JEREMÍAS 29 - Quichua Imbabura 2016

Prezu apai tucushcacunaman Jeremías quilcashcamanda

1Nabucodonosor runami, Jerusalenmandaca, mandashpa ricuj rucucunata, sacerdotecunata, profetacunata, tucui gentecunata, Babiloniaman prezu aparca. Chaipi causanajuj gentecunamanmi, profeta Jeremiasca, Jerusalenmanda shuj cartata quilcashpa cacharca.

2(Jatun mandaj Jeconiastapash, paipaj mama jatun mandajtapash, mandana huasipi rurajcunatapash, Judá llactapi mandajcunatapash, Jerusalenbi mandajcunatapash, imatapash aliguta rurajcunatapash, tucuicunata apashca jipami, chai quilcashcataca cacharca).

3Chai quilcashcataca, Safán shuti runapaj churi Elasa shuti runaman, Hilcías shuti runapaj churi Gemarías shuti runacunamanmi cacharca. Paicunatami, Judá llactata jatun mandaj Sedequías shuti runaca, Babilonia llactata jatun mandaj Nabucodonosor runapajman cacharca. Chaipica, cashnami nijurca:

4“Tucuita mandaj, Israelcunapaj Taita Diosca, Jerusalenmanda Babiloniaman prezu apai tucushcacunataca, cashnami nin:

5Maipi causanajushcapi, huasichishpa, pambacunapi tarpushpa, chaipi fucushcata micushpa causaichilla.

6Shinallata, cazarashpa, churicunata, ushicunata charinallami canguichi. Cangunapaj churicunatapash, ushicunatapash, huahuacunata charichun cazarachinguichilla. Ashtahuangarin ama tucuringapami, mirana canguichi.

7Canguna prezu apai tucushpa tiyanajushca llactapi, ali causai tiyachunmi, Mandaj Dios Ñucata mañana canguichi. Chai llactapi ali causai tiyajpimi, cangunapash ali causaita charinguichi ninimi” nircami.

8Tucuita mandaj, Israelcunapaj Taita Diosca, cashnatapashmi nin: “Profetacunapash, ima tucunata yachajcunapash, muscuipi ricujcunapash, cangunata umachinajuchunga na saquinachu canguichi.

9Paicunataca, napash Ñuca cachajpitami, llullashpa villanajun” ninmi, Mandaj Diosca.

10Mandaj Diosca, cutinmi cashna nirca: “Babilonia llactapi, canguna canchis chunga huatata causajpica, cangunata ricungapa shamushpami, Ñuca nishcata pactachingapa, cangunapaj llactaman pushasha.

11Cangunaman ima alita ruranatapash ñami yachani. Cangunamanga, ima llaquipash illaj, canguna munashcashna, ali causaiguta charichunmi carasha” ninmi Mandaj Diosca.

12“Shina rurajpimi, cangunaca Ñucata ninanda mañangapa shamunguichi. Shina mañajpimi, Ñucapash canguna mañashcata uyasha.

13Tucui shunguhuan Ñucata mascashpaca, Ñuca ñaupajman shamunguichimi” ninmi.

14Mandaj Diosca, cashnatapashmi nin: “Cangunataca, maijan llactaman, prezu apachun saquishca cashpapash, cutinmi cai llactaman tigrachimusha. Cangunata llujchishpa cachashca pushtumanllatami tigrachimusha” ninmi Mandaj Diosca.

15Ashtahuangarin cangunaca: “Babilonia llactapi causanajujpipash Mandaj Diosca, profetacunatami ñucanchiman villanajuchun cachamun” ninguichimi.

16Shina cajpipash: Davidpaj tiyarinapi mandashpa tiyajunmandapash, cai pueblopi causajcunatapash, prezu na apai tucushpa saquirishca gentecunamandapash, Mandaj Diosca, cashnami nin.

17“Tucuita Mandaj Dios Ñucami, paicunataca, macanajuipi cashpapash, yarjaihuan cashpapash, ninan ungüihuan cashpapash llaquichijuni. Paicunataca, higo ismushcashna na micunayai cajtami ricuchini.

