JOSUÉ 10 - Quichua Imbabura 2016

Amorreo gentecunata mishashcamanda

1Jerusalenda jatun mandaj Adonisedec shuti runaca, Hai shuti pueblota, Josue tucuchishcatami yacharca. (Jericó pueblota imashna tucuchishcashnallata, Hai shuti pueblotapash, chaipi jatun mandajtapash tucuchishcatami yacharca). Shinallata Gabaón shuti pueblopi causajcunapash, Israelcunahuan ali causaita charingapa ari ninajushpa, Israelcunahuan causanajujtapashmi yacharca.

2Shina yachashpami, ninanda manllarca. Gabaón puebloca, jatun mandajcuna causana puebloshnalla, Hai shuti pueblota yali jatunmi carca. Chai pueblopi causaj tucui runacunapash, ninan shinllicunami carca.

3Chaita yachashpami, Jerusalén pueblota jatun mandaj Adonisedec shuti runaca: Hebrón shuti pueblota jatun mandaj Hoham shuti runata, Jarmut shuti pueblota jatun mandaj Piream shuti runata, Laquis shuti pueblota jatun mandaj Jafía shuti runata, Eglón shuti pueblota jatun mandaj Debir shuti runata, cashna nishpa cayachun cacharca:

4“Gabaón pueblopi causajcunahuan macanajushpa, ñucata yanapangapa vichai shamupaichi. Paicunaca, aliguta casilla causangapami, Josuehuambash, Israelcunahuambash ari ninajushca” nishpami cacharca.

5Chaimandami, Jerusalén pueblota mandaj, Hebrón shuti pueblota mandaj, Jarmut shuti pueblota mandaj, Laquis shuti pueblota mandaj, Eglón shuti pueblota mandaj, amorreo gente picha jatun mandajcuna tandanajurca. Shina tandanajushpami, chai mandajcunaca, macanajunata ali yachaj runacunandi, Gabaón puebloman vichai rishpa, chai puebloman chayanallapi carpacunata shayachishpa, chai pueblopi causajcunahuan macanajunajurca.

6Chaimandami, Gabaón pueblopi causajcunaca, Gilgal puebloman chayanallapi carpacunata shayachishpa tiyajuj Josueman cashna nishpa villachun cacharca: “Cambajta rurajcunata yanapanataca, ama na nipaichu. Ñucanchita yanapashpa macanajungapa ucha vichai shamupai. Jahua urcucunapi causaj amorreo gentecunata tucuilla jatun mandajcunami, tandanajushpa ñucanchihuan macanajungapa urai shamushca” nishpa villachunmi cacharca.

7Chashna villajpimi Josueca, Gilgal pueblomanda vichai rirca. Macanajunata ali yachaj tucuilla runacunapash, tucuilla shinlli runacunapashmi paihuan rinajurca.

8Mandaj Diosca, Josuetaca cashnami nirca: “Paicunataca, na manllanachu cangui. Ñucami, paicunataca cambaj maquipi churarcani. Paicunaca, pipash na canhuan macanajui ushangachu” nircami.

9Josueca, Gilgal pueblomanda tucui tuta vichai rishpami, cungashcapi chayagrirca.

10Mandaj Diosca, amorreo gentecunamanga Israelcunata ninanda manllana yuyaitami curca. Chaimandami Israelcunaca, Gabaón pueblopica ashtacatapacha huañuchirca. Pacajushpa rijcunataca, Bet-horón shuti puebloman vichai rina ñanda catishpami, Azeca shuti, Maceda shuti pueblocunacaman catishpa huañuchinajurca.

11Israelcunata pacajushpa, Bet-horón shuti pueblomanda, Azeca shuti pueblocaman ura calpanajujpimi, Mandaj Diosca jahua pachamanda rumicunata paicunapaj jahuapi urmachimurca. Shina urmachimushpaca, Israelcuna espadahuan huañuchishcatapash yalitami, chai rundu rumicunahuanga huañuchirca.

12Shinamandami amorreo gentecunata, Israelcunapaj maquipi Mandaj Dios churashca punllapica, Josueca, Mandaj Diosta alicachishpa, Israelcunapaj ñaupajpi cashna nijurca:

“Indi taitalla, Gabaón pueblo vichaipilla shayaripai.

