LEVÍTICO 26 - Quichua Imbabura 2016

Taita Diospaj bendicionda chasquinamanda(Deut. 7:12-24; 28:1-14)

1Cangunaca, rurashcalla dioscunatapash, llagllashpa rurashca dioscunatapash na charinachu canguichi. Shinallata, diosmi nishpa imata rurashcatapash, rumi dioscunatapash, cangunapaj llactapi alicachingapaca na shayachinachu canguichi. Ñucami cangunata Mandaj Taita Dios cani.

2Samana, Ñuca punllacunataca pactachinami canguichi. Ñucapajlla huasitapash, manllaihuan aligutami charina canguichi. Ñucami Mandaj Dios cani.

3Ñuca mandashca shimicunapi ima nijujta, tucuita pactachishpa causajpica,

4Ñucami tamiachina punllapillata tamiachimusha. Alpa mamapash granocunata fucuchishpa catijungallami. Shinallata, pambacunapi shayanajuj quirucunapipash, granocunaca fucujungallami.

5Trigota trillanajujpillatami, uvacunata pallanapash chayamunga. Shinallata, uvacunata pallanajujpillatami, tarpuna punllacunapash chayamunga. Shina cajpimi, cangunapaj llactapica, na ushangacaman tandata micushpa, imatapash na manllashpa aliguta causanguichi.

6Cangunapaj llactapica, ali causaiguta Ñuca carajpimi, imatapash na manllashpa, cungailla puñunguichi. Cangunapaj llactamandaca, millai animalcunatapashmi anchuchisha. Cangunapaj llactapica, espadahuan macanajuipash na tiyangachu.

7Cangunata fiñajcunataca, catiriyashpami espadahuan huañuchinguichi.

8Cangunaca, pichapurallami patsaj runacunata catishpa huañuchinguichi. Shinallata, patsajpurallami, chunga huaranga runacunata catishpa huañuchinguichi. Shinami, cangunata fiñajcunataca, catiriyashpa espadahuan huañuchinguichi.

9Ñuca, cangunata bendiciajpimi mirashpa catinguichi. Shinallata, cangunahuan pactachingapa ari nishcatapash, pactachishpa catishami.

10Punda huatacuna alichishca granocunatami micunguichi. Shinallata, alichishca granocunata llujchishpami, mushuj granocunata alichinguichi.

11Ñuca cangunahuan causajushpami, cangunataca, na millanayachishpa ricusha.

12Cangunahuanmi purijusha. Ñucami cangunapaj Taita Dios casha. Cangunapash, Ñuca agllashcacunami canguichi.

13Ñucami, Egipto llactamanda llujchimuj, cangunata Mandaj Taita Dios cani. Chai llactapi causajcunapajta rurashpa causanajujpimi, paicuna yugushpa huatashcashna charinajujtapash fitishpa cacharichircani. Shinami, cangunataca cushilla, jarilla purinajuchun saquircani.

Taita Diosta na cazujpica, llaquicuna japinamanda(Deut. 28:15-68)

14Ashtahuangarin, tucui cai Ñuca mandashca shimicunata na uyashpa, na pactachishpa,

15na chasquishpa, cangunapaj shungupi na alicachishpa, tucuilla mandashcacunata na pactachishpami, Ñucahuan ari ninajushcatapash yangapi churanguichi.

16Shina rurajpica Ñucapashmi cangunataca, cashna llaquichisha: Ninan manllaicunahuan, millai ungüicunahuan, tabardillo ungüicunahuanmi llaquichisha. Chaicunami cangunataca, ñausata rurashpa, huañungacaman llaquichijunga. Shinallata, muyucunatapash yangallatami tarpunguichi. Fucushca granocunatapash, cangunata fiñajcunami micunajunga.

17Cangunata fiñashpa Ñuca na ricunayachijpimi, cangunata fiñajcunaca catiriyashpa huañuchinga. Cangunata na ricunayachijcunami, mandashpa charinga. Cangunaca, pipash na catijujpitami pacajushpa calpanguichi.

