2 TIMOTEO 1 - Quichua Imbabura 2016

“Alillachu capangui” nishcami

1Taita Dios munajpi, Apunchi Jesucristo agllashca apóstol Pablomi cani. Jesucristota crishcamanda, Paihuan causagrinatami ñucanchica shuyanajunchi.

2Ñuca juyashca churishna Timoteo: “Ñucanchi Taita Diospash, Apunchi Jesucristopash, juyashpa, llaquishpa, ali causaiguta carachun” ninimi.

Cristomandaca villajunguilla nishcami

3Ñaupa ñuca taitacuna, ali yuyaihuan Taita Diospajta ruranajushcashnami ñucapash rurajuni. Candaca na cungashpami, tutapash, punllapash Taita Diostaca “pashi” nishpa mañajunilla.

4Can huacajushcata yarishpami, ñavi ñavi ricushpa ninanda cushijungapa munani.

5Canga, na nij tucushpalla, aligutapacha crishpa catijushcatami yarijuni. Pundaca, Loida shuti cambaj mamapaj mamapash, Eunice shuti cambaj mamapashmi alipacha crijcuna carca. Cambash paicunashnallata alipacha crij cashcatami yachani.

6Chaimandami, Taita Dios carashca ushaitaca, ninata ashtahuan japichijshna charina cangui. Chaitaca, ñuca maquita cambaj umapi churajpimi chasquircangui.

7Taita Diosca, manllaihuan causana espiritutaca na cushcachu. Ashtahuangarin, ninan ushaihuan, juyaihuan, aliguta causana espiritutami cushca.

8Shinamandami, ñucanchi Apunchi Jesusmandaca, na pinganayachishpa villana cangui. Shinallata, Paimanda ñuca villajushpa prezu tiyajujpipash na pingai tucushpami, Taita Dios ushaita carajpi, quishpirinamanda villashpa llaquicunataca apajunalla cangui.

9Taita Diosmi ñucanchitaca, Paipajlla causachun agllashpa quishpichirca. Imatapash alita ñucanchi rurashcamandaca na quishpichircachu. Ashtahuangarin, Taita Dios munashcamandallami, cai pachatapash nara rurashpallata, Cristo Jesusmanda, pundallata ña juyajushpa quishpichirca.

10Chai ninan juyaitaca, ñucanchi Quishpichij Jesucristo shamushpami, huañuitapash mishashpa, ali villashcata uyajcunamanga, na tucurinalla causaita curca.

11Shinamandami ñucataca, tucui na Israelcunaman Jesusmanda villachun, apóstol cachun, yachachij cachumbash agllahuarca.

12Chashna cashpami, llaquicunata apajushpapash, Jesusta ñuca crishcata yachashpa, na pinganayachishpa cai llaquitaca apajunilla. Shinallata, Diospajta rurashcamanda ñucaman cuna cashcata, tucurimui punllacaman, Paipaj ushaihuan alichishpa charijujtaca yachanipachami.

13Canman, ñuca yachachishca shimicunataca ama cungashpa catijunguilla. Shinallata, Cristo Jesusta crij cashcamandami, Paita crishpa, Paita juyashpa causana cangui ninimi.

14Dios mingashcataca, jucha Illaj Diospaj Espiritupaj ushaihuan aliguta pactachishpa catingui ninimi.

15Asia llactamanda tucui crijcuna saquishpa rijpimi, Figelopash, Hermogenespash, ñucataca saquishpa rirca, chaitaca canllata alimi yachangui.

16Onesíforo huauquitaca, paipaj huasipi causajcunandi, Taita Dios llaquishpa charichunmi munani. Cadenacunahuan huatai tucushca ñuca tiyajujpica, paimi na pinganayachishpa ricuj shamuriyashpa cushichihuarca.

17Roma puebloman shamushpaca, taringacamanmi mascahuarca.

18Jatun Dios llaquichina punllapica, Apunchi Jesús ninanda llaquichunmi munani. Éfeso pueblopi, ñucanchita pai ninanda yanapashcataca canllata alimi yachangui.