PROVERBIOS 19 - Quichua Imbabura 2016

1Huajcha cashpapash, aliguta causanami ashtahuan ali.

Muspa runashna, jatun na alita rimashpa causanapaj randica.

2Imatapash na yachajushpa causanaca, napacha alichu.

Imatapash musparishpa rurashpaca, juchapi urmanallami.

3Juizu illaj runaca, tucui causaipimi pandarin.

Chaimandaca, Mandaj Diostami fiñashpa causan.

4Charij cajpica, ashtaca cumbacunami tiyan.

Ashtahuangarin, imagutapash na charijpica, paipaj cumbapash saquinllami.

5Yangamanda juchachishpa villaj runaca, llaquichi tucungami.

Llullashpa villaj runapash, chashnallatami llaquichi tucunga.

6Na mitsashpa caraj runataca, taucacunami yanapachun mascan.

Chashna carajlla runahuanga, pipash cumba tucungallami.

7Huajcha runagutaca, paipaj huauquicunapash millanayachinmi.

¡Paipaj cumbacunacarin, saquishpa rinllami!

Paihuanga pipash parlangapallapash na munanllu.

8Ali yuyaita charij runaca, paipaj causaita juyanmi.

Ali yuyaihuan causaj runaca, ima alitapash japingallami.

9Yangamanda juchachishpa villaj runaca, llaquichi tucungami.

Llullashpa villaj runapash huañungapachami.

10Juizu illaj runara, tucuita charinaca na alichu.

¡Gañan runara, mandajcunapaj mandaj canacarin, napacha alichu!

11Ali yuyaihuan causaj runaca, fiñarishpapash jarcarinmi.

Fiñachijpipash, upallamanda yalij runami, alicachi tucun.

12Jatun mandaj fiñarishpaca, león huacanshnami manllachin.

Pai ima alita rurashpaca, jihuapi jamzi tamia urmashcashna alimi.

13Juizu illaj churica, taitata llaquichishpallami causan.

Fiñarishpa rimajunlla huarmipash, tamia yacu huasipi shutujujshnami.

14Huasitapash, culquitapash, taita mamami caran.

Ashtahuangarin Mandaj Diosca, ali yuyaita charij huarmigutami caran.

15Imatapash rurangapa na munaj runaca, puñushca sirinllami.

Chashna imatapash na rurashpami, micunapash illaj causan.

16Mandashcata pactachij runaca, paipaj causaitami juyan.

Ashtahuangarin, paipaj causaita yangapi churaj runaca, huañungapachami.

17Huajchacunaman imagutapash mañachishpaca,

Mandaj Diosman mañachishcashnami.

Chashna alita rurashcamandaca, Diosllatami paimambash tigrachinga.

18Cambaj huahuataca, uchillamandami astishpa yachachina cangui.

Shina cashpapash, huañuchina yuyaihuanga na astinachu cangui.

19Ninanda fiñarij runaca, llaquichi tucungami.

Chai na ali runata yanapangapa munajpica, ashtahuanmi llaquichinga.

20Ali tucuchun, ali yuyaita cushcataca, chasquinami cangui.

Chaicunata yachajushpami, rucuyashpapash aliguta causangui.

21Runacunaca, imatapash ruranatami yarishpa causanajun,

Shina cajpipash, Mandaj Dios munashcallami pactanga.

22Juyaihuan shujcunata llaquij runa cajpica, tucuicunami cushijun.

Llullaj runa cangapa randica, huajcha canami ashtahuan ali.

23Mandaj Diosta manllashpa causajcunaca, ali causaitami charinga.

Paihuan causashpaca, ima na alipash illajmi causanga.

24Imatapash na rurangapa munaj runaca,

micunata shimiman churangapapash quillanayachinmi.

25Na cazushpa asij runata astijpica,

na yachajushca runapashmi cazunata yachajunga.

Ali yuyaita charij runata, ali tucuchun rimajpica ashtahuanmi yachajunga.

26Taitata imatapash shuhuan churi,

mamata huasimanda calpachij churica,

pingaitapash na charij, na alipachami.

27Ñuca huahualla,

ali yuyaicunata cushcata na chasquishpaca,

ali yachaicunapash illajmi causangui.

28Yangamanda juchachij runaca, alita rurajpipash asishpami ricun.

Diosta na manllajcunaca, na alita rurashcataca pacashpa na villanllu.

29Na cazushpa asijcunata llaquichina punllacunaca chayamungapachami.

Shinlli shungu runacunata astina punllacunapash chayamungapachami.