ÉXODO 23 - Quichua Imbabura 2016

1Llullashpa villashcataca ama chasquinguichu. Na alita rurajcunahuan tandanajushpa, ama chashnapachami carca ningapa ringuichu.

2Ashtacacuna na alita ruranajujpilla, ama catishpa pandaringuichu. Shujcunata manllaimandalla, juezcunapaj ñaupajpi llullangapa rishpa, ama pitapash llaquichinguichu.

3Huajcha cajpilla, ama llullashpa pai mañashcata ruranguichu.

4Canda fiñaj runapaj huagrata, burruta cashpapash chingashcata tarishpaca, paiman tigrachinguilla.

5Canda na ricunayachij runapaj burru, aparishcandi shitarishca sirijujta ricushpaca ¿na imata rurashpa saquinguimanllu? Ashtahuangarin, uchami jatarichina cangui.

6Huajcha runata llaquichishpa, ama shujpaj alita ruranguichu.

7Ama llullashpa rimanguichu. Aliguta causaj, alitalla ruraj runataca na huañuchinachu cangui. Na alita ruraj runataca, napacha alicachishachu.

8Na alita rurachun imata carashcatapash napacha japinachu cangui. Chai carashcacunami, ima alitapash na ricujshna, na alita rurachishpa, alita ruraj runatapash pandachinga.

9Shuj llactamanda shamushpa causaj runataca na llaquichinachu cangui. Shuj llactapi imashna llaquilla causanatapash alimi yachangui. Egipto llactapica, cangunapash shuj llactamanda rishcami causarcanguichi.

10Cambaj alpapica, sucta huatacaman tarpushpami granocunataca tandachina cangui.

11Ashtahuangarin canchis huatapica, cambaj llactamanda huajchacuna micuchun, sachapi causaj animalcuna micuchunmi saquina cangui. Cambaj uva chagratapash, olivo chagratapash chashnallatami saquina cangui.

12Sucta punllatallami imatapash rurana cangui. Canchis punllapica samanapachami cangui. Cambaj huagrapash, burrupash samachunmi chashna rurana cangui. Shinallata, cambajta ruraj huarmipaj churipash, shuj llactamanda shamushpa causajuj runapash, samanata charichunmi chashna rurana cangui.

13Ñuca imata mandashcataca, pactachinapachami canguichi. Rurashcalla dioscunataca, napacha mañanachu canguichi. Shutitallapash napacha rimanachu canguichi.

Huatapi quimsa jatun cushijui punllacunata rurachunmi mandashca(Éx. 34:18-26; Deut. 16:1-17)

14Huatapica quimsa jatun cushijui punllacunatami, Ñucata yarishpa rurana cangui.

15Levadura illaj tandata micuna cushijui punllatapash ruranami cangui. Levadura illaj tandataca, Abib quillapimi, canchis punllacaman, imashna Ñuca mandashcashna micuna cangui. Chai quillapimi Egiptomandaca llujshimurcangui. Ñuca ñaupajman shamushpaca, pipash na chushaj maquihuan ricurimungachu.

16Punda fucushca granocunata tandachina cushijui punllatapashmi rurana cangui. Shinallata, huata tucuripipash, pambapi can tarpushca granocunata tandachina cushijui punllatapashmi rurana cangui.

17Tucuilla jaricunami, Mandaj Jatun Dios Ñucapaj ñaupajpi ricurinagapaca, huatapica quimsacaman shamuna canguichi.

18Ñucaman cushpa huañuchishca animalpaj yahuarta, Ñucaman carashpaca, levadurahuan rurashca tandahuan tandachishpaca na caranachu cangui. Chai animalcunapaj viratapash, cayapaca na puchuchinachu cangui.

19Cambaj alpapi punda fucushca granocunatami, canda Mandaj Taita Diospaj huasiman punda apamuna cangui. Huahua chivopaj aichataca, ama paipaj mamapaj lechepillata yanunguichu.

Mandaj Diosca, Paipaj Angeltami, Israelcunata pushachun cachashca

20Canman carangapa alichishca llactaman aliguman pushachunga, Ñucami shuj Angelta cachamusha. Pai ñaupashpa pushajpimi, chai llactamanga yaicugringui.

21Paitami uyashpa cazuna cangui. Paita na cazushpa jariyajpica napacha perdonangachu. Ñucallatami paihuanga cani.

22Ashtahuangarin pai ima nishcata uyashpa, Ñuca tucui ima nishcata pactachijpica, cangunata fiñajcunataca Ñucapashmi fiñasha. Shinallata, cangunata llaquichijcunataca Ñucami ninanda llaquichisha.

23Ñuca Angelmi, cangunataca, amorreo, heteo, ferezeo, cananeo, heveo, jebuseo gentecuna causanajuj llactaman ñaupashpa pushanga. Chai gentecunataca Ñucami tucuilla tucuchisha.

24Paicunapaj rurashcalla dioscunataca, napacha cungurinachu canguichi. Na chai gentecunashna alicachishpa causanachu canguichi. Ashtahuangarin chai dioscunataca, tucuillami ñutushpa tucuchina canguichi.

25Cangunata Mandaj Taita Dios Ñucatallami jatunyachishpa causana canguichi. Ñucami, cangunaman tandatapash, yacutapash ashtacata carashpa charisha. Ñucami, cangunata ama ungüicuna japichun huacaichisha.

26Huahuata vijsayu cashpa urmachij huarmipash, huahuata na tari ushaj huarmipash, cangunapaj llactapica na tiyangachu. Mashna huatacunata causachumbash, Ñucallatami causaita carasha.

27Maijan llactaman yaicujpipash, chai llajtapi causajcuna cangunata manllachunmi yuyaita cusha. Shina cashpami, cangunata fiñajcunaca, manllarishpa, pacajushpa llujshishpa ringa.

28Ninan millai baluncunata ñaupachishpa Ñuca cachajpimi, heveo, cananeo, heteo gentecunaca chai llactacunamanda llujchishpa calpanga.

29Paicunataca, na shuj huatapilla cambaj ñaupajmanda llujchishpa cachashachu. Jichushca pamballa tucujpi, sacha animalcuna jundashpa cangunata ama llaquichinajuchunmi, na chashna rurasha.

30Cambaj huahuacuna mirashpa, chai llactata japingacamanmi, chai gentecunataca, cambaj ñaupajmanda asha asha llujchishpa cachasha.

31Cambaj llactataca, Puca cuchamandapacha, filisteocunapaj mama cuchacaman, shinallata, chaquishca pambamandaca, Éufrates jatun yacucaman cachunmi churasha. Chai llactapi causajcunata, cambaj maquipi churajpimi, paicunataca cambaj ñaupajmanda llujchishpa cachangui.

32Paicunahuan, paicunapaj rurashcalla dioscunahuambash, imata pactachingapaca napacha ari ninachu cangui.

33Paicunaca cambaj llactapica na causangachu. Cangunahuan causanajushpaca, cangunata pandachingami. Chai rurashcalla dioscunatara mañanajushpa Ñucata fiñachinguichiman.