1Ña punllayajujpimi, sacerdotecunata mandajcunaca, chai pueblomanda mandaj ancianocunandi tandanajushpa, Jesusta huañuchinajuchun cungapa tucuilla parlarinajurca.
2Chai jipami Jesustaca huatashpa apashpa, llactata mandaj Poncio Pilatopaj maquipi churanajurca.
Judas Iscariote huañushcamanda3Jesustaca, ña huañuchi tucugrijunda ricushpami, Paita japichij Judas runaca llaquirijurca. Shina llaquirishpami, chai quimsa chunga culquicunataca, sacerdotecunata mandajcunaman, chai pueblomanda mandaj ancianocunaman, tigrachingapa rirca.
4Paica, cashnami nirca:
“Ima na alitapash na ruraj runata huañuchinajuchun japichishpami, juchata rurashcani” nirca.
Ashtahuangarin paicunaca:
“¿Ñucanchica imata ricunatapash na charinchica? ¡Canllari imapash tucunguiyari!” ninajurca.
5Shina nijpica, Diospaj huasi ucupi, chai culquita shitashpa rishpami, paillata sipirishpa huañurca.
6Chai culquicunataca, sacerdotecunata mandajcuna tandachishpami, cashna ninajurca: “Cai culquica, yahuarta jichashpa huañuchinajuchun jatujpi cushca culquimi. Shina cajpimi, Diosman cushpa churanapica, na churanalla canchi” ninajurca.
7Paicunapura parlarishpami, chai culquihuanga, caru llactamanda shamujcuna huañujpi pambangapa, mangata ruraj runapaj alpata randirca.
8Chaimi chai alpataca, cunangaman: Yahuar Pamba nishpa shutichishca.
9Chashna rurajpimi, Profeta Jeremías villashcapash pactarca. Paica: “Quimsa chunga culquicunatami japinajurca. Chai culquicunataca, Israelcunami mashna cajpipash churangapa ña yuyarishcalla carca.
10Jatun Dios ñucaman villashcashnami, chai culquihuanga, mangata ruraj runapaj alpata randinajurca” nircami.
Jesusta, Pilato tapuchijushcamanda(Mar. 15:2-5; Luc. 23:3-5; Juan 18:33-38)11Chai llactata mandajpaj ñaupajpi, Jesús shayajujpimi:
“¿Canllu, judiocunata jatun Mandaj cangui?” nishpa tapurca.
Shina tapujpimi, Jesusca:
“Canllatami ña chashna ningui” nirca.
12Jesusca, sacerdotecunata mandajcuna, mandaj ancianocuna ninanda juchachinajujpipash, imatapash na tigrachircachu.
13Chaimi Pilatoca:
“Canda cashna ninanda juchachishpa villanajujtaca, ¿nachu uyangui?” nirca.
14Shina nijpipash Jesusca, upalla uyashpami, shuj shimillatapash na tigrachirca. Shina upalla uyajpimi, chai llactata mandajca ninanda manllarirca.
Jesustaca, huañunapachami nishcamanda(Mar. 15:6-20; Luc. 23:13-25; Juan 18:38—19:16)15Shinallata cushijuita rurana punllapica, mandaj Pilatoca gentecuna maijanda cachari nishcatami, prezu tiyajujmanda shujta cacharinata yachaj carca.
16Chai punllacunapimi, tucuicuna rijsishca Barrabás runa prezu tiyajurca.
17Pilatoca, chai tandanajushca gentecunatami cashna nishpa tapurca:
“¿Maijandata cacharichun munanguichi, Barrabás runata, na cashpaca Cristo nishca Jesustachu cacharichun munanguichi?” nircami.
18Jesustaca, paicuna ninanda na ricunayachishpa, paipaj ñaupajman apamushcatami yacharca.
19Mandashpa tiyarinapi Pilato tiyajujpimi, paipaj huarmica cashna nichun cacharca: “Alitalla ruraj chai runataca, ama canga imatapash ruranguichu. Cunan tutami, chai runa ima tucunamanda, muscuipi ricushpa ninanda llaquirishpa na ushajurcani” nishpami cacharca.
20Ashtahuangarin: “Barrabás runataca cacharishpa, Jesustaca huañuchilla” ninajuchunmi, sacerdotecunata mandajcunapash, mandaj ancianocunapash, gentecunata ninanda yachachinajurca.
21Llactata mandajca cashna nishpami tigrachirca:
“Cai ishcai runacunamandaca, ¿maijandata cacharichun munanguichi?” nirca.
Shina nijpimi gentecunaca:
“Barrabastami cacharichun munanchi” ninajurca.
22Shina ninajujpimi:
“Cristo nishca Jesustaca, ¿imatata rurasha?” nishpa, Pilatoca tapurca.
