1Mandaj Diosca, cashnami nin:
“Israelcunalla, Ñucapajman tigramungapa munashpaca, tucui shunguhuanmi tigrarimuna canguichi.
Rurashca dioscunatapash saquishpami tigrarimuna canguichi.
Na chingashca causanachu canguichi.
2Shina rurashpami, Mandaj Diospaj shutipi tucuita aliguta rurashpa pactachinguichi.
Chashna rurajpimi, cai alpapi tucui llactacunata bendiciasha.
Shinallata, tucui gentecunami Ñucata alicachinajunga” ninmi.
3Mandaj Diosca, Judá llactapi Jerusalén pueblopi causajcunatapash cashnami nin:
“Alpataca, aligutami yapuna canguichi.
Casha chaupicunapica, na tarpunachu canguichi.
4Judá llactapi, Jerusalén pueblopi causanajuj runacunalla.
Cangunaca, tucui shungumi llaquirishpa, Mandaj Diosman tigrarina canguichi.
Canguna na alita rurashcamanda, ninandapacha Ñuca ama fiñarichunmi, chashna rurana canguichi.
Ñuca ninanda fiñarishcataca, pipash na anchuchi ushangachu.
Judá llactata llaquichina cashcamanda5Judá llactapi, Jerusalén pueblopi causajcunaman cashna nishpa villaichi:
‘Trompetata huacachishpa, tucuicuna tandanajushpa cashna nishpa villaichi:
Tucuicuna tandanajushpa, jatun pircacunata charij pueblocunaman yaicushunchi nigrichiyari’ nishpa villaichi.
6Sion shuti pueblopica, banderata churaichi.
Na shuyashpa pacajungapa calpaichi.
Janaj llactamandami, ninan llaquita cachamugrini.
Chaica, jatun llaquimi canga.
7Ninanda sachayashca ucumandaca, leonmari vichai shamujun.
Llactacunata tucuchingapami, ñanda shamujun.
Cangunapaj llactata tucuchingapami, pai causajushca pushtumandaca ña llujshimushca.
Cangunapaj pueblopica shuj gentellapash na saquiringachu” ninmi.
8Shina cashcamanda cañamuta churajushpa, ninandapacha llaquirishpa huacaichiyari.
Mandaj Diosmi ñucanchitaca ninanda fiñarishpa tucuchigrijun.
9Mandaj Diosca, cashnatapashmi nin:
“Chai llaqui punllacunapica, jatun mandajpaj shungupash,
cati mandajcunapaj shungupash, ña huañungashnami tucunga.
Sacerdotecunapash, manllarishpami musparinajunga.
Profetacunapash, manllarishpami ricunajunga” ninmi.
10Shina nijpimi, cashna nircani: “¡Aij, aij, Mandaj Dioslla!
Judá llactapi, Jerusalenbi causanajuj cai gentecunataca:
‘Ali causaita charinguichimi’ nishpaca, umachitamari ninanda umachishcangui.
Cunanga, espadahuan ña huañuchinajuchunllami shuyanajun” nircanimi.
11Chai punllacuna chayajpica, Judá llactapi, Jerusalén pueblopi causajcunataca, cashnami ninga:
“Ñuca agllashca gentecunapaj pueblota tucuchingapaca,
chaquishca pambatami ninan huaira shamushpa llaquichishpa tucuchinga.
12Chai huairatapash yali ashtahuan shinlli huairami ñucapajman shamunga.
Cunanga, Ñucami paicunataca ninanda llaquichigrini” ningami.
13Fiñaj runacunaca, acapanashna calpaj carretacunapimi, fuyu shamujshna, vichai chayamunga.
Paicunapaj caballocunapash, jatun angatapash yalimi ninanda calpanajunga.
¡Aij ñucanchilla, ima charishcatapash quichui tucuchunmi paicunapaj maquipi churashca!
14Jerusalenbi causajcunalla, quishpiringapaca cangunapaj shungu mapayashcata maillarichiyari.
Cangunaca, ¿ima punllacamanda na alitalla rurashpa causagringuichi?
15Dan shuti llactamandapachami llaqui tiyashcataca caparishpa villangapa shamujun.
Shinallata ninan llaqui tiyashcataca, Efraín urcumandapachami uyarimujta caparinajun.
