1Pipaj urmajta rurashpa, Josepaj huahuacunaman cujpica, indi llujshimujman, Jericó pueblo, Jordán yacumandami callarijurca. Jericó pueblomanda jichushca pambaman vichai rishpaca, Bet-el shuti pueblo lomacamanmi urmarca.
2Bet-el shuti pueblomandaca, Luz shuti pueblota yalishpami, arquita gentecunapaj llactata yalishpa, Atarot shuti pueblocaman chayajun.
3Shinallata, indi huashajunman catishpaca jafletita gentecunapaj llactaman urai rishpa, Bet-horón shuti pueblo ura manñata yalishpa, Gezer shuti pueblocamanmi carca. Chaimandaca, mama cuchacamanmi chayajun.
4Josepaj churi Manasespaj, Efrainbaj miraicunaca, cai alpacunatami paicunapaj cachun japinajurca.
5Efrainbaj mirai ayllucuna imashna cashcashnallata, indi llujshimujman paicunapaj cachun japina alpa mujunga, caicunami: Atarot-adar shuti pueblomanda callarishpaca Bet-horón shuti jahua pueblocamanmi carca.
6Chaimanda catishpaca, mama cuchacaman rishpami, janajman tiyaj Micmetat shuti pueblocaman chayajun. Chaimandaca, indi llujshimujta muyushpami, Taanat-silo shuti pueblocaman chayajun. Chaimandaca, Janoa shuti pueblotami yalijun.
7Janoa shuti pueblomandaca, Atarot shuti, Naarat shuti pueblocunaman chayanacaman urai rishpami, Jericó pueblohuan tuparishpaca, Jordán yacuman llujshijun.
8Tapúa shuti pueblomandaca, mama cucha manñaman tigrashpami, Caná shuti yacuta yalishpa, mama cuchamanllata chayajun. Efrainbaj mirai ayllucuna, imashna cashcashnallata japina alpacunaca, chaicunami carca.
9Shinallata, Manasespaj miraicunaman cushca alpa chaupicunapipash, Efrainbaj miraicunaman cungapaca huaquin pueblocunata muyundi uchilla pueblocunandi shicanyachishca tiyarcarami.
10Shina cajpipash Efrainbaj miraicunaca, Gezer shuti pueblopi causanajuj cananeo gentecunataca, na llujchishpa cacharcachu. Chaimandami, cananeo gentecunaca paicunapaj gañanguna tucushpa, cunangaman paicunahuan causanajun.
Who We AreWhat We EelieveWhat We Do
2025 by iamachristian.org,Inc All rights reserved.
