1 CORINTIOS 11 - Quichua Imbabura 2016

1Cristota ñuca imashnami catijuni, chashnallatami cangunapash ñucata catina canguichi.

Huarmicuna imashna alichirina cashcamanda

2Juyashca crijcuna, cangunaman ñuca yachachishcataca na cungashpa catinajujpimi, ninandapacha alicachini.

3Shinallata, caitapash yachachunmi munani: Cristomi, jaricunataca umashna mandajun. Cusaca, huarmitami umashna mandajun. Taita Diosca, Cristotami umashna mandajun.

4Shina cajpimi jaricunaca, Diosta mañangapapash, Taita Diosmanda villangapapash umataca na taparina. Maijambash chaita na cazushpa umata taparishpaca paita mandaj Cristotami fiñachijun.

5Shinallata, maijan huarmipash Diosta mañangapa, na cashpaca Taita Diosmanda villangapa, umata na quilparishpaca, paipaj cusa umashna mandajujtami na cazujun. Chashna cashpami, uma ajchata tucuilla rutushcashna ricurijun.

6Maijan huarmipash, umata na quilparingapa munashpaca, ajchata tucuilla ruturichun ninimi. Chaita pinganayana cajpica, umata quilparichun ninimi.

7Jarica, na umata taparinachu. Paica Diosman, rijchajta rurashca cashpami, Taita Dios ninan ushaita charij cashcata ricuchijun. Ashtahuangarin, cusa ali cashcatami huarmica ricuchijun.

8Jaritaca, na huarmimanda llujchircachu. Ashtahuangarin, huarmitami, jarimanda llujchirca.

9Shinallata jaritaca, na huarmi tiyajpi, paipaj rurarcachu. Ashtahuangarin, huarmitami, jari tiyajpi, paipaj rurarca.

10Shina cashcamandami huarmica, angelcunapash ricunajujpi, paipaj umataca quilparina.

11Ashtahuangarin crijcunapaca, jaripash huarmi tiyashcamandami causajun, huarmipash jari tiyashcamandami causajun.

12Huarmitaca, jarimanda llujchishpami rurashca. Shinallata, jaripash, huarmimandami miranajun. Shina cajpipash, tucui imatapash Taita Diosmi churashca.

13Cangunallata ricuichilla: ¿Huarmica umata na quilparishpa Taita Diosta mañanachu ali canga?

14Ñucanchi causaipica, jaricuna ajchata viñachinaca, ¿nachu pingaipaj ricurin?

15Ashtahuangarin huarmicunaca ajchata viñanachishpami ninanda alicachi tucunga. Huarmicunamanmi, Taita Diosca quilparina fachapaj randi ajchata cararca.

16Ñuca cashna nishcata fiñashpa tigrachingapa munajtaca cashnami nini: Ñucanchipurapipash, Taita Diospajlla tandanajuj crijpurapipash, chaicunataca na ruraj cashpami chashna nijuni.

Apunchi Jesús huañushcata yarishpa micunatapash pandatami rurashca

17Ashtahuangarin cangunata alicachishpaca na quilcamujunichu. Cangunaca, alita rurangapa randica, na alitapacha rurangapami tandanajunguichi.

18Crijcunapura, Diosta yaringapa tandanajushpapash, “fiñanajushpami shicanyarinajun” nijtami uyani. Chashna nijtaca ashataca crinimi.

19Maijan ali crij cashcata ricungapaca, cangunapurapica caishuj chaishuj shicanyarinaca tiyangallatami.

20Chashna cajpimi, Apunchi Jesús huañushcata yarishpa micungapa tandanajushcapash yangallata tucushca.

21Imata micungapa apashcatapash, na shuyashpami micushcanguichi. Shina rurashpami, huaquingunaca yarjaihuan, shujcunaca machashca tiyanajushcanguichi.

22¿Nachu cangunapaj huasipillata micunalla, ufianalla carcanguichi? ¿Taita Diospajlla tandanajushca crijcunatapash yangapi churashpachu, imagupash illajcunatapash pingaichinajunguichi? Cangunataca, ¿imata nina cani? ¿Cangunataca alicachishachu? Chashna ruranajujtaca napacha alicachinichu.

Apunchi Jesús huañushcata yarishpa micuchunmi callarichishca(Mat. 26:26-29; Mar. 14:22-25; Luc. 22:14-20)

23Apunchi Jesús ñucaman mingashcatami, cangunaman yachachircani. Apunchi Jesusca, Paita huañuchijcunaman japi tucuna tutami tandata japirca.

24Chai tandamanda, Diosta pashi nishpami chaupishpa, cashna nirca: “Japishpa micuichi, caica, cangunapaj ali cachun chaupirina Ñuca cuerpomi. Ñucata yarishpa, cashnata rurashpa catinguichilla” nircami.

25Ña micushca jipaca, copatapash japishpami cashna nirca: “Cai vino copaca, Ñuca yahuarmi. Chaihuanmi Diosca, shuj mushujta ari nishca. Cashna ufianajushpaca, Ñucata yarishpa ufianguichilla” nircami.

26Shinamandami, cai tandata micunajushpa, cai copamanda ufianajushpaca, Apunchi Jesús huañushcataca, Pai tigramungacaman villana canguichi.

Jesús huañushcata yarishpa micunataca, na ali shunguhuanga na micunachu

27Maijan cashpapash, cai tandata na ali shunguhuan micushpa, cai copamanda na ali shunguhuan ufiashpaca, Apunchi Jesuspaj cuerpota, yahuarta na alicachishpami juchata ruran.

28Shinamandami, tandata nara micushpallata, copamanda vinota nara ufiashpallata, tucui canguna imashna causanajushcataca, aliguta yarina canguichi.

29Ashtahuangarin, Apunchi Jesuspaj cuerpo cashcata, Paipaj yahuar cashcata, na ali shunguhuan micushpa ufiashpaca, cangunallata ninanda llaquichi tucungapami chashna ruranguichi.

30Shinamandami huaquingunaca huañunajunguichi. Shujcunaca irquiyashcami canguichi. Ashtahuan shujcunacarin ñami huañushca.

31Ñucanchillata imashna causajushcata yarishpa ali tucushpaca, na chashna llaquichi tucunchimanllu.

32Ashtahuangarin, Apunchi Jesusca, na crijcunahuan ama ninan llaquiman cachangapami, na ali cajta ricushpa ñucanchitaca chashna llaquichijun.

33Shina cashcamandami, ñuca juyashca crijcuna, Apunchi Jesús huañushcata yarishpa micungapaca tucuicuna tandanajuchun shuyanara canguichi.

34Maijambash yarjachijlla cashpaca, huasipillata micushpami shamuna canguichi. Tandanajushca crijcunata ama llaquichingapami chashna rurana canguichi. Imapash shuj alichinacuna tiyajpica, ñuca shamushpami alichisha.