1Ñuca uyajtami, cashna nishpa ninanda caparinajurca: “Cai pueblopi causajcunata huañuchijcunamari chayamushca. Paicunaca, tucuchingapami macanajunacunata apashpa shamunajun” nihuarcami.
2Chai jipallami, janaj punguta yaicuna ñandaca sucta runacuna shamunajujta ricurcani. Chai punguca, janaj esquinamanmi carca. Chai runacunaca, tucuicunami macanajunacunata apashpa shamunajurca. Paicunamanda, shuj runaca lino churajunata churajushcami, quilcaj runapaj tinta churanata cinturaspi apashpa shamujurca. Paicuna yaicushpaca, bronce altarman chayanapimi shayarinajurca.
3Chaipimi, Israelcunapaj Taita Diospaj ninan ushaica, querubín angelcuna tiyajushcamanda llujshishpa, huasi umbralpi tiyarirca. Chaimandami Mandaj Diosca, lino churajunata churajushca quilcaj runapaj, tinta churanata cinturaspi charijuj runata cayarca.
4Mandaj Diosca, chai runataca cashnami nirca: “Jerusalén pueblo chaupita yalishpa, chaipi causajcuna tucui na alicunata rurashcamanda, huacashpa ninanda caparinajuj gentecunapaj frentepi, shuj ricuchinata churagri” nircami.
5Ñuca uyajtami, caishuj runacunatapash cashna nirca: “Cangunapash, chai runata catishpa, chai pueblotallata yalishpa, chaipi causajcunata huañuchigrichi. Cangunaca pitapash na llaquishpami, tucuillata huañuchina canguichi.
6Rucucunata, chairalla viñaicunata, chairalla cuitsacunata, huahuacunata, huarmicunataca, shujtallapash na saquishpami huañuchina canguichi. Ashtahuangarin, frentepi ricunalla cachun churashcacunataca, na tacarinachu canguichi. Ñuca huasipirami, huañuchishpa callarina canguichi” nircami. Shina nijpimi, Diospaj huasi ñaupajpi tiyaj mandaj rucucunamanda callarishpa huañuchinajurca.
7Chai runacunataca cashnatapashmi nirca: “Ñuca huasi patiopi huañuchishpa, Ñuca huasitaca mapayachinguichilla” nircami.
Shina nijpimi paicunaca, chai pueblopi causajcunata huañuchingapa llujshirca.
8Paicuna tucuillata chashna huañuchijpica, ñucallami puchurcani. Chaimandami, alpaman chayajta cumurishpa: “¡Aij, Mandaj Jatun Dioslla! ¿Jerusalenbi causaj puchushca Israelcunataca, ninanda fiñarishpachu tucuillata tucuchigringui?” nishpami caparircani.
9Shina nijpimi, cashna nihuarca: “Israelcunapash, Judá llactapi causajcunapash, na alitallami ruranajushca. Chaimandami, cai llactapica ashtaca huañuicuna tiyashca. Cai pueblopica, na alita rurajcunallami mirashca. Paicunaca: ‘Mandaj Diosca, cai llactataca saquishcami. Mandaj Diosca, na ricujunllu’ ninajurcami.
10Ñucaca, paicunataca napacha llaquishpami, tucuillata huañuchishpa tucuchisha. Paicuna na alita rurashpa causanajushcamandami chashna llaquichisha” nihuarcami.
11Chai jipami, lino churajunata churajushca quilcaj runaca: “Can mandashcataca tucuitami pactachircani” nihuarca.
Who We AreWhat We EelieveWhat We Do
2025 by iamachristian.org,Inc All rights reserved.
