1Taita Diospajta ruraj Moisés nara huañushpallata, taita Israelpaj miraicunata bendiciashca shimicunami.
2Paica cashnami nijurca:
“Mandaj Diosca, Sinaí urcumandami shamurca.
Seir shuti urcumandami punchayachijurca.
Parán shuti urcumandapachami, punchapamba ricurirca.
Paipajlla causaj, chunga huaranga huarangacunapaj chaupipimi shamurca.
Paipaj ali maquipica, mandashcatami ninatashna apashpa shamurca.
3Pai agllashca gentecunataca juyarcarami.
Tucui paipajlla shicanyashcacunami, paipaj maquipi causanajurca.
Chaimandami, maita rinata ricuchishcata catinajurca,
Can yachachishcatami catinajurca.
4Mandashcata Moisés cujushpaca, Jacobpaj miraicunapaj cachunmi curca.
5Gentecunata mandajcuna, Israel ayllucunahuan tandanajujpica,
Jesurún shuti pushtupimi shuj jatun mandaj tiyarca” nircami.
6“Rubén ayllutaca cashna nishpami bendiciarca:
Rubén aylluca ama huañushpa causajuchunlla.
Chai ayllu runacunaca, ama huaquinlla cashpa ashtahuan mirachun” nircami.
7Judá ayllutaca, cashna nishpami bendiciarca:
“Mandaj Dioslla, Judá ayllu mañajujtaca uyapanguilla.
Paipaj gentecunatapash ricushpa pushapanguilla.
Paicunata fiñajcunataca, paipaj maquihuan mishachun yanapapangui” nircami.
8Leví ayllutaca cashnami nijurca:
“Can charishca Tumim shuti, Urim shuti rumicunaca, Diosta yariashpa causaj runapajmi canga.
Paitami, Masah shuti Meriba shuti yacupi cashpa, paihuan fiñanajushpa pai imashna cajta ricurcangui.
9Paimi, paipaj taita mamataca:
‘Ima punllallapash na ricushcanichu’ nirca.
Paipaj huauquicunatapash: ‘Na rijsinichu’ nircami.
Paipaj huahuacunatapash: ‘Na ricushcanichu’ nircami.
Paicunami, cambaj Shimicunata cazunajurca.
Canman ari nishcatapashmi pactachinajurca.
10Paicunami, Jacobpaj miraicunamambash, aliguta ricushpa mandanata yachachinajunga.
Can mandashcatami, Israelcunaman yachachinajunga.
Shinallata inciensotapash, cambaj ñaupajpimi cushnichinajunga.
Tucuillata rupachina animaltapash, cambaj altarpimi churanajunga.
11Mandaj Dioslla, paicuna imaguta rurashcatapash bendiciapangui.
Paicunapaj maquihuan imaguta rurashcatapash, ali chasquipangui.
Paicunata fiñajcunatapash, paicunata millanayachij runacunatapash,
ima punllallapash ama jatarichun huasha tulluta faquipangui” nijurcami.
12Benjamín ayllutaca cashnami nirca:
“Paicunaca, Mandaj Dios juyashcacunami.
Imatapash na manllashpami, Dios huacaichijpi causanga.
Paicunataca pacashpa charijungallami.
Diospaj rigra ucupimi causanajunga” nircami.
13Josepaj ayllutaca cashnami nijurca:
“Cangunapaj alpacunataca, Mandaj Dios bendiciapachun.
Jahua pachamanda juyailla jamzi paramuhuan, fucuchipachun.
Alpa ucupi tiyaj yacuhuambash bendiciapachun.
14Rupai punllacunapica, ashtahuan ali granocunata fucuchishpa,
luna punllacunapica, micunayai granocunata fucuchishpa bendiciapachun.
15Punda huatamandapacha tiyaj urcupi, ashtahuan ali granocunahuan bendiciapachun.
Causaita causaicaman tiyaj lomacunapi, ashtaca granocunata fucuchishpa bendiciapachun.
