1Acaz runaca, ishcai chunga huatata charishpa mandai callarishpami, chunga sucta huatata Jerusalenbi mandajurca. Paica, Mandaj Taita Diospaj ñaupajpica, ñaupa taita David alita rurashcashnaca na rurarcachu.
2Ashtahuangarin, Israel llactata caishuj jatun mandajcunashnami, na alita rurashpa causajurca. Chai jahuami yacuyachishpa rurashca, Baal shuti dioscunaman rijchajcunata rurachirca.
3Hinom shuti runapaj churicunapaj pugru pambapipashmi, inciensota cushnichijurca. Paipaj churicunata chai dioscunaman cushpami rupachijurca. Paica, shuj llactacunapi causajcunata, Israelcunapaj ñaupajmanda, Mandaj Dios llujchishpa cachashca gentecunashnami, na alita rurajurca.
4Shinallata, lomacunapi tiyaj altarcunapi, uchilla lomacunapi, fanga junda quiru ucucunapimi, animalcunata huañuchishpa, inciensotapash cushnichijurca.
5Chaimandami paita Mandaj Taita Diosca, Siria llactata jatun mandajpaj maquipi churarca. Chai Siria llacta gentecuna mishashpami, Judá llactapi causajcunataca, ashtacacunata Damasco puebloman prezu apanajurca. Shinallata, Israel llactata jatun mandajpaj maquipi churajpimi, ashtacacunata huañuchirca.
6Remalías shuti runapaj churi Peka shuti macanajuj runaca, shuj punllallami Judá llactapi causajcunataca, patsaj ishcai chunga huaranga, ashtahuan shinlli macanajuj runacunata huañuchirca. Paicunapaj ñaupa taitacunata Mandaj Taita Diosmanda anchurishcamandami, chashna huañuchirca.
7Shinallata, Efraín llactamanda Zicri shuti ninan shinlli macanajuj runaca, jatun mandaj Acaz runapaj churi Maasías runatapash, Azricam shuti paipaj mayordomotapash, jatun mandajpaj cati mandaj Elcana shuti runatapashmi huañuchirca.
8Israelcunapashmi, Judá llactapi causaj paicunapaj huauquipuramandaca huarmicunandi, huambracunandi, cuitsacunandi, ishcai patsaj huaranga gentecunata prezu aparca. Chai jahuapash, ashtaca charishcacunata quichushpami, Samaria puebloman apanajurca.
9Chai Samaria pueblopimi, profeta Obed shuti runa causajurca. Paimi, Samaria puebloman macanajuj runacuna yaicumunajujpi, tuparingapa llujshishpa cashna nijurca:
“Cangunapaj ñaupa taitacunata Mandaj Taita Diosca, Judá llactapi causajcunahuan fiñarishpami, cangunapaj maquipi churashca. Cangunaca, jahua pachaman chayajta ninandapacha fiñarishpami, ashtacacunata huañuchishcanguichi.
10Cunanga, Judá llactapi, Jerusalenbi causajcunataca, jaricunatapash, huarmicunatapash, cangunapajta rurashpa causachunmi churashcanguichi. Chashna rurashpaca, ¿nachu cangunata Mandaj Taita Diosta fiñachishpa juchata rurashcanguichi?
11Cunanga, ñucata uyahuaichi. Prezu apamushca cangunapaj huauquicunataca, cutin cachaichilla. Mandaj Diosca, cangunahuanga ninandami fiñarishca” nijurcami.
12Chaita uyashpami, Efraín ayllucunata huaquin mandajcunaca, jatun macanajuimanda tigramujcunata fiñashpa jatarirca. Paicunaca: Johanán shuti runapaj churi Azariaspash, Mesilemot shuti runapaj churi Berequiaspash, Salum shuti runapaj churi Ezequiaspash, Hadlai shuti runapaj churi Amasapashmi carca.
13Paicunaca, cashnami ninajurca:
“Prezu apamushcacunata, caiman pushamushpaca, Juchata rurashpami Mandaj Diosta fiñachigrinchi. Ñucanchi na alita rurashpa, juchacunata rurashcataca ashtahuan mirachishpami, Israelcunahuan Dios ashtahuan fiñarishpa llaquichijuchun chashna ruragringuichi” ninajurcami.
