LEVÍTICO 17 - Quichua Imbabura 2016

Diospajlla huasimandami villajun

1Mandaj Diosca, Moisestaca cashnami nijurca:

2“Aarondapash, paipaj churicunatapash, tucui Israelcunatapash, Mandaj Diosca cashnami mandashca nishpa villangui:

3‘Israelpuramanda maijan cashpapash, huagrata, maltun llamata, chivotami, cangunapaj carpacunapillata, na cashpaca, carpacunamanda canllaman llujchishpa cungata cuchushpa huañuchinga.

4Chashna rurashpapash, Ñucahuan tuparina jatun carpa ñaupajpi, Mandaj Dios Ñucapajman ofrendata na apamushpaca, yangata huañuchishpa yahuarta jichashcamandami, llaquichi tucunga. Shinamandami chai runaca, Israelpuramanda calpachi tucunga.

5Mandaj Dios Ñucahuan tuparina jatun carpa ñaupajman, sacerdotepajman na apamushpa, pambacunapi animalcunata huañuchij Israelcunamanmi cashna nishca. Shinallata Mandaj Dioshuan ali cangapa, animalta cushpa huañuchinajuchunmi, chashna nishca.

6Chai animalpaj yahuartaca, sacerdotemi Dioshuan tuparina jatun carpa pungupi, Mandaj Diospaj altar jahuapi tsirapachinga. Virataca, Mandaj Diospaj ñaupajpi mishquilla ashnajuchunmi rupachijunga.

7Shinami canguna huañuchina animalcunataca, cutinga napacha ayacunaman cushpa huañuchinguichi. Chaicunata rurashpami cangunaca pandarishpa causarcanguichi. Cai mandashcataca, cangunapaj tucui causaipimi pactachishpa catina canguichi’ ningui” nircami.

8Shinallata cashnatapash ningui: “Israelpuramanda maijan cashpapash, na cashpaca shuj llactamanda shamushpa, cangunahuan causanajuj cashpapash, animalta cushpami tucuillata rupachinga. Na cashpaca animalta cushpami huañuchinga.

9Shina huañuchishpapash, Mandaj Diosman cuchun, Dioshuan tuparina jatun carpa punguman na apamushpaca, chai runapash Israelpuramandaca chashnallatami calpachi tucunga” ningui.

Yahuartaca na micunachu nishcamanda

10“Israelpuramanda cashpa, shuj llactamanda shamushca cashpapash, ima yahuartapash micuj runataca, ninanda fiñashpami Israelpuramandaca anchuchisha.

11Cai pachapica tucuicunami, yahuarta charishpa causanajun. Yahuartaca, juchata anchuchijuchun cangunapaj causaimanda cushpa, altarpi rupachinajuchunmi curcani. Chai yahuarllatami, runapaj juchacunataca anchuchinga.

12Chaimandami Israelcunataca cashna nircani: ‘Cangunapuramandaca, maijambash na yahuarta micungachu. Shinallata, caru llactamanda shamushpa causajcunapash, yahuartaca na micungachu’ nircanimi.

13Israelpuramanda maijan cashpapash, shuj llactamanda shamushpa, paicunahuan causanajuj gentecuna cashpapash, micuna animalta cashpa, alasyu animalta cashpapash huañuchishpa, yahuarta jichashpaca, alpahuanmi quilpanga.

14Tucui causajcunami yahuarta charishpa causanajun. Shinamandami, Israelcunataca cashna nircani: ‘Tucui causajcuna, yahuarta charishpa causanajushcamandami, aichata micushpapash, yahuartaca na micuna canguichi. Yahuarta maijambash micushpaca, Israelpuramanda calpachi tucungami’ nircanimi.

15‘Shinallata, Israelpuramanda maijan cashpapash, shuj llactamanda shamushpa, paicunahuan causanajuj gentecuna cashpapash, huañushca animalpaj aichata, na cashpaca millai animal fitishpa huañuchishca aichata micushpaca, pai churajushcacunata tajshashpa, paipash armachun’ ninimi. Shina rurashpapash paica, tutayangacamanmi mapa canga. Chai jipami mapa illaj saquiringa.

16Ashtahuangarin, pai churajushcata na tajshashpa, paipash na armashpaca, paipaj juchamandami llaquita apanga ningui” nijurcami.