1Mandaj Jatun Diospaj Espiritumi, Ñucapi causajun.
Mandaj Diosmi, Ñucataca agllahuarca.
Ñucataca, llaquilla causajcunaman ali shimicunata villachunmi agllahuarca.
Ninan llaquicunahuan causajcunata yanapachunmi, agllahuarca.
Prezu causajcunaman, cacharichi tucushpa, quishpirinamanda villachunmi agllahuarca.
2Mandaj Dios quishpichina huata chayamushcata,
ñucanchi Taita Dios llaquichina punlla chayamushcata villachunmi cachamuhuarca.
Shinallata, ninan llaquicunahuan causajcunata, yanapashpa cushichichunmi cachamuhuarca.
3Sion pueblopi llaquilla causajcuna, uchufata umapi churanapa randica, coronata churajuchunmi shamurcani.
Shinallata, llaquicunahuan causajcunaman, mishquilla ashnajun cushijuna jambita carangapami shamurcani.
Manllaihuan, llaquilla causajcunamanga, jahualla churajunata churachinshna, cushijuita carangapami shamurcani.
Paicunaca: “Mandaj Dios tarpushca, alipacha quirucunami” ni tucunajungami.
Dios ninanda alicachi tucujuchunmi, chashna ninajunga.
4Ñaupa huatacuna urmachishca pircacunataca, cutinmi shayachinga.
Huasicunata urmachishpa tucuchishcatapash, cutinmi huasichinga.
Pueblocunata tucuchishcatapash, cutinmi alichinajunga.
Chaicunaca, ashtaca huatacunatami, chashna shitai tucushca carca.
5Shuj llactacunamanda runacunami, cangunapaj llamacunataca michinajunga.
Pambacunapi, uva chagracunatapash paicunami tarpunajunga.
6Cangunaca, Mandaj Diospaj sacerdotecuna, ñucanchi Taita Diospajta rurajcunami canguichi.
Shuj llactacunamanda, micunacunatami micunguichi.
Shinallata, juyaillacunata apamushpami cangunataca alicachinajunga.
7Ninanda pingaichi tucushpa, na alicachi tucushpa causashcamandami, paicunaca ashtahuan alicachi tucunga.
Shinamandami, cangunapaj llactacunapica imata japina cashpapash, chaupita yalita japinajunga.
Paicunaca, causaita causaicamanmi cushijushpa causanajunga.
8Mandaj Dios Ñucami, alitalla juyaihuan rurani.
Shuhuacunata, huañuchinataca, napacha ricunayachinichu.
Shinamandami, alitalla rurajcunamanga, ashtahuan ushaita carasha.
Paicunahuanga, tucuita pactachingapami, causaita causaicaman ari nijusha.
9Paicunapaj miraicunataca, tucui llactacunapimi ali rigsinga.
Paicunapaj miraicunaca, maipi cashpapash rijsinallami canga.
Paicunataca, Mandaj Dios bendiciashca miraicuna cajtami yachanga.
10Mandaj Dioshuanmi, ninandapacha cushijusha.
Ñuca Taita Dioshuanmi, tucui shunguhuan cushijusha.
Paica, churajunata churachinshnami quishpichihuarca.
Alitalla ruranatami, jahualla churajunatashna churachihuarca.
Cazaragrijuj huambraman, juyaillaguta churachinshnami churachihuarca.
Cazaragrijuj cuitsaman, juyailla curita churachinshnami churachihuarca.
11Alpapi muyu urmashpa cutin viñashcatashna,
tarpushca pambapi muyu viñashcatashnami,
Mandaj Jatun Diosca, alitalla ruranatapash, alicachi tucunatapash, tucui llactacunapi churanga.
Who We AreWhat We EelieveWhat We Do
2025 by iamachristian.org,Inc All rights reserved.