14Shina nijpimi macanajuj runacuna, prezu apamushcacunataca cacharinajurca. Shinallata, imatalla quichumushcatapash, mandajcunapaj ñaupajpi, tucui gentecunapaj ñaupajpimi tigrachinajurca.
15Chai jipami, shutipi ña villashca mandajcunaca, prezu apamushcacunataca, maijan lluchulla cajpica, churajunata churachishpa, chaquipipash churachinajurca. Shinallata micuchumbash, ufiachumbashmi caranajurca. Chugricunataca, aceitehuan javishpami, na puri ushajcunatapash, burrucunapi tiyachishpa, palmera quirucuna tiyaj Jericó shuti pueblocaman pushanajurca. Chai jipami paicunaca, Samaria puebloman cutin tigranajurca.
16Chai punllacunallatami, jatun mandaj Acaz shuti runaca, yanapangapa shamupaichi nigrichun, Asiria llactata jatun mandajcunapajman cacharca.
17Edom llacta gentecunapash, Judá llactaman shamushpa, paicunahuan macanajushpa, prezu apashcamandami, chashna mañachun cacharca.
18Shinallata filisteocunapashmi, Judá llacta jichushca pambapi tiyaj pueblocunapi, Neguev llactapi tiyaj pueblocunapipash jundashca tiyanajurca. Shina jundashpami Bet-semes, Ajalón, Gederot, Soco, Timna, Gimzo shuti pueblocunatapash, chai pueblocunapaj muyundi uchilla pueblocunatapash quichushpa chaicunapi causanajurca.
19Israel llactata jatun mandaj Acaz runa na alita rurashcamandami Mandaj Diosca, Judá llactapi causajcunataca, ninanda llaquichishpa pingaichirca. Acaz shuti runaca, Judá llactapica imatallapash na jarcarishpa, na alitalla rurashpami, Mandaj Diostaca ninandapacha fiñachirca.
20Asiria llacta gentecunata jatun mandaj Tiglat-pileser shuti runapash na yanapashpami, ashtahuangarin chaupipi churarca.
21Mandaj Diospaj huasipi, mandana huasipi, cati mandajcunapaj huasipi imalla charishcacunata, Asiria llacta gentecunata jatun mandajman, Acaz runa cushca cajpipash, paitaca na yanaparcachu.
22Ashtahuangarin jatun mandaj Acaz runaca, shina jatun llaquicuna japijpipash, Mandaj Diosta fiñashpami, ashtahuan juchata rurajurca.
23Pai mishai tucuchun saquishca Damasco pueblopi tiyaj dioscunaman animalcunata carashpami huañuchijurca. Paica: “Siria llactata jatun mandajcunapaj dioscunaca, paicunataca yanaparcami. Ñucatapash yanapahuachun, animalcunata paicunaman carashpa huañuchishalla” yashpami, shina rurajurca. Ashtahuangarin, chai dioscunallatami, paitapash, tucui Israelcunatapash, jatun llaquipi churarca.
24Chashna rurashca jahuami, Acaz runaca, Taita Diospaj huasipi imalla tiyashcacunatapash tucuilla faquishpa, Mandaj Diospaj huasi pungucunatapash vicharca. Jerusalén pueblopica, caipi chaipimi shuj altarcunata rurarca.
25Judá llactapi tiyaj tucui pueblocunapipash, rurashcalla dioscunaman inciensota cushnichingapa, altarcunata rurashpami, paipaj ñaupa taitacunata Mandaj Taita Diostaca ninandapacha fiñachirca.
26Acaz shuti runa tucui imatalla ashtahuan rurashcacunapash, punda punllacuna, jipa punllacuna imatalla rurashcacunapash, Judá llactata, Israel llactata jatun mandajcuna imatalla rurashcacunata quilcashca libropimi tiyajun.
27Acaz shuti runa huañushpa, paipaj ñaupa taitacunahuan tandanajugrijpica, Jerusalén pueblopimi pambarca. Ashtahuangarin Israel llactata jatun mandajcunata pambashcapica, na pambarcachu. Paipaj randica, paipaj churi Ezequiasmi mandajurca.
Who We AreWhat We EelieveWhat We Do
2025 by iamachristian.org,Inc All rights reserved.