Shina tapujpica, tucuilla gentecunami:
“¡Chai runaca, chacatai tucuchun!” nishpa caparinajurca.
23Chashna caparinajujpimi llactata mandajca:
“Cai runaca, ¿ima na alitata rurashcayari?” nishpa tapurca.
Shina tapujpicarin:
“¡Chai runaca, cruzpi chacatai tucuchun!” nishpa, ashtahuan ninanda caparinajurca.
24Chashna ashtahuan caparinajujpimi, imata ruraitapash na ushashpa, Pilatoca, gentecunapaj ñaupajpi maquita yacuhuan maillashpa cashna nirca:
“Cai alitalla ruraj runapaj yahuarca cangunapaj jahuami canga. Na ñucapaj jahuachu, canguna imapash tucuichi” nirca.
25Shina nijpimi tucuilla gentecuna:
“Chai yahuarca, ñucanchipaj jahua, ñucanchi huahuacunapaj jahua cachun” nishpa caparinajurca.
26Shina cajpimi, Barrabás runatara cacharirca. Ashtahuangarin Jesustaca, ninanda astichishpami, chacatanajuchun saquirca.
27Shina saquijpimi macanajuj runacunaca, Pilato mandashpa tiyaj jatun patioman Jesusta aparca. Shina apashpami, Jesusta chaupipi churashpa shayarichun, tucuilla macanajuj runacunata cayarca.
28Paicunaca, Jesús churajushcata surcuchishpami, yanapuca fachata fachalichirca.
29Umapipash, cashata ahuashca coronatami churachirca. Vara caspitapash, ali maquipi charichishpa, Paipaj ñaupajpi cungurishpami:
“¡Juyayai, judiocunata jatun Mandaj!” nishpa, na ali cachishpa asinajurca.
30Paicunaca, t'ucashpa churashpami, varata quichushpa, umapi huajtanajurca.
31Chashna na ali cachishpa asishca jipami, chai fachata surcuchishpa, Paipaj churajunatallata churachishpa, chacatangapa apanajurca.
Jesustaca chacatashpami huañuchishca(Mar. 15:21-41; Luc. 23:26-49; Juan 19:17-30)32Chaimanda llujshishpa rinajushpami, Cirene pueblomanda Simón runata tuparishpa, cruzta apachun mandarca.
33Shinallata, Gólgota lomamanmi chayarca. Gólgota nishpaca, Uma Tullu nijunmi.
34Chaiman chayajpimi, vinagreta jayajhuan chapushpa Jesusman ufiachingapa munarca. Ashtahuangarin malishpaca, na ufiangapa munarcachu.
35Jesusta chacatashpaca, paicunapura pipaj urmajta ricungapa rurashpami, Paipaj churajunata chaupirinajurca. Chashna chaupirijpimi, profeta villajushcapash pactarca. Paica cashnami nirca: “Ñuca churajunataca, paicunapurami chaupirirca. Ñuca churajuna jahuapillatami, pipaj urmajta ricungapa ruranajurca” nircami.
36Chai jipami, Jesusta ricushpa chaipi tiyanajurca.
37Pai chacatariyajuj cruz jahuapica, imamanda huañuchijushcatami quilcashca tiyajurca. Chaipica: “CAICA, JUDÁ LLACTAPI CAUSAJCUNATA JATUN MANDAJ JESUSMI” nijurcami.
38Chai jipami ishcaipura shuhua runacunataca, shujtaca aliman, shujtaca lluquiman, Jesushuan chacatarca.
39Chaita yalijcunaca, umata muyuchishpami, na alicachishpa cashna rimanajurca:
40“Canga: ‘Diospaj huasita urmachishpapash, quimsa punllapillata shayachishallami’ nircanguica. Shina cashpaca Canllata quishpiriyari. Taita Diospaj Churipacha cashpaca, cruz jahuamandapash uriajuyari” ninajurcami.
41Shinallatami sacerdotecunata mandajcunapash, mandashca Shimita yachachijcunapash, fariseocunapash, mandaj ancianocunapash, Jesustaca na alicachishpa asishpa, cashna nishpa rimanajurca:
42“Shujcunataca quishpichircallami. Paillata quishpiritaca, na ushanllu. Israelcunata jatun Mandaj cashpaca, cunanllata cruz jahuamanda uriajujpimi Paitaca crinchiman.
43‘Taita Diospaj Churimi cani’ nishpami, Paica Taita Diosta yariashpa purijurca. Dios llaquishpaca, cunanllatamari Paitaca quishpichinman” ninajurcami.
44Jesushuan chacatariyaj shuhua runacunapash, chashnallatami Paitaca na alicachishpa rimanajurca.
45Chaupi punllamanda chishi quimsa pachacamanmi, tucui cai pachaca yana yana tucurca.
