, imatapash napacha manllanachu cangui. Cangunapurataca, imashna crij cajta ricungapami diabloca, huaquingunataca chunga punllacaman llaquitaca apachun, prezuna huasipi churanga. Ashtahuangarin, huañungacaman ali catijpimi, causaita causagrina coronata carasha.

11Maijambash rinrita charijca, tandanajuj crijcunaman Diospaj Espíritu villajujta uyanguichi: Tucuita mishajtami, jipa huañuica na llaquichi ushanga’ nishpa quilcangui.

Pérgamo pueblopi crijcunamanmi villashca

12Pérgamo pueblopi tandanajuj crijcunapaj angelmanbash, cashna nishpa quilcangui: ‘Ishcandi manñaman filo filo espadata charijujmi cashna nini:

13Can imatalla rurajujtapash, can causajuj pushtupi, Satanás mandajujtapash alimi yachani. Ashtahuangarin canga, Ñuca shutita crishpa, na cungashpami causajungui. Ñucamanda villaj, alipacha cazuj, Antipas shuti runagutaca, Satanás mandajpimi, cangunapurapica huañuchirca. Shina cajpipash, cangunaca na saquishpami catihuarcanguichi.

14Shina cajpipash can rurajushcataca, ashagutaca na alicachinichu: Balaam runa yachachishcata catijcunata, chaipi charinguirami. Chai Balaam runaca, Israelcuna pandarichunmi, Balac runaman yachachishca carca. Chaimandami, rurashcalla dioscunaman, imata carashcatapash micushpa, huainayashpa causanajurca.

15Shinallata, nicolaitacuna yachachishcata, na saquingapa munajcunatapash charinguirami. Paicunataca, ñucapash napacha ricungapa munanichu.

16Chashna cashcamanda, canga ninandapachami llaquirina cangui. Can na chaita rurajpica, ñapash cambajman shamushpami, Ñuca shimimanda llujshijuj espadahuan paicunahuanga macanajusha.

17Maijambash rinrita charijca, tandanajuj crijcunaman Diospaj Espíritu villajujta uyanguichi: Tucuita mishajmanmi, pacashca tiyajuj, maná micunaguta carasha. Shinallata, uchilla yuraj rumigupi, mushuj shutita quilcashcatapashmi carasha. Chai shutitaca, pipash na yachashca cashpami, chai rumiguta carajpi japishpalla yachanga’ nishpa quilcangui.

Tiatira shuti pueblopi crijcunamanmi villashca

18Tiatira shuti pueblopi tandanajuj crijcunapaj angelmambash, cashna nishpa quilcangui: ‘Taita Diospaj Churi Ñucami, nina rupajujshna ñavita, rupachishpa punchayachishca bronceshna chaquita charini. Ñucami cashna nini:

19Ñucata juyashpami, Ñucata crij cashpa, alitalla rurashpa, ali shunguhuambacha causajungui. Punda rurajushcataca, ashtahuan yalimi cunambica rurajungui. Chaitaca alimi yachani.

20Shina cajpipash can rurajushcataca, ashagutaca na alicachinichu: Jezabel huarmi na alita yachachijpipash, imatapash na nishpami saquingui. Chai huarmica, profetami cani nishpami, ñucapajta rurajcunataca huainayachun yachachishpa urmachijun. Rurashcalla dioscunaman imata carajtapash micunallami nishpapashmi yachachijun.

21Ñucami, chai huarmitaca ninanda llaquirishpa Diospajman tigrarichun shuyajurcani. Ashtahuangarin, huainayanata saquishpa llaquiringapaca napacha munanllu.

22Ricui, jatun ungüita paiman Ñuca cujpimi, paica camapi sirijunga. Chai huarmihuan huainayashpa, paishnalla na alita rurashcamanda na llaquirishpa tigrarijpica, ninan llaquitami cachamusha.

23Chai huarmipaj huahuacunatapash huañuchishami. Shina rurajpimi, yuyaipi, shungupi imata yarinajujta tucuita Ñuca yachajtaca, tandanajuj tucui crijcunapash yachanga. Shinallata, canguna imatalla rurashcatapash ricushpami, tucuicunaman chashnallata cusha.

24Tiatira pueblopi causajcuna, huaquingunaca, chashna pandachishpa yachachijtaca, na catishpami causarcanguichi. Chashna cashpami, Satanaspaj yachajunamandaca, napacha catingapa munashpa causarcanguichi. Shinamandami, ashtahuan imatapash rurachunga na mañajuni.

25Ashtahuangarin, imata aliguta catinajushcataca, na saquishpami, ñuca tigramungacaman catina canguichi.

26Tucurimui punllacaman, ñuca munashcatalla rurashpa, imatapash na alita mishajmanmi, llactacunata mandai ushachun carasha.

27Chai llactacunataca, jirru varahuan, alpa mangata ñutujshnami mandajunga. Ñuca mandajuchun, Taita Dios ñucaman ushaita carashcashnami, chashna mandajunga.

28Shinallata, tutamanda llujshimuj luzerotapashmi carasha.

29Maijambash rinrita charijca, tandanajuj crijcunaman Diospaj Espíritu villajujta uyanguichi’ nishpa quilcangui.