1“Jatun mandajca, Absalón huañushcamandami ninandapacha llaquirishpa huacajun” nishpami, Joab runaman villanajurca.
2Shinamandami chai punllapica, macanajuita mishashcamanda tucuilla pueblo cushijunapaj randica, jatun llaquiman tigrarca. “Jatun mandajca, paipaj churi huañushcamandami, ninanda llaquirishpa huacajun” nijtami, macanajuj runacunaca uyashca carca.
3Chaimandami macanajuj runacunaca chai punllapica, Jerusalén puebloman pacalla yaicunajurca. Macanajuipi mishai tucushpa, pingai tucushcashnami, paicunaca llaquilla yaicunajurca.
4Ashtahuangarin jatun mandajca, paipaj ñavita quilparishpami, ninanda caparishpa: “¡Absalón, ñuca huahualla, Absalón, ñuca huahualla, ñuca huahualla!” nishpa huacajurca.
5Chaimandami Joab runaca, jatun mandajpaj huasiman shamushpa, cashna nijurca:
“Cunanga, cambajta rurajcunataca, tucuicunatami ninanda pingaichishcangui. Cambaj causaitapash, cambaj churicunapaj, ushicunapaj causaitapash, cambaj huarmicunapaj causaitapash, cambaj caishuj huarmicunapaj causaitapash quishpichishca cajpitami, cashna rurashcangui.
6Canda ninanda fiñajcunatara juyashpa, canda ninanda juyajcunataca fiñashpami, can churashca mandajcunatapash, cambajta rurajcunatapash cunanga, yangapi churashcata ricuchijungui. Absalón causajpi ñucanchica tucuilla huañushca cajpirapashmi, cushijushca canguiman carca. Chaitaca, cunanmi alipacha ricuni.
7Cunanga, canllaman llujshishpa, cambajta rurajcunataca imallatapash nishpa cushichigri. Mandaj Diospaj shutipi juramentushpami, cashna nini: Imatallapash ningapa na llujshijpica, cunan tutallatami tucuicuna saquishpa ringa. Chashna tucujpica, huambramandapacha cunangaman apajushca llaquicunatapash ashtahuan yali llaquicunatami apangui” nijurcami.
8Shina nijpi rishpami, jatun mandajca puebloman yaicuna pungupi tiyarigrirca. Chaitami, tucui gentecuna yachaj chayarca: “Ricuichi jatun mandajca, puebloman yaicuna pungupimi tiyajun” nijpimi, tucui gentecuna jatun mandajpaj ñaupajman shamunajurca. Ashtahuangarin Israelcunaca, paicunapaj carpacunamanmi pacajushpa rishca carca.
9Shinallata tucui gentecunami, Israel ayllupurapica, cashna ninajurca: “Jatun mandaj Davidca, ñucanchita fiñajcunapaj maquimandapash, filisteocunapaj maquimandapashmi quishpichirca. Shina cashpapash cunanga, Absalonda manllashpami, caimandaca llujshishpa rishca.
10Absalondaca, ñucanchita jatun mandaj cachunmi, agllashpa churarcanchi. Paica, jatun macanajuipimi huañushca. ¿Cunanga, imashpata jatun mandaj Davidtaca, na tigrachimushpa upalla shuyanajunchilla?” ninajurcami.
11Chaimandami jatun mandaj Davidca, Sadoc shuti, Abiatar shuti sacerdotecunata cashna nishpa cacharca: “Judá llactata mandaj rucucunata, cashna nigrichi: ‘Jatun mandajta, pai mandashpa tiyarina huasiman tigrachimunataca, ¿imashpata cangunara na ucha yaringuichi? Ashtahuangarin Israelcunarami, paipaj huasiman tigrachishun nishpa ñucapajman shamushca.
12Cangunaca, ñuca huauquicuna, ñuca ayllucunapachami canguichi. Shina cashpapash, jatun mandajta huasiman tigrachimunataca, ¿imashpata cangunara na ucha yaringuichi?’ nigrichi.
13Shinallata, Amasa shuti runatapash, cashna ninguichi: ‘¿Nachu cambash, ñuca ayllupacha cangui? Shina cashcamanda macanajuj runacunata mandashpa, ñuca ñaupajpi causajuchun Joab runapaj randi canda na churajpica, Taita Diosllata ñucataca ninandapacha llaquichihuachun ninmi’ ninguichi” nishpami cacharca.
14Shina cachajpimi, Judá llactapi causanajuj runacunaca, shujllashnalla tucui shungupacha yarinajurca. Shina cashpami: “Cambash, cambajta rurajcunapash tigramuilla” nishpa villachun, jatun mandajpajman tigra cachanajurca.