46Ña quimsa pacha tucujujpimi: “Elí, Elí, ¿lama sabactani?” nishpa, Jesusca ninanda caparirca. Chai shimicunaca: “Ñuca Taita Dioslla, Ñuca Taita Dioslla, ¿imashpata Ñucatalla saquihuanguiyari?” nijunmi.
47Chaipi shayanajujmanda huaquinguna uyashpami:
“Eliastamari cayajun” ninajurca.
48Chashna caparijhuanmi, paipuramanda shuj runaca, esponjata apangapa calparca. Chaitaca, vinagrepi mutiyachishpami, sucus pundapi churashpa, Jesús ufiachun shimipi churarca.
49Ashtahuangarin caishujcunaca:
“Saquilla. ¿Paita cacharichingapa Elías shamunllu, imami? ricushunchi” ninajurcami.
50Ashtahuangarin Jesusca, cutin ninandapacha caparishpami, Paipaj espirituta Diosman mingashpa huañurca.
51Shina tucunhuanmi, Diospaj huasi ucupi huarcushpa quilpashca jatun fachaca, jahuamanda uraiman llujshijta chaupipi liquirirca. Alpa mamapash ninanda cuyujpimi, jatun rumicunapash chaupirirca.
52Huañushcacunata pambashca utujucunapash pascarijpimi, Diospajlla causashpa huañushcacunaca, ashtacacuna causarirca.
53Chaicunaca, Jesús causarishca jipami, huañushcacunata pambashca utujucunamanda llujshishpa, Diospajlla jucha illaj puebloman shamunajurca. Paicunaca, ashtaca gentecunamanmi ricurinajurca.
54Patsaj macanajuj runacunata mandajca, shuj macanajuj runacunandi, Jesusta ricushpa tiyajushpami, alpa mama cuyushpa ima tucuntapash ricushpa, ninanda manllarijurca. Shinamandami:
“Cai runaca, Taita Diospaj Churipachami cashca” ninajurca.
55Chaipica, ashtaca huarmicunami Jesustaca, carumandalla ricushpa shayanajurca. Paicunaca, Galilea llactamandapachami, Jesusman rurangapa shamushca carca.
56Paicunapurapica, Magdala pueblomanda Mariapash, Jacobopaj, Josepaj mama Mariapash, Zebedeopaj mamapashmi carca.
Jesusta pambashcamanda(Mar. 15:42-47; Luc. 23:50-56; Juan 19:38-42)57Ña tutayajpimi, Arimatea pueblomanda ninan charij José shamurca. Paipash, Jesusta catijllatami carca.
58Chai runami, Jesús huañushcataca, mañangapa Pilatopajman rirca. Shina mañajpimi, Pilatoca Jesús huañushcata cuchun, cacharca.
59Jesús huañushcata japishpaca, shuj mushuj yura fachahuanmi Joseca pilluchirca.
60Shina pilluchishpami, jaca rumipi rurashca paipaj mushuj utujupi, Jesús huañushcataca churarca. Shuj jatun rumita suchuchishpa, chai utuju punguta quilpashpaca, rircallami.
61Chai utuju pungu ñaupajpica, Magdala pueblomanda Mariandi, shuj Mariandimi tiyanajurca.
Jesusta pambashca utuju pungupimi, macanajuj runacunata ricunajuchun churarca62Cayandi punlla alichishca jipaca, sacerdotecunata mandajcunapash, fariseocunapash, Pilatopaj ñaupajmanmi tandanajurca.
63Paicunaca, cashnami ninajurca:
“Mandaj taitalla, chai llulla runaca, causajushpallata imata nirijushcatami yarinajunchi. Chai runaca: ‘Ñucata huañuchijpipash, quimsa punllahuanga causarishallami’ nirijurcami.
64Chai runa pambariyajuj utujuta quimsa punllacaman huacaichichun, macanajuj runacunata cachapai. Na huacaichijpica, Paipaj yachajujcunara tuta shamushpa, chai huañushcataca shuhuashpa apanman. Chashna apashpaca: ‘Huañushcacunapaj chaupimanda causarircami’ nishpami, tucui gentecunaman llullashpa villanajunga. Shina villanajujpica, chai runa causajushpallata llullashpa purijushcatapash yalimari tucunga” ninajurcami.
65Shina ninajujpimi Pilatoca, cashna nirca:
“Cai macanajuj runacunataca, pushashpa richilla. Paicunataca, canguna munashcashna chai utujuta ali ricurianajuchun churagrichi” nircami.
66Shina nijpi rishpami, chai utujuta quilpashca rumitaca ali ali jarcashpa, macanajuj runacunatapash ricunajuchun churanajurca.
Who We AreWhat We EelieveWhat We Do
2025 by iamachristian.org,Inc All rights reserved.
