1Profeta Hageo runapash, Iddo shuti runapaj churi profeta Zacariaspash Dios paicunahuan cajpimi, Judá llactapi, Jerusalenbi causajcunaman, Dios ima nishcata villanajurca.
2Shina villajpimi, Salatiel runapaj churi Zorobabelpash, Josadac runapaj churi Jesúa shuti runapash, Diospaj huasita Jerusalenbi cutin shayachi callarirca. Shinallata, Taita Diospaj profetacunapash chaipimi yanapanajurca.
3Chai punllacunapimi, jatun yacu chimbaman tiyanajuj llactacunata mandaj Tatnai shuti runaca, Setar-boznai shuti runandi, paicunapaj cumbacunandi, Jerusalenman shamushpa tapunajurca: “Cai huasita rurachumbash, muyundita pircata rurachumbash, ¿pita cangunataca mandarca?” ninajurcami.
4Cashnatapashmi tapushpaca: “Cai huasita huasichij runacunaca, ¿ima shuticunata?” ninajurcami.
5Ashtahuangarin Taita Diosca, Judá llactata pushajcunahuan cajpimi, Persia llactata jatun mandaj Darioman villajpi, pai imatapash nishpa shuj cartata quilcangacaman, na jarcai usharca.
6Shina cajpimi, jatun yacu chimba llactacunata mandaj Tatnai shuti runapash, Setar-boznai runapash, jatun yacu chimba llactacunata mandajcunapash, quilcashcata shujman yalichishpa, jatun mandaj Dariopajman cachanajurca.
7Chai quilcashcapica cashnami nijurca: “Can jatun mandaj Dariotaca, ali causaiguta charichunmi munapanchi.
8Jatun mandajlla, caita yachachunmi munapanchi: Ñucanchica, Judea llactapi Diospaj huasita, rumicunahuan shayachinajunda ricungapami rircanchi. Paicunaca ñami tablacunatapash pirca jahuacunapi churashpa, ñapash aliguta rurashpa tucuchinajun.
9Chaimandami paicunata mandajcunataca, cashna nishpa tapurcanchi: ‘Cai huasita shayachinajuchun, muyundi cai jatun pircacunata alichinajuchunga, ¿pita cangunataca mandarca?’ nishpami tapurcanchi.
10Shinallata picunalla mandanajushcatami, canman quilcashpa cachamungapa tapurcanchi.
11Paicunaca, cashnami nirca: ‘Ñucanchica, jahua pachata, cai pachata churaj Taita Diospajta rurajcunami canchi. Ñucanchica, punda huatacunallata ña huasichishca huasitami, cutin shayachinajunchi. Cai huasitaca, Israelcunata alipacha jatun mandajmi shayachishpa tucuchishca carca.
12Ashtahuangarin, ñucanchi ñaupa taitacuna, jahua pachapi causaj Taita Diosta fiñachijpimi, Babilonia llactata mandaj caldeopura Nabucodonosor shuti jatun mandajpaj maquipi churashca. Paimi, cai huasitapash faquishpa tucuchishpa, gentecunatapash Babilonia llactaman prezu apashca carca.
13Shina cajpipash Babilonia llactata, Ciro shuti runa mandai callarijui huatapimi, Diospaj cai huasitaca cutin shayachinajuchun mandarca.
14Shinallata, Jerusalenbi tiyajuj, Diospaj huasimandaca, curita, culquita, tucui tiyashcatami, jatun mandaj Nabucodonosor runaca, Babilonia llactapi rurashcalla dioscunapaj huasiman apashca carca. Chaicunatami jatun mandaj Ciro shuti runaca, Babilonia llactapi tiyajuj rurashcalla dioscunapaj huasimanda llujchishpa, Sesbasar shuti cati mandajman curca.
15Paica cashna nishpami curca: Imata caiman apamushcatacapash, tucuillata apashpa, Jerusalenbi Diospaj huasita cutin shayachishpa, maipi tiyajushcallapita churanguichi nircami.
16Chaimandami, Sesbasar shuti runa shamushpaca, Jerusalenbi Taita Diospaj huasita shayachingapa callari rumicunata churarca. Chai punllamandaca, cunangamanmi cai huasita shayachitaca na tucuchishca canchi’ ninajurcami.
17Cunanga, can jatun mandajpaj yuyaipi ali cajpica, chai quilcashcata can jatun mandajpaj Babiloniapi tiyajun huasipi mascachipailla. Jerusalenbi Taita Diospaj huasita cutin shayachinata, jatun mandaj Ciro shuti runa mandashca ali cajpica, ñucanchiman villashpa cachamupailla” nishpami, quilcashpa cacharca.
Who We AreWhat We EelieveWhat We Do
2025 by iamachristian.org,Inc All rights reserved.