15Shina nijpi jatun mandaj tigramushpami, Jordán yacu manñaman chayamurca. Shinallata, Judá llactamanda runacunapashmi, Jordán yacuta chimbachingapa, Gilgal shuti pueblopi tuparij shamunajurca.
16Bahurim shuti pueblopi causaj Benjamín ayllupuramanda, Gera shuti runapaj churi Simei shuti runapashmi, Judá llactamanda runacunandi, jatun mandaj Davidta chasquingapa, urai shamujurca.
17Paihuanga, Benjamín ayllumanda, huaranga runacunapashmi shamunajurca. Shinallata, Saulpaj huasi ucupurapajta ruraj Siba shuti runapash, paipaj chunga picha churicunandi, paipajta ruraj ishcai chunga runacunandimi shamunajurca. Paicunaca, jatun mandajta ñaupashpami, Jordán yacuta chimbanajurca.
18Paicunaca, yacuta chimbai ushanallata ña chimbashpami, jatun mandajpaj huasi ucupuratapash, chimbachinajurca. Pai munashcata pactachingapami chashna rurajurca. Jordán yacuta ña chimbashca jipami, Gera shuti runapaj churi Simei shuti runaca, jatun mandajpaj ñaupajpi cungurishpa,
19jatun mandajtaca cashna nirca:
“Ñucata mandajlla, jatun na alita ñuca rurashcamandaca, ama llaquichihuanguichu. Ñucata jatun mandajlla. Jerusalenmanda rijui punllapi, na alicunata ñuca rurashcataca, yaritapash ama yaripanguichu. Can jatun mandajpaj shungupica, ama alichishpa charipanguichu.
20Cambajta ruraj ñuca chashna juchata rurashcamandaca llaquiripanimi. Chaimandami cunanga, Josepaj miraipuramandaca, ñucata jatun mandajta chasquingapaca, ñucara punda shamuparcani” nircami.
21Shina nijpimi, Sarvia shuti huarmipaj churi Abisai shuti runaca, cashna nirca:
“Mandaj Dios agllashpa churashca jatun mandajta ninanda na alicachishpa rimashcamandaca, cai Simei shuti runaca, ¿nachu huañunapacha canga?” nirca.
22Shina nijpimi Davidca, cashna nirca:
“Sarvia shuti huarmipaj churicunalla, canguna ñucata fiñachunga, ¿imatata rurarcaniyari? Israelpuramandaca, shujllapash cunanga na huañungachu. Cunanga, Israelcunata jatun mandaj cashcataca ¿Nachu yachani?” nircami.
23Shina nishca jipami jatun mandajca, Simei shuti runataca:
“Napacha huañunguichu” nishpa juramenturca.
24Shinallata, Saulpaj mirai Mefi-boset shuti runapashmi, jatun mandajta tuparingapa urai shamurca. Paica, Jerusalenmanda jatun mandaj llujshishpa rishca punllamandapacha, imapash na tucushpa aliguta cutin tigramuna punllacamanmi, paipaj chaquitapash na maillashca, barbastapash na anchuchishca, paipaj churajunatallapash na tajshashca shuyajushca carca.
25Jatun mandajta Jerusalenbi tuparingapa shamujpimi, jatun mandajca:
“Mefi-boset, ¿imashpata na ñucahuan rircangui?” nishpa tapurca.
26Shina tapujpimi Mefi-boset runaca, cashna nirca:
“Jatun mandajlla, ñucapajta ruraj runami umachihuarca. ‘Cambajta ruraj ñucaca, janga cashpami burrupi tiyarishpa, jatun mandajhuan tuparingapa risha yashpa, tiyarinata burrupi churapai’ nircani.
27Ashtahuangarin paimi, cambajta ruraj ñucataca, can jatun mandajman llullashpa villashca. Ashtahuangarin, can jatun mandajca, Taita Diospaj angelshna cashcamanda, cambaj ima ali cana cajpipash rurapailla.
28Ñuca taitapaj huasi ucupuracunaca, tucuicunami can jatun mandajpaj ñaupajpi huañuchi tucunapacha carcanchi. Shina cajpipash, cambajta ruraj ñucataca, canhuan pacta micuchunmi churahuarcangui. Cunanga, can jatun mandajtaca, imata ashtahuan mañaitapash na ushapanichu” nircami.
29Shina nijpimi jatun mandajca, cashna nirca:
“Imatapash ashtahuanga ama nihuaichu. Canhuan, Siba shuti runahuanga, alpacunata chaupirichunmi ña mandarcani” nircami.
