1Judá llactata jatun mandaj Josafat shuti runaca, Jerusalenbi tiyaj paipaj huasimanga ima llaquipash na japijpimi tigrarca.
2Paitaca, Jehú shuti profetami tuparingapa llujshirca. Jehú shuti runaca, Hanani shuti runapaj churimi carca. Paimi, jatun mandaj Josafat runataca, cashna nijurca: “¿Mandaj Diosta na manllaj, Diosta na ricunayachij runatachu juyashpa yanapajungui? Shina rurashcamandami, Mandaj Diosca, canhuanga ninandapacha fiñarishca.
3Shina cajpipash, cai llactapi Asera shuti huarmi diosman rijchajta anchuchishpa, cambaj tucui shunguhuan, Taita Diosta mascashpa, can alita rurashcatami ricushca” nijurcami.
Josafat shuti runa, juezcunata churashcamanda4Josafat shuti runaca, Jerusalenbimi causajurca. Shina cashpapash, Beerseba shuti pueblomandapacha, Efraín urcu alpacunacamanmi ricushpa purijun carca. Shina purijushpami, paicunapaj ñaupa taitacunata Mandaj Taita Diospajman tigrarichun yachachijurca.
5Shinallata, Judá llactapi tiyaj, muyundi pircacunahuan jarcashca pueblocunapimi juezcunata churarca.
6Chai juezcunataca, cashnami nijurca: “Cangunaca, na yanga runacunapaj randi mandanajushpa, ashtahuangarin Mandaj Diospajta ruranajushpami, imata cashpapash aliguta rurana canguichi. Aliguta ricushpa mandanajujpimi, Taita Diosca cangunahuan pacta canga.
7Cangunaca, Mandaj Diosta manllashpami causana canguichi. Ñucanchita Mandaj Taita Diospaca, ali cashcatalla na ruranapash, ñavita ricushpalla chasquinapash, carashcacunata pacalla japinapash napacha tiyajpimi, imata cashpapash aliguta yarishpa rurana canguichi” nijurcami.
8Josafat runaca, Mandaj Dios mandashcashna, aliguta ricushpa mandanajuchunmi, Jerusalenbica huaquin levitacunatapash, sacerdotecunatapash, Israelcunapaj ayllucunata mandaj taitacunatapash churarca. Chai jipami, Jerusalenman tigranajurca.
9Paicunataca, cashna nishpami mandarca: “Mandaj Diosta manllashpa, na llullashpa, tucui shunguhuan cazushpami, alitalla rurana canguichi.
10Caishuj pueblocunapi causanajuj cangunapaj huauquicuna: Huañuchishcamanda, tucui mandashca shimicunata pactachinamanda tapungapa shamujpica, Mandaj Diospaj ñaupajpi ama juchata rurashpa fiñachinajuchunmi shinllita tacurishpa yachachina cangui. Chashna rurashpami, na ashtahuan juchata rurashpa catinguichi.
11Mandaj Diospajta tucui imatalla ruranapica, Amarías shuti sacerdotemi tucuita ricushpa mandajunga. Jatun mandajpajta imatalla ruranapica, Judá ayllumanda Ismaelpaj mirai Zebadías shuti runami ricushpa mandajunga. Levitacunapashmi, Diospajta ruranajunga. Canguna imata ruranatapash, shinlli tucushpa ruranajujpimi, Mandaj Diosca cangunahuan pacta canga” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