18Shina llaquichijujpipash, Ñucata na cazujpica, ashtahuan canchiscaman mirachishpami, cangunapaj juchacunamandaca cutin llaquichisha.

19Shinallata, canguna jariyashpa, jatun tucushpa purinajushcatapash yangapimi churasha. Jahua pachapash, jirrushnami tucunga. Alpapash bronceshnami tucunga.

20Cangunaca imatapash yangallatami ruranguichi. Alpapipash imapash na fucungachu. Pambapi tiyaj quirucunapipash imapash na fucungachu.

21Canguna fiñashpa purinajushpa Ñucata na uyanayachijpica, canchiscaman huañuchij llaquicunata mirachishpami, cangunapaj juchamandaca llaquichisha.

22Cangunapaj huahuacunatapash, cangunapaj animalcunatapash micushpa tucuchinajuchunmi, millai animalcunata cachamusha. Cangunaca huaquingunalla cajpimi, ñangunapash jichushca saquiringa.

23Shina llaquichijujpipash, na ali tucushpa, Ñucata fiñashpa purinajujpimi,

24Ñucapash cangunata llaquichisha. Cangunapaj juchacunamandaca, canchiscaman mirachishpami llaquichisha.

25Ñucahuan ari ninajushcata na pactachishcamandami, cangunataca espadahuan llaquichisha. Cangunapaj pueblocunapi pacajunajujpipash, millai ungüicunata cachamushpami, cangunata fiñajcunapaj maquipi churasha.

26Cangunapaj micunapash illajpimi, tandatapash chunga huarmicuna, shujlla hornopi yanuchinajunga. Chaitapash ama yapalla micuchun, asha ashalla carajpimi, yarjaillata saquiringuichi.

27Shina llaquichijujpipash, Ñucata na cazushpa, fiñashcamandami,

28Ñucapash, cangunataca ninanda fiñashpa llaquichisha. Cangunapaj juchacunamandaca, canchiscaman mirachishpami llaquichisha.

29Shina cajpimi, cangunapaj churicunatallata, ushicunatallata micunguichi.

30Lomacunapi tiyaj cangunapaj altarcunatapash tucuchishami. Imamambash rijchaj rurashcalla dioscunatapash urmachishpa, cangunapaj huañushca cuerpotapash, chai rurashcalla dioscunapaj jahuapi churashpami, millanayai cashcata ricuchisha.

31Cangunapaj pueblocunatapash, rurashcalla dioscunapaj huasicunatapash, tucuillatami tucuchisha. Mishquilla ashnajun cangunapaj jambitapash na chasquishachu.

32Llactatapash llaquinayaita tucuchijpimi, chai llactapillata causanajuj cangunata fiñajcunapash manllarishpa ricunajunga.

33Cangunataca, shuj llactacunaman caita chaita cachashpami, espadata llujchishpa ninanda llaquichisha. Chaimandami, canguna causanajushca llactapash, pueblocunapash llaquinayaita tucuchijpi, jichushca pambashna saquiringa

34Cangunata fiñajcunapaj llactapi canguna causanajujpimi, chai alpaca samanga. Shinami chai alpaca, pai samana punllacuna cajpi, ninanda cushijushpa samanga.

35Canguna chaipi causanajushpa, alpata na samachishcamandami, cunanga pipash chaipi na causajpi chai alpaca samanga.

36Cangunapuramanda huaquin puchushcacunapaj shungupica, jatun manllaitami churasha. Paicunata fiñajcunapaj llactapica, shuj fanga tsal nijpillatami, pipash na catijpita, espadahuan catijujpishna ninanda manllarishpa calpanajunga. Shinami, pipash na catijpita manllarishpa urmanajunga.

37Cangunaca, pipash na catijpitami, espadahuan huañuchingapa catijpishna, cangunapurallata caishuj chaishuj huajtarinajushpami, cangunata fiñajcunahuanga, napacha macanajui ushanguichi.

38Cangunaca, shuj llactapi causajcunapaj chaupipimi tucuringuichi. Chashnami, cangