DEUTERONOMIO 8 - Quichua Imbabura 2016

Juyailla llactata japinamanda

1Ñuca mandashca shimicunataca pactachishpami causana canguichi. Cangunapaj ñaupa taitacunaman, Mandaj Dios carashapachami nishca llactaman yaicushpa, chaipi ninanda mirashpa, aligutapacha causangapami chashna pactachina canguichi.

2Canda Mandaj Taita Dios, cai chuscu chunga huatacunata, jichushca pambata imashna pushamushcataca yarinami cangui. Paica, canda llaquichishpa yachachingapa, cambaj shungupi imashna yarijujta yachangapa, Pai mandashcacunata pactachijta, na pactachijta ricungapami chashna pushajurca.

3Paica chai pambapi yarjaihuan llaquichishca jipapash, micushpa shinlli tucuchunmi, maná shuti micunata cararca. Cangunapash, cangunapaj ñaupa taitacunapash na rijsishca micunatami cararca. Chaitaca, gentecunaca na tandahuanlla causangachu, ashtahuangarin Mandaj Dios rimashca shimicunahuan causana cajta yachachingapami, chashna cararca.

4Chai chuscu chunga huatapica, canguna churajushcacunapash na tucurircachu, chaquipash na punguircachu.

5Taitaca, paipaj churitaca llaquichishpami aliguta yachachin. Mandaj Taita Diospash, canda juyaimanda chashna llaquichishcataca, cambaj shungupi yarinami cangui.

6Shina cashcamanda, canda Mandaj Taita Dios mandashcacunataca cazushpami, manllaihuan purina cangui.

7Canda Mandaj Taita Diosca, larca yacucunapash, pugyucunapash, ashtaca yacucuna tiyaj, juyailla llactamanmi pushanga. Chai yacucunaca, pambacunapi, urcucunapimi jicharijun.

8Chai llactapica, trigopash, cebadapash, uvacunapash, higocunapash, granadacunapash, olivocunapashmi tiyan. Shinallata aceitepash, balun mishquipashmi tiyan.

9Chai llactapica, tucui micunata charishpami, imapash na illaj causangui. Chai llactapi rumicunapash, jirrucunashna cajpimi, urcucunamandaca cobreta llujchingui.

10Canga, na munangacaman micushpa causashpami, canda Mandaj Taita Diostaca, chai juyailla llactata carashcamanda alicachishpa, cazushpa causana cangui.

Taita Diosta ama cungachun shinlli tacurishcamanda

11Canda Mandaj Taita Diostaca napacha cunganachu canguichi. Pai mandashca shimicunata, cunan ñuca yachachijujta tucuita cazushpa, pactachishpami causana canguichi.

12Micunatapash, tucuitami charinguichi. Ali huasicunatami huasichinguichi.

13Shinallata, huagracunatapash, llamacunatapash ashtacatami mirachinguichi. Culquita, curita, tucui imacunatapash ashtacatami mirachinguichi.

14Shina charishpara, cambaj shungupi jariyashpa, Egipto llactapi gañan causajushcamanda llujchimuj canda Mandaj Taita Diosta cunganguiman.

15Candaca, millai culebracunapash, alacrangunapash junda, manllanai jichushca jatun pambatami pushamurca. Yacupash, na tiyaj pushtuta pushamushpami, yacunayachijpipash, jatun rumimanda yacuta llujchishpa cararca.

16Chai jichushca pambapimi, cambaj ñaupa taitacuna na rijsishca, maná shuti micunata micushpa shinlli tucuchun cararca. Chai jipaca, cambajllata ali cachunmi, can imashna cajta ricungapa llaquichishpa chashna pushamurca.

17Cambaj shungupira: ‘Ñuca ushaihuan, ñuca maquihuan rurashpami, cai tucuitaca charini’ ninguiman.

18Ashtahuangarin, chashna tucuita charichun caraj, canda Mandaj Taita Diostaca, na cungashpami yarina cangui. Paimi, cambaj ñaupa taitacunahuan ari nishpa juramentushcata pactachingapa, ushaita canman carashca. Chaitaca, cunan punllami ricujungui.

19Ashtahuangarin, canda Mandaj Taita Diosta cungashpa, rurashcalla dioscunatara catishpa, alicachishpa causajushpaca, huañuchi tucunguimi nishpami cunanga villajuni.

20Mandaj Diosca, chai llactacunapi causajcunataca huañuchishpami tucuchinga. Shinallatami, canda Mandaj Taita Dios rimashca shimicunata na cazujpica, candapash tucuchinga.