1Chashna nijujpimi, Temán llactamanda Elifaz shuti runaca, cashna nirca:
2“Canga, ñucanchi rimajpica fiñaringuimi.
Shina cajpipash, ¿pita upalla saquiringayari?
3Canga, tucuicunatami yachachin carcangui,
Imata ruraita na ushajpipash, canmi shinllichij carcangui.
4Nitijanshna pandajcunatapash, aliguta rimashpami alichin carcangui.
Llaquicunahuan na ushanajujpipash, canmi shinllichij carcangui.
5Cunanga, canda llaqui japijpica ashtahuanmi llaquirijungui.
Llaquicuna canda japijpica, ninandami musparijungui.
6¿Nachu canga, Taita Diosta manllashpa causan carcangui?
¿Nachu ima pandatapash na rurashpa causaj carcangui?
7Cunanga, aliguta yuyari.
Ima alitapash ruraj runaca, ¿maijambash huañushcachu?
Alitalla rurashpa causajcunaca, ¿maipita llaquichi tucushca?
8Ashtahuangarin, na alita rurashpa causajcunatami, llaquichi tucunajujta ricushcani.
Na alita rurajcunaca, chaitallatami chasquinata charin.
9Taita Diospaj samaita quichujpillami huañunajun.
Pai fiñarishpa llaquichijpillami huañunga.
10León ninanda huacanshna caparijpipash tucuchingallami.
Huahua leongunapaj quirucuna faquirinshnami tucuringa.
11Rucu leonga, micuna aicha na tiyajpimi huañun.
Micuna illajpimi, mama leonbaj huahuacunapash, caita chaita rinajun.
12Chaitaca, ñucapash na ali yacharcanichu.
Ashtahuangarin, ashagutallami uyai pactarcani.
13Tuta muscuipishnami, yuyaipilla ricurcani.
Ninan puñui japimujpimi chashna ricurcani.
14Ñucapajman ninan manllai shamushpami chujchuchihuarca.
Shinamandami, shungu junda manllarircani.
15Ñuca ñaupajmanmi huaira fucunshna shuj aya huajtamurca, ninanda manllarishpami, chiriyaita chiriyarcani.
16Ñuca ñaupajpimi, aya shayarirca.
Paipaj ñavitaca, na ricui usharcanichu.
Shina cajpipash, cashna nijtallami uyarcani:
17‘¿Runaca, Taita Diospaj ñaupajpica, jucha illaj ricuringachu?
¿Runaca, paita ruraj Diostapash yali jucha illajchu canga?
18Diosca, Paipajta ruraj angelcunatapash, na tucuita chasquinllachu.
Paipaj angelcunapash, shinlli shungu cajtami ricurca.
19¡Cai pachapi causaj runacunatacarin, ¿imashnata chasquingayari?
Paicunaca, ñutu alpapilla huasichishcashna, polilla jurucunashnami tucuchi tucunga!
20Paicunaca, tutamandaca ali cashpapash, chishimanga tucuchi tucungallami.
Ima tucunatapash, pipash na villajpillata, chingaita chinganllami.
21Paicuna juyailla cashcapash, ¿nachu ñapash chingangalla?
Imatapash na ali yachajushpallatami huañunajun’ nijtami uyarcani.
Who We AreWhat We EelieveWhat We Do
2025 by iamachristian.org,Inc All rights reserved.