18Paicunataca, macanajuihuan cashpapash, yarjaihuan cashpapash, ungüihuan cashpapash catiriyashpami llaquichisha. Tucui cai pachapi causajcunami, manllarishpa paicunataca ninanda na alicachinajunga. Maijan llactaman calpachijpipash, fiñashpa na alicachi tucushpa causanajuchunmi saquisha” ninmi.

19Shinallata Mandaj Diosca, cashnatapashmi nin: “Cangunallatami, Ñucamanda villaj profetacunata na cazushpa na uyangapa munarcanguichi. Imata pundamanda villajpipash na cazushpami causarcanguichi. Mandaj Dios Ñucami chashna nijuni.

20Jerusalenmanda Babilonia llactaman prezu cachajpi rishca gentecunami, Mandaj Dios Ñuca rimashcata uyana canguichi” ninmi.

21Tucuita mandaj, Israelcunapaj Mandaj Diosca, Colaías shuti runapaj churi Acab shuti runamandapash, Maasías shuti runapaj churi Sedequías shuti runamandapash cashnami nijun: “Paicunaca llullashpallami, Ñuca shutipi cangunaman villanajun. Paicunataca, Babilonia llactata mandaj Nabucodonosor, cangunapaj ñaupajpi huañuchijuchunmi churasha.

22Judá llactamanda, Babilonia llactaman prezu apai tucushcacunaca, ninandami na alicachi tucunajunga. Paitaca: ‘Mandaj Diosca, Sedequías runatashna, Acab runatashna llaquichishpami ali canman. Babilonia llactata jatun mandajca, chai ishcai runacunataca, ninahuan rupachishpami huañuchirca’ ninajungami.

23Paicunaca, Israelpuracunapica, shujpaj huarmicunahuan huainayashpami jatun na alita ruranajurca. Paicunaca, Ñuca na cachajpitami, Ñuca Shutipi llullashpa villanajurca. Chaita yachashpami, imashna llaquichinatapash ricugrini” ninmi Mandaj Diosca nishpami, quilcashpa cacharca.

24Nehelam shuti pueblomanda Semaías shuti runataca cashna ningui:

25“Israelcunata Mandaj Diosca, cashnami nin: ‘Canga, Jerusalenbi causajcunaman, Maasías runapaj churi Sofonías shuti sacerdoteman, caishuj sacerdotecunamambash’, cambaj shutipi quilcashpami cashna nishpa cacharcangui:

26‘Mandaj Diosmi candaca, Joiada sacerdotepaj randi, paipaj huasipi tucuita ricuj sacerdote cachun churarca. Maijambash, ñucami profeta cani nishpa, shuj muspa runashna villaj shamujpica, canmi prezuna ucupi huatashpa churana cangui.

27Shina cajpica, ¿Imamandata Anatot shuti pueblomanda Jeremías cangunaman villajujpica, na jarcashpa saquircangui?’ ninmi.

28Ashtahuangarin Jeremiasmi, Babiloniapi causanajujpica, cashna nishpa quilcashcata cachamurca: ‘Chai llactapica, unai huatacunatami prezu causagringuichi. Chaimandami, huasichishpa, pambacunapi tarpushpa, chaipi fucushcacunata micushpa causana canguichi’ nishpa quilcashcata cachamurca” nijurcami.

29Sofonías shuti sacerdoteca, profeta Jeremiaspaj ñaupajpillatami, chai quilcashca fangataca quilca catirca.

30Chaimandami Mandaj Diosca, Jeremiastaca cashna nijurca:

31“Tucui prezu apai tucushcacunaman, cashna nishpa quilcai: Mandaj Diosca, Nehelam shuti pueblomanda Semaías shuti runataca, cashnami nin: ‘Semaías shuti runataca, na Ñuca villachun cacharcanichu. Llullashpami, cangunaman Ñuca shutipi villajurca. Pai llullashpa villashcata yariajlla causanajuchunmi’, chashna villajurca.

32Chaimandami Mandaj Dios Ñucaca: ‘Nehelam llactamanda, Semaías shuti runataca, paipaj miraicunandi llaquichigrini. Paicunapuramandaca, shujllapash, Ñuca agllashcacunaman ima alita rurajujtaca, napacha ricungachu’. Mandaj Dios Ñucata na cazunajuchun villashcamandami chashna llaquichi tucunga nishpa quilcangui” nijurcami.