1Shina cashcamanda Diospajlla causaj crijcuna, cangunaca, jahua pachapi causagringapa cayai tucushcacunami canguichi. Chaimandami, ñucanchi crijcunapajca, Cristo Jesusca, apóstol cajta, sacerdotecunata mandaj cajtaca yachana canguichi.
2Taita Diospaj huasipica, tucuitami aliguta Moisesca pactachishca. Shinallatami Jesuspash, Dios mingashcataca tucuita aliguta pactachijun.
3Maijan huasichijpash, chai huasitaca yalimi alicachi tucun. Shinallata Jesuspash, Moisestaca yalimi alicachi tucunata charin.
4Huasicunaca, pipash huasichijpillami tiyan. Ashtahuangarin, tucui ima tiyachumbash Taita Diosmi churashca.
5Moisesca, Taita Diospaj huasipimi, tucuita aligutapacha rurashpa pactachijushca. Dios imata ningapa munashcatapash, villanapacha cajta ricuchingapami chashna pactachijushca.
6Ashtahuangarin Cristoca, Diospaj Churi cashpami, Paipaj huasitaca mandajun. Chai huasica ñucanchimi canchi. Tucurimui punllacaman Paita aliguta crishpa shinllipacha shuyanajushpallami, Dios causajuj huasi canchi.
Taita Diospaj huahuacuna samagrinatami villajun7Shinamandami, jucha illaj Espirituca cashna nijun:
“Dios rimajta cunan uyashpaca,
8na shinlli shungu tucunachu canguichi.
Jichushca pambapi juchata rurana munaicuna shamujpi,
Diosta ninanda fiñachishcashnaca, na tucunachu canguichi.
9Chaipimi, cangunapaj ñaupa taitacunaca,
Ñuca imata rurajta ricungapa munashpa fiñachihuarca.
Shinallata, Ñuca imata rurajujtapash,
chuscu chunga huatacamanmi ricunajurca.
10Shinamandami, chai miraicunahuanga, fiñarishpa cashna nircani:
‘Punllandimi, paicunapaj shungupica, panda yuyaicunatalla yarishpa purinajun.
Shina cashpami, Ñuca mandashcacunatapash, na rijsishpa purinajun’ nircanimi.
11Shinamandami, ninanda fiñarishpa:
‘Ñucahuan samangapaca, napacha yaicungachu’ nishpa juramenturcani” nijunmi.
12Juyashca crijcuna, cangunapurapica, na ali shungu tucushpa, causajujlla Taita Diostapash na crishpa anchurijcunaca, shujllapash ama tiyachun.
13Ashtahuangarin, cunan causanajushpallata, punllandimi, caishujmanda, chaishujmanda aliguta yarichirina canguichi. Juchata rurana yuyai pandachij shamujpipash, cangunapurapica, pipash ama shinlli shungu tucungapami chashna causana canguichi.
14Cristota crishca punllamandapacha, tucurimui punllacaman Paita aliguta catishpaca, Cristo japijushcashnallata ñucanchipash japigrinatami charinchi.
15Dios quilcachishca Shimipica cashnami nijun:
“Pai rimajujta cunan uyashpaca,
ñaupa punllacuna fiñachinajushcashnaca,
cangunaca na fiñachinachu canguichi” nijunmi.
16Dios rimajujta uyashpapash na cazujcunaca, ¿picunata cashcanga? ¿Nachu Moisés llujchimujpi, Egiptomanda tucui llujshimushcacuna cashcanga?
17¿Picunahuanda Diosca, chuscu chunga huatacaman fiñarishca cashcanga? ¿Nachu jichushca pambapi juchata rurashcamanda huañujcunahuan fiñarishca cashcanga?
18¿Picunatata Diosca: “Ñucahuan samangapaca napacha shamui ushanachu canguichi” nishpa juramentushcanga? Paita na cazujcunatami chashna nijushca.
19Paicunaca na crishcamandami, Dioshuan samangapaca na yaicui ushashcata ricunchi.
Who We AreWhat We EelieveWhat We Do
2025 by iamachristian.org,Inc All rights reserved.
