ISAÍAS 34 - Quichua Imbabura 2016

Llactacunapi causajcunahuan, Mandaj Dios ninanda fiñarishcamanda

1Tucui llactacunapi causajcuna, tandanajushpa uyangapa shamuichi ninimi.

Tucui gentecunami, ali uyana canguichi.

Cai alpa pachapash, llactacunapash, chaipi imalla tiyajcunapash, ali uyaichi.

2Mandaj Diosca, tucui llactacunapi causajcunahuan,

chai llactapaj macanajuj runacunahuanmi, ninanda fiñarishca.

Paicunataca, huañuchij runapaj maquipi churashpami tucuchinga.

3Chai huañushcacunata shitashpa saquijpimi, ninanda ashnanga.

Paicunapaj yahuarca, urcucunatami urai jicharijunga.

4Jahua pachapi tucui ima tiyashcacunapash, tucuillami tucuringa.

Jahua pachaca, fangacunata pillujpishnami tucuringa.

Chaipi punchayachishpa tiyajcunaca, uva yuramanda, higo yuramanda fangacuna urmajshnami tucuringa.

5Edom llactata tucuchingapaca, jahua pachamandami Ñuca espadahuan urai shamusha.

Ñucata napacha alicachij gentecunata tucuchingapami shamusha.

6Mandaj Diospaj espadaca, maltun llamacunata, jari chivocunata huañuchishpa,

yahuarsapa, virasapa tucushcashnami saquirishca.

Shinallata, jari llamacunapaj riñon virapi javirishcashnami saquirishca.

Mandaj Diosca, Bosra shuti pueblopipash, Edom shuti llactapipash llaquichishpami, chashna rurashca.

7Paicunahuanga, búfalo animalcunapash, huagracunapash, shicucunapashmi, huañuchi tucunajunga.

Chaimandami paicunapaj llactaca, yahuarsapa tucunga.

Paicunapaj alpapipash, virami jicharinga.

8Mandaj Dios fiñarishpa llaquichina punllami chayamugrin.

Sionbi causajcunata llaquichishcamanda, chashnallata llaquichina huatami chayamugrijun.

9Jatun larca yacucunapash, yanamanmi tigranga.

Ñutu alpapash, azufremanmi tigranga.

Tucui alpami, rupajujlla ninaman tigranga.

10Tutapash, punllapash na huañushpa rupajujpimi,

cushnica causaita causaicaman vichai rijunga.

Causaita causaicamanmi, jichushca saquiringa.

Chai alpacunataca, napacha pipash ashtahuan yalingachu.

11Pelícano, erizo, chushij, cuervo animalcunami chaipica causanga.

Mandaj Diosmi chai llactataca chashna llaquichishpa tucuchinga.

12Mandajcunatapash, mandana llacta illajcunami canguichi, ninajungami.

Jatun tucushpa purijcunapash, yangallami tucunga.

13Paicuna mandanajushca huasicunapipash, cashacunami jundanga.

Torrecunapica, tsinicuna, sacha jihuacunami jundanga.

Chaipica, chacal animalcuna causanami tucunga.

Canlla patiocunaca, avestruz animalcunapaj huahuacuna causanami canga.

14Jichushca pambacunapi causaj animalcunami,

hiena shuti animalcunahuan chapurishca purinajunga.

Sachapi causaj huarmi chivopash, paipaj cumbata mascashpami, huacashpa purijunga.

Chushijpash, chaipillatami causajunga.

Chaipica, aligutami causanajunga.

15Chaipimi chushijpash tazinda rurashpa, lulunda ugllashpa, huahuacunata charinga.

Chai huahuacunataca, alas ucupimi charinga.

Jatun angacunapash, chaipimi paicunapaj huarmi angacunahuan tucuilla causanajunga.

16Mandaj Dios quilcashcataca, alimi ricuna canguichi.

¿Chaipica imapash illanllu? Aligutami quilca catina canguichi.

Jaricunapash, huarmicunapash, tucui animalcunami chaipi carca.

Paipaj shimihuan rimashpami, paipaj Espirituhuanllata chaiman tandachirca.

17Diosllatami, paicuna maipi causachumbash churarca.

Paicunapash, jipa miraicunapash chaipimi causaita causanga.