16Shuj llactacunapipash, cashna villaichi:
“Caita uyachunga, Jerusalenbipash villaichi:
‘Macanajuj runacunami, caru llactamanda shamunajun.
Judá llacta pueblocunapi causajcunata tucuchingapaca, ninanda caparishpami shamunajun’ ninmi” nichiyari.
17Mandaj Diosca, cashnatapashmi nin:
“Cangunallata Ñucata na cazushcamandami, chagrata ricushpa tiyajcunashnalla, pueblo muyundipi chapanajun.
18Canguna na cazushpa causashcamandami, cai llaquicunataca apanguichi.
Jatun na alita rurashpa causashcamandami, ninan llaquitapacha apanguichi” ninmi.
19¡Aij ninandapachami ñuca shunguta nanahuan!
Ñuca shungutapash fitirinshnami nanahuan.
Ñuca shunguca, ninandapachami fahuajun.
Jatun macanajui callaringapa trompetata huacachij uyarijpica,
Napacha upalla saquirishachu.
20Llaquicunaca, cati cati shamunami uyarin.
Cai llactapi tucui ima tiyashcami tucuilla tucurijun.
Pueblopi huasicunapash, tucuillami tucurishca.
Ñuca causana huasicunapash tucuillami tucurishca.
21¿Ima punllacamanda bandera shayajundaca ricuna cani?
¿Trompetata huacachishcatapash, ima punllacamanda uyana cani?
22“Ñuca agllashcacunaca, Ñucatapash na rijsij, uyangapapash na munajcunami.
Ñuca huahuacunaca, imatapash na yachaj, juizu illajcunami.
Na alita rurangapaca, alipacha yachajushcacunami.
Ashtahuangarin alita ruranataca, napacha yachajurcachu” ningami.
23Cai pachata ricujpica, tucuilla tucuchishca, imapash illajmi ricurirca.
Jahua pachata ricujpipash, ima punchayachijpash illajmi ricurirca.
24Urcucunata ricujpipash, ninanda cuyunajujmi ricurirca.
Lomacunapash, tucuillami tucurishca carca.
25Cai pacha muyundita ricujpipash, shuj runallapash na ricurircachu.
Jahuata rij alasyu animalcunapash, tucuicunami illarca.
26Ali fucuj pambacunata ricujpipash, jichushca pambacunallami ricurirca.
Mandaj Diosca, ninandapacha fiñashpami, tucuilla pueblocunatapash, llaquinayaita tucuchishca carca.
27Mandaj Diosca, cashnami nirca:
“Tucui llactacunatami, ninandapacha llaquichisha.
Shina cashpapash, na tucuilla tucuchishachu.
28Chashna cajpimi, cai pachapica ninan llaquicuna tiyanga.
Jahua pachapash yanayangami.
Chaitaca, Ñucallatami chashna rurashapachami, nishpa yarijurcani.
Chaita ruranataca, napacha cungashpami pactachisha” nircami.
29Caballopi tiyarishca macanajuj runacunapash,
flechacunahuan macanajuj runacunapash, ninanda caparishpami shamunajurca.
Chaita uyashpami, pueblopi causajcunaca tucuicuna pacajungapa calpanajurca.
Paicunaca, sachacunapi, jaca rumi huashacunapimi pacajungapa calpanajurca.
Shina calpajpimi, tucuilla pueblocuna jichushca saquirirca.
30Chashna tucuilla tucuchi tucushpaca, ¿imatashi rurangui?
Juyailla pucalla churajunata churajushcapash,
juyailla curicunata huatarishcapash,
cambaj ñavita juyaillaguta alichirishcapash, yangallatami canga.
Cambaj juyashcacunaca, fiñashpami huañuchingapa mascanajunga.
31Punda churita ungugrijuj huarmishna, ninanda caparijujtami uyarcani.
Sion pueblopi causajcunami, maquita vichai churashpa, ninanda caparishpa cashna nishpa huacanajun:
“¡Aij ñucalla, cunanga imachari tucusha!
Huañuchij runacuna shamushpami, ñuca causaita tucuchigrinajun” nishpami caparinajun.
Who We AreWhat We EelieveWhat We Do
2025 by iamachristian.org,Inc All rights reserved.
