1Tucuita Mandaj Diosca, cai shimicunatami cashna nishpa villahuarca:
2“Tucuita Mandaj Diosca cashnami nin:
‘Sión pueblopi causajcunataca, Ñucapajlla cachunmi munarcani.
Chaimandami, paicunataca fiñajcunataca ninandapacha fiñani’ ninmi” nishpami villahuarca.
3Mandaj Diosca cashnatapashmi nin:
“Sión pueblotaca, Ñucami cutin alichircani.
Shina rurashpami, Jerusalén chaupipi causasha.
Jerusalenga: ‘Pactachij Pueblo’ shutimi canga.
Tucuita Mandaj Diospajlla Sión urcuca:
‘Jucha illaj Urcu’ shutimi canga” ninmi.
4Tucuita Mandaj Diosca cashnatapashmi nin:
“Jerusalén ñangunapica, rucugucunapash, payagucunapash taunahuan purinajungarami.
Paicunaca, unai huatacunata charishpami chashna purinajunga.
5Shinallata, chai pueblo ñangunapica,
jari huahuacunapash, huarmi huahuacunapash, ñan jundami pugllanajunga” ninmi.
6Tucuita Mandaj Diosca, cashnatapashmi nin:
“Chai punllacunapi, huaquin puchushca gentecunaca, chaita ricushpa ninandami manllarinajunga.
Ñuca ricuipipash ¿nachu juyaillagu ricuringa?” ninmi tucuita Mandaj Diosca.
7Tucuita Mandaj Diosca, cashnatapashmi nin:
“Ñuca agllashcacunataca, indi llujshimujman tiyaj llactamandapash,
indi huashajunman tiyaj llactamandapash, Ñucami quishpichisha.
8Shina quishpichishpami, Jerusalenbi causanajuchun pushamusha.
Shinami paicunaca, Ñuca agllashca gentecuna canga.
Ñucapash paicunapaca, na llullaj, tucuita pactachij Taita Diosmi casha” ninmi.
9Tucuita Mandaj Diosca, cashnatapashmi nin:
“Cangunapash, ashtahuan shinlli tucuichi.
Tucuita Mandaj Dios Ñucapaj huasita shayachingapa, callari rumita churai callarishca punllamandapacha,
Ñuca profetacuna villashcataca, cunan punllacunacamanmi uyanajunguichi.
10Punda punllacunapica, imatalla rurashcamandaca na culquita curcachu.
Shinallata, animalcuna imatalla rurashcamandapash na micunata cararcachu.
Fiñajcuna tiyashcamandami, maiman ritapash na ushanajurca.
Ñucami, tucuicunata cumbapurallata llaquichirinajuchun saquircani.
11Ashtahuangarin cunanga, na pundacunashnalla llaquichijuicuna tiyachun saquishachu.
Tucuita Mandaj Dios Ñucami, chashna nini.
12Ashtahuangarin paicunapaca, ali causaimi tiyanga.
Uvacunapash ashtacatami fucunga.
Alpacunapica ashtaca granocunami fucunga.
Jahua pachapash tamiatami cachamunga.
Chai tucui alicunatami, chai gentecunaca charinga.
13Judá llactapi causajcunalla.
Israel llacta gentecunalla.
Cangunaca, shuj llactacunapi causajcuna, na alicachijpimi causarcanguichi.
Cunanga, Ñucami chai llaqui causaita anchuchishpa, ninanda bendiciasha.
Shina cashcamanda, na manllashpa, cangunapash ashtahuan shinlli tucunami canguichi” ninmi.
14Tucuita Mandaj Diosca, cashnatapashmi nin:
“Cangunapaj ñaupa taitacunaca, ninandami fiñachihuarca.
Chaimandami, paicunataca ninanda llaquichinata yarijurcani.
Chashna yarijushcataca, pactachircanimi.
Tucuita Mandaj Dios Ñucami, chashna nini.
15Ashtahuangarin cunan punllacunapica, Jerusalenbi causajcunamambash,
Judá llactapi causajcunamambash, alita ruranatami yarijurcani.
Shina cashcamanda, na manllanachu canguichi.
16Cangunaca, caicunatami rurana canguichi:
Caishujmanda, chaishujmanda na llullashpami parlana canguichi.
Tandanajuna pungucunapi, ima llaquita alichina cashpapash,
aliguta ricushpa, ali causaita charingapami, alichina canguichi.
17Cangunapurapi, pitapash llaquichinataca napacha yarinachu canguichi.
Llullashpa juramentunatapash, napacha juyanachu canguichi.
Ñucaca, tucui chaicunataca fiñanipachami” ninmi Mandaj Diosca.
18Tucuita Mandaj Diosca, cashnatapashmi nihuarca:
19“Tucuita Mandaj Dios Ñucaca, cashnami nini:
‘Judá llactapi causajcunalla,
canguna, chuscu quillapi, picha quillapi, canchis quillapi, chunga quillapi, na micushpa mañanaca, ninan cushijuimi canga.
Jatun cushijuita rurana punllacunami tucunga.
Shina cashcamanda, alitalla ruranata, ali causanata juyashpa causaichi’ ninimi” nishpami villahuarca.
20Tucuita Mandaj Diosca, cashnatapashmi nin:
“Ashtaca pueblocunamanda,
ashtaca llactacunamanda causajcunami shamunajunga.
21Shuj pueblocunapi causajcunaca, caishuj pueblopi causajcunapajman shamushpami, cashna ninajunga:
‘Ñucanchihuan ali cachun, Mandaj Diosta jacuchi mañashunchi.
Jacuchi, tucuita Mandaj Diosta mascashunchi’ ninajungami.
Shina nijpimi caishujcunaca: ‘Ñucapash, cangunahuanmi ringapa munapani’ ninajunga.
22Shina nishpami ashtaca gentecunapash, ninan ushaita charij llactacunapi causajcunapash,
tucuita Mandaj Dios Ñucataca, Jerusalenbi mascangapa shamunajunga.
Mandaj Diosta Ñucataca, alita rurapai nishpa mañangapami shamunajunga” ninmi.
23Tucuita Mandaj Diosca cashnatapashmi nin:
“Chai punllacunapica, cashnami tucunga:
Shuj llactacunamanda, shuj rimaita rimaj chunga runacunami,
Judá llactamanda runapaj jahualla churajushcapi charirishpa, cashna ninajunga:
‘Ñucanchipashmi, cangunahuan ringapa munapanchi.
Taita Diosca, cangunahuan cajtami yachapanchi’ ninajungami” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