16Shinallata ali alpacunapi tucui imalla ashtahuan ali tiyashcacunahuan bendiciapachun.
Zarza casha yurapi causajushca Diospaj juyaica, Josepaj umaman shamupachun.
Paipaj huauquipuracunapi mandaj runapaj umaman shamupachun.
17Pai juyailla canaca, punda huachashca jari huagrashnami.
Paipaj ushaica, búfalo shuti huagrapaj cachushnami.
Chaicunahuan tupanshnami shuj gentecunataca,
cai pacha tucuri manñacunaman tucuillata cachanga.
Efrainbaj miraicunaca, chunga huaranga huarangacunami.
Manasespaj miraicunaca, huaranga huarangacunami” nircami.
18Zabulón ayllutaca:
“Zabulón, canga maiman llujshishpapash cushijungui” nircami.
Isacar ayllutapash:
“Canga, cambaj carpacunapi cushijushpa causanguilla” nircami.
19“Paicunaca, gentecunataca paicunapaj urcumanmi cayanga.
Chaipimi, alitalla rurashpa, animalcunata Diosman cushpa huañuchinajunga.
Chaimandami, mama cucha yacupi ashtacapacha tiyajcunata micunajunga.
T'iyu alpapi pacashca juyaillacuna tiyajtapashmi japinajunga” nircami.
20Gad ayllutaca cashnami nirca:
“Gad aylluman ashtaca alpacunata caraj Diosca, aligumi cangui ni tucushca cachun.
Gad aylluca, leonshna samajushpapash, umatapash, rigratapash micungapa fitinllami.
21Paica, ashtahuan ali alpatami, paipaj cachun agllan.
Chaipimi, mandajman cungapa ali alpata alichishca charirca.
Paimi, gentecunata ñaupashpa shamurca.
Mandashca shimicunatapash, imata rurachun Mandaj Dios mandashcacunatapash, Israelcunahuanmi tucuita pactachirca” nircami.
22Dan ayllutaca cashnami nirca:
“Dan aylluca huahua leonshnami.
Basán urcumandapachami fahuamujun” nircami.
23Neftalí ayllutaca cashnami nirca:
“Neftalí ayllumanga, imata cashpapash na ushangacamanmi carashca.
Mandaj Dios bendiciashcataca, ashtacatapachami charin.
Paipaj alpaca, indi huashajunmanda uracamanmi” nircami.
24Aser shuti ayllutaca cashnami nirca:
“Aser aylluca, Jacobpaj miraipuracunapi bendiciai tucushca cachun.
Paipaj huauquicunapipash, juyai tucushca cachun.
Paipaj chaquitapash, aceitepi mutiyachijuchun.
25Cambaj pungucunata jarcanacunaca, jirruta, bronceta rurashcami canga.
Cambaj ushaipash, can causana punllacunashnami canga.
26Jesurunmanda Taita Dioshuan chimbapurangapaca, pipash na tiyanllu.
Paica canda yanapangapami, jahua pachapi tiyarin.
Paipaj ninan ushaihuanmi fuyu jahuapi tiyarin.
27Can pacajunaca, causaita causajuj Taita Diosmi.
Causaita causajuj Diospaj rigrapash, cai pachacamanmi.
Canda fiñajcunataca, cambaj ñaupajmanda llujchishpa cachashpami:
‘Paicunata tucuchi’ nishpa mandarca.
28Israelcunaca, imatapash na manllashpami causanajunga.
Taita Jacobpaj miraicunaca imatapash na manllashpami causanga.
Trigopash, uvapash tiyaj llactapimi tiyanajunga.
Jahua pachamanda tamiapash, paicunapaca na illangachu.
29Israelcunalla cushijuichiyari.
¿Pita cangunashna, Mandaj Dios quishpichishca gentecuna tiyangayari?
¿Pita imamandapash jarcajpi, yanapashpa mishachij espadashna Diosca tiyangayari?
Chashnamandami, canda fiñajcunaca pingai tucushpa urai cumurinajunga.
Cangunami, paicunataca sarunguichi” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