30Shina nijpimi Mefi-boset shuti runaca, jatun mandajtaca cashna nirca:
“Alpacunataca, tucuillata pai japichun saquipailla. Ñuca jatun mandajca, imapash na tucushpami aliguta huasiman tigramupashcangui” nirca.
31Shinallata Galaad llactapi tiyajuj Rogelim shuti pueblomanda, Barzilai shuti runapash shamushpami, jatun mandajhuan Jordán yacuta chimbamurca. Paica, Jordán chimbapi cayacaman ningapami chimbamurca.
32Barzilai shuti runaca, pusaj chunga huatata charishpami, ña rucugu carca. Paica, ninan charij cashcamandami, Mahanaim shuti pueblopi cashpa, jatun mandajpaj ima illajpipash carashpa yanapaj carca.
33Chaimandami jatun mandajca, Barzilai shuti runataca:
“Ñucahuan Jerusalenman jaculla. Candaca, ñucami yanapashpa charisha” nirca.
34Ashtahuangarin Barzilai shuti runaca, jatun mandajtaca cashnami nijurca:
“Jatun mandajhuan Jerusalenman vichai ringapaca, ¿mashna huatatashi ashtahuan causai ushapasha?
35Cunanga, ña pusaj chunga huatatami charini. ¿Ima ali cajtapash, ima na ali cajtapash yachai ushashachu imashi? Cambajta ruraj ñucaca, ¿ima micunata cashpapash, ufianata cashpapash, mishquilla cajta yachai ushapashachu? ¿Jaricuna, huarmicuna candashcatapash uyai ushashachu imashi? Cambajta ruraj ñucaca, imapata can jatun mandajta ashtahuan llaquichishpa causangapaca ripashayari.
36Cambajta ruraj ñucaca, Jordán yacuta chimbashpaca, ashagutallami can jatun mandajhuanga ri ushapasha. ¿Imashpata can jatun mandajca, imapash jatun alicunata randi carasha nihuanguiyari?
37Cambajta ruraj ñucataca, ñuca causajushca pueblopillata huañushpa, ñuca taitata, ñuca mamata pambashca utujupillata pambachun, tigrangapa saquihuailla nipanimi. Ashtahuangarin cambajta ruraj Quimam shuti runagumi caipi capan. Can jatun mandajhuan pai rijpica, ima ali cana cajpipash, paiman rurapanguilla” nijurcami.
38Shina nijpimi jatun mandajca, cashna nirca:
“Shina cashpaca Quimam shuti runaca, ñucahuan shamuchunlla. Paihuanga, cambaj ima ali cana cajpipash, rurashallami. Shinallata, can imata rurapai nijpipash, ñucaca tucuita rurashallami” nirca.
39Shina nishca jipami, tucuilla macanajuj runacunaca Jordán yacuta chimbanajurca. Shinallata, jatun mandajpash, Jordán yacuta ña chimbashca jipaca, Barzilai shuti runaguta muchashpa cayacaman nishpa bendiciajpimi, paipaj huasiman tigrarca.
40Shinami jatun mandajca, Gilgal puebloman rirca. Jatun mandajtaca, Quimam shuti runapash, Judá llactamanda tucui gentecunapash, tucui Israelcunamandaca chaupimi cumbashpa rinajurca.
41Jatun mandajpajman, tucui Israelcuna shamushpami, cashna ninajurca:
“¿Imashpata Judá llactamanda ñucanchi huauquicunaca, can jatun mandaj Davidtapash, cambaj huasi ucupuracunatapash, tucuilla cambajta rurajcunatapash Jordán yacuta chimbachishpa pusharca?” ninajurcami.
42Shina nijpimi, Judá llactamanda tucuilla runacunaca, tucui Israelcunata cashna ninajurca:
“Jatun mandajca ñucanchi ayllullatamari. Ashtahuangarin, ¿imashpata cangunaca chaimandalla fiñaringuichi? Ñucanchica jatun mandaj carashcataca, ¿imatata micurcanchi? ¿Paica, imatallapash ñucanchiman carashcachu?” ninajurca.
43Shina nijpimi Israelcunaca, Judá llactamanda runacunataca cashna ninajurca:
“Ñucanchimi, chunga ayllu cashcamanda, jatun mandaj cachun churanata charinchi. Davidpaj ayllumandapash, ñucanchimi ashtahuan yalicuna canchi. ¿Imashpata ñucanchitaca, yangapi churanguichi? ¿Nachu jatun mandajta caiman tigrachimungapaca, ñucanchira punda parlanajurcanchi?” ninajurcami.
Judá llactamanda runacunami, Israelcunataca ashtahuan yalishpa shinllita rimanajurca.
Who We AreWhat We EelieveWhat We Do
2025 by iamachristian.org,Inc All rights reserved.