Luna mamapash, Ajalón shuti pugru pamba vichaipilla shayaripai” nijurcami.

13Shina nijpimi indipash, lunapash shayarirca.

Israelcunata fiñajcuna llaquichishcashna, paicunatapash llaquichingacamanmi chashna shayarirca.

Indica, jahua pacha chaupipi shayarishpami, shuj punllatashna saquirishpa, na huashajurca. Chashna tucushcataca, ¿nachu Jaser shuti quilcapi villajun?

14Chai punllashnaca punda punllacunapash, jipa punllacunapash na tiyarcachu. Shuj runa mañashcata uyashpallami, Mandaj Diosca chashna rurarca. Chai punllapica Mandaj Diosmi, Israelcunamandaca macanajurca.

15Chai jipaca Josueca, Gilgal pueblopi carpacunaman tigrarcallami. Tucui Israelcunapashmi, paihuan tigrarca.

16Chai picha jatun mandajcunaca calpashpami, Maceda shuti puebloman chayanapi tiyaj shuj utujupi pacajunajurca.

17Chai picha jatun mandajcunataca, Maceda shuti pueblopi tiyaj shuj utujupi pacajushcata tarishcatami, Josueman villanajurca.

18Shina villajpimi, Josueca cashna nirca: “Jatun rumicunata tangashpa, chai utujuman yaicunata vichagrichi. Chaipi paicunata ricuriachumbash, runacunata churaichi.

19Cangunaca, na chaipilla saquirinachu canguichi. Ashtahuangarin, cangunata fiñajcunata catishpa ringuichilla. Shina catishpaca, pueblocunaman yaicuchunga na saquishpami, huañuchina canguichi. Cangunata Mandaj Taita Diosmi, paicunataca cangunapaj maquipi churarca” nircami.

20Josuehuan, Israelcunahuan, amorreo gentecunata huañuchishpa tucuchi punllapica, paicunapuramanda causaj saquirishcacunaca, muyundi pircashca pueblocunapimi pacajungapa rinajurca.

21Chai jipami Israelcunaca, shujllapash na huañushpa, na imapash tucushpallata, Maceda shuti puebloman chayanapi shayachishca carpacunaman, Josuepajman tigramurca. Chai punllapica, Israelcunataca, pipash imatallapash na rimai usharcachu.

22Chai jipami Josueca, chai picha jatun mandajcunata utujumanda llujchimugrichun cacharca.

23Josué mandashcashnami Israelcunaca, Jerusalén, Hebrón, Jarmut, Laquis, Eglón shuti pueblocunapaj picha jatun mandajcunataca, utujumanda llujchimurca.

24Chai mandajcunata Josuepajman pushamujpimi Josueca, tucuilla Israelcunata, paihuan shamushca macanajuj runacunata mandajcunata cayashpa cashna nirca: “Caiman quimirishpa, cai mandajcunapaj cungapi saruichi” nirca. Shina nijpimi paicuna quimirishpaca, chai jatun mandajcunapaj cungapi sarunajurca.

25Chaipimi Josueca cashna nirca: “Cangunaca manllashpa, na huashaman tigranachu canguichi. Ashtahuangarin shinlli tucushpa, na manllajcunami cana canguichi. Cangunata fiñashpa macanajungapa shamujcunataca, Mandaj Diosca chashnami ruranga” nircami.

26Chai jipami Josueca, chai mandajcunataca huañuchirca. Chashna huañuchishpaca, picha caspicunapi huarcujpimi, amsayangacaman chaipi huarcuriyanajurca.

27Ña indi huashajugrijujpimi Josueca, chai huañushcacunataca caspimanda uriajuchishpa, paicuna pacajushpa tiyanajushca utujupillata shitachun cacharca. Chaipi shitashpami, chai utujuman yaicunataca jatun rumicunahuan vicharca. Chai rumicunaca, cunan punllacamanmi shinallata tiyanajun.

28Josueca chai punllallatami, Maceda shuti pueblota mishashpa quichurca. Shina mishashpami, chaipi causajcunatapash, chai pueblota jatun mandajtapash, espadahuan huañuchirca. Chai pueblopica, causaita tucui charijcunatami, shujllatapash na saquishpa tucuillata tucuchirca. Maceda shuti pueblota jatun mandajtapash, Jericó pueblota jatun mandajtashnami huañuchirca.

29Maceda shuti pueblomandaca, tucui Israelcunandimi Josueca, Libna shuti puebloman yalirca. Chai pueblopi causajcunahuambashmi macanajurca.

30Mandaj Diosca, chai pueblotapash, chaipi jatun mandajtapashmi, Israelcunapaj maquipi churarca. Chaimandami Israelcunaca, chai pueblopi causajcunataca shujllatapash na saquishpa, causaita tucui charijcunataca, espadahuan huañuchinajurca. Chai Libna shuti pueblota jatun mandajtapash, Jericó pueblota mandajtashnami huañuchirca.

31Josueca, Libna shuti pueblomandaca, tucui Israelcunandimi, Laquis shuti puebloman yalirca. Chai puebloman chayanapi carpacunata shayachishpami, chaipi causajcunahuan macanajurca.

32Chai Laquis pueblotapash, Israelcunapaj maquipi Mandaj Dios churajpimi, cayandi punllapica chai pueblotaca mishashpa quichurca. Shina mishashpami chaipi causajcunataca, espadahuan huañuchinajurca. Causaita tucui charijcunataca, Libna shuti pueblopi huañuchishcashnami huañuchinajurca.

33Gezer shuti pueblota jatun mandaj Horam shuti runaca, Laquis shuti pueblopi causajcunata yanapangapami vichai rirca. Ashtahuangarin paitapash, macanajunata ali yachaj runacunatapashmi Josueca, shujllatapash na saquishpa tucuchirca.

34Josueca, Laquis shuti pueblomandaca tucui Israelcunandimi, Eglón shuti puebloman yalirca. Chai puebloman chayanallapi carpacunata shayachishpami, chaipi causajcunahuan macanajurca.

35Chaimandami chai pueblotapash, chai punllallata mishashpa, chaipi causajcunataca espadahuan huañuchinajurca. Chai punllapica, Laquis shuti pueblopi causajcunata huañuchishcashnami, causaita tucui charijcunata huañuchinajurca.

36Chai jipami Josueca, tucui Israelcunandi, Eglón shuti pueblomanda Hebrón shuti puebloman vichai rishpa, chaipi causajcunahuan macanajurca.

37Hebrón shuti pueblotapash mishashpa quichushpami, paicunata jatun mandajtapash, pai mandajushca caishuj pueblocunapi causajcunatapash, causaita tucui charijcunataca, shujllatapash na saquishpa espadahuan huañuchinajurca. Chaipi causajcunatapash, Eglón shuti pueblopi causajcunata huañuchishcashnami, causaita tucui charijcunataca tucuillata huañuchinajurca.

38Chai jipami Josueca, tucui Israelcunandi tigrashpa, Debir shuti puebloman chayarca. Chaiman chayashpami, chaipi causajcunahuan macanajurca.

39Chai pueblotapash mishashpami, paicunata jatun mandajtapash, chai pueblocunapi causajcunatapash, espadahuan huañuchinajurca. Causaita tucui charijcunataca, shujllatapash na saquishpami huañuchinajurca. Hebrón shuti pueblopi, Libna shuti pueblopi causajcunatapash, paicunata jatun mandajta huañuchishcashnami, Debir shuti pueblopi causajcunatapash, paicunata jatun mandajtapash huañuchinajurca.

40Josueca, urcucunapi tiyaj tucui llactacunapimi tucuillata huañuchijurca. Neguev shuti pambapi, jatun pambacunapi, urcu vichaicunapi causajcunatapash, paicunata jatun mandajcunatapash, shujllatapash na saquishpami, huañuchirca. Israelcunata Mandaj Taita Dios mandashcashnami, causaita tucui charijcunataca huañuchirca.

41Cades-barnea shuti pueblomanda callarishpaca, Gaza shuti pueblocaman, Gosén shuti llactamandapash, Gabaón shuti pueblocamanmi, Josueca huañuchishpa tucuchirca.

42Tucui cai jatun mandajcunataca, paicuna mandanajuj llactacunandimi Josueca, shuj cutin macanajuipillami tucuillata mishashpa japirca. Israelcunata Mandaj Taita Dios, Israelcunamanda macanajujpimi chashna misharca.

43Chai jipami Josueca, tucui Israelcunandi, Gilgal shuti puebloman chayanallapi paicunapaj carpacunaman tigranajurca.