PROVERBIOS 29 - Quichua Imbabura 2016

1Jarcashpa rimajpipash na cazuj runataca, ñapashmi llaquicunaca japinga.

Paitaca, llaquicuna ñapash shamujpica, pipash na yanapai ushangachu.

2Alitalla rurajcuna mandanajujpica, tucuicunami cushijun.

Ashtahuangarin, Diosta na cazujcuna mandashpa charijpica, tucuicunami llaquirin.

3Alipacha yachajunata munaj churica, taitatami cushichin.

Ashtahuangarin, culquimandalla na alita ruraj huarmicunahuan purishpaca, imata charishcatapash tucuchingami.

4Jatun mandajca, aliguta ricushpa mandashpami llactataca ñaupajman apanga.

Ashtahuangarin, llactapi causajcunata impuestota yapata mañashpaca, llactatami tucuchijun.

5Pita cashpapash yangatalla alicachishpa rimaj runaca,

pandachingapallami chashna nij tucujun.

6Na alita ruraj runaca, pai na alita rurashcahuanllatami llaquipi urman.

Ashtahuangarin, alitalla rurashpa causaj runaca, cushijushpami candanga.

7Alita ruraj runaca, huajchacunata llaquinmi.

Ashtahuangarin, na alita ruraj runaca, ima ali cajtapash na yachanllu.

8Na cazushpa asijcunaca, llactapi causajcunataca fiñanajuipimi churan.

Ashtahuangarin, alipacha yachajushcacunaca, fiñanajuitami tucuchin.

9Alipacha yachajushca runa, juizu illaj runahuan chimbapurashpaca,

asinajushpapash, fiñarinajushpapash, napacha ali tucungachu.

10Huañuchij runacunaca, alitalla rurajcunataca na ricunayachinllu.

Ashtahuangarin alitalla rurajcunaca, ali causaita charichunmi munan.

11Juizu illaj runa fiñarishpaca, pai imata munashcata ruranllami.

Ashtahuangarin, alipacha yachajushca runaca jarcarinmi.

12Llullashpa yachachishcata, mandaj runa chasquishpaca,

tucuilla paipajta rurajcunatami, na alita yachachinga.

13Huajcha runatapash, shuhua runatapash,

Mandaj Diosca, ishcandimanmi ñavitaca churashca.

14Jatun mandaj, huajchacunata aliguta ricushpa mandashpaca,

unaitami mandashpa causanga.

15Varahuan astishpa yachachijpimi, alita yachajunga.

Ashtahuangarin, imata rurajujpipash huambrata upalla ricujpica, mamatami pingaichinga.

16Diosta na cazujcuna ashtaca mirajpica, juchata ruranapash ashtahuanmi miranga.

Ashtahuangarin alitalla rurajcunaca, paicuna llaquita apanajujtami ricunajunga.

17Cambaj churitaca aliguta yachachijpimi, candaca samachinga.

Shinallata, cambaj causaipipash cushijuitami cunga.

18Llactata, Diospaj ushaihuan na pushajpica tucuringallami.

Ashtahuangarin, mandashca shimicunata pactachijcunaca cushijungami.

19Cambajta ruraj runa na cazujpica, ama shimihuanlla rimanguichu.

Paica, ali yuyaicunata cujpipash na cazungachu.

20¿Napash ali yarishpata rimajlla runata ricushcanguichu?

Chai runapaj randica, juizu illaj runarami alishnalla canga.

21Huahuamandapacha juyashpa viñachishca runami,

paita viñachij taita imata charishcataca japinga.

22Ñapash fiñarijlla runaca, fiñanajuitami jatarichin.

Ñapash fiñarijlla runaca, ashtahuanmi juchacunata ruran.

23Jariyashpa causaj runataca, ninan llaquicunami japinga.

Ashtahuangarin, ali yuyaita charij runataca, tucuicunami alicachinga.

24Shuhuacunahuan tandanajuj runaca,

paillatami ninan llaquicunata apanga.

Paica, na alita ruranajujta ricushpapash, na imatapash ruranllu.

25Shujcunata manllashpa causaj runaca, paillatami llaquita apanga.

Ashtahuangarin, Mandaj Diosta yarishpa causaj runaca,

ima llaquitapash na apangachu.

26Mandajcunapaj ñaupajpica, tucuicunami ali ricuringapa munan.

Ashtahuangarin, Mandaj Diosmi tucuicunata alitapacha ricushpa mandajun.

27Alitalla ruraj runaca, na alita ruraj runataca na ricunayachinllu.

Shinallata, Diosta na cazuj runapash, alitalla rurajcunataca na ricunayachinllu.