2 CRÓNICAS 16 - Quichua Imbabura 2016

Asa shuti runahuan, Ben-adad shuti runahuanmi tandanajushca(1 Rey. 15:16-22)

1Jatun mandaj Asa shuti runa, quimsa chunga sucta huatata mandajujpimi, Israel llactata jatun mandaj Baasa shuti runaca, Judá llactapi causajcunahuan macanajungapa vichai shamurca. Shina shamushpaca, Judá llactata jatun mandaj Asa shuti runapajmanda, pipash ama llujshichun, pipash ama yaicuchunmi, Ramá shuti pueblo muyunditaca, ashtahuan shinlli jatun pircata rurarca.

2Chaimandami, Judá llactata jatun mandaj Asa shuti runaca, Mandaj Diospaj huasipi, mandana huasipi imalla alichishca tiyajuj culquita, curita llujchirca. Chaicunataca, Siria llactata jatun mandaj Ben-adad runaman cuchunmi, Damasco puebloman cashna nishpa cacharca:

3“Ñuca taitahuan, cambaj taitahuan ari ninajushcashnalla, ñucanchipash tandanajupashun. Israel llactata jatun mandaj Baasa shuti runahuan ari ninajushcataca, yangapi churashpa, can ñucahuan tandanajujpi, Baasa shuti runa ñucata saquishpa richunmi, culquita, curita canman cachamupani” nircami.

4Ben-adad shuti runaca, jatun mandaj Asa shuti runa mañashcata ari nishpami, Israel llacta pueblocunapi causajcunahuan macanajuchun, macanajuj runacunata mandajcunata cacharca. Paicunami, Ijón, Dan, Abel-maim shuti pueblocunatapash, Neftalí ayllupi imalla tiyashcacunata alichina pueblocunatapash quichurca.

5Chaita yachashpami Baasa shuti runaca, Ramá shuti pueblopi imata rurajushcatapash saquishpa rirca.

6Chaimandami jatun mandaj Asa shuti runaca, Judá llactapi causajcunandi rishpa, Ramá shuti pueblopi Baasa shuti runa shayachijushca rumicunata, caspicunata tucuillata aparca. Chaicunahuanga, Geba shuti, Mizpa shuti pueblocunatami shayachirca.

7Chai punllacunami, Hanani shuti profeta runaca, Judá llactata jatun mandaj Asa shuti runapajman shamushpa, cashna nijurca: “Canga, canda Mandaj Taita Diosta mañangapa randica, Siria llactata jatun mandajtarami yanapahuai nishpa mañashcangui. Chaimandami Siria llactata jatun mandajpaj macanajuj runacunaca, cambaj maquimanda quishpirishpa rishca.

8Etiopía shuti, Libia shuti llactacunamanda runacunaca, macanajuna carretacunandi, caballopi tiyarij macanajuj runacunandica, ¿nachu ashtacapacha carca? Shina cajpipash, Mandaj Diosta mañashcamandami, paicunataca cambaj maquipi churarca.

9Mandaj Diosca, Paita cazujcunaman alita rurashpa, tucui ushaita ricuchingapami, tucuita ricuriajun. Canga, juizu illajshnami chashna rurashcangui. Shina cashcamandami, cunanmandaca, canhuan macanajungapaca ashtahuan shamunajunga” nijurcami.

10Shina nijpimi Asa shuti runaca, ninandapacha fiñarishpa, Diosmanda villajtaca, prezuna huasipi churarca. Asa shuti runaca, chai huatacunapimi, Judá llactapi causajcunataca ninanda llaquichijurca.

Asa shuti runa huañushcamanda(1 Rey. 15:23-24)

11Asa shuti runa, punda punllacuna, jipa punllacuna imatalla rurashcapash, Judá llactata, Israel llactata jatun mandajcuna imatalla rurashcacunata quilcashca libropimi tiyajun.

12Asa shuti runaca, quimsa chunga iscun huatata ña mandajujpimi, chaqui nanai japijpi huañunalla tucurca. Shina cashpapash, Mandaj Diostaca na mascashpami, jambijcunatalla mascajurca.

13Asa shuti runaca, chuscu chunga shuj huatata mandajushpami, huañushpa paipaj ñaupa taitacunahuan tandanajugrirca.

14Pai huañujpica, Davidpaj pueblopi, paita pambachun rurachishca utujupimi churarca. Paita churashca cajapica, alipacha yachajcuna rurashca, shuj shuj mishquilla ashnajuncunatami jundachinajurca. Shinallata, chai punllapica, paita alicachishpami ninata japichishpa ninanda rupachinajurca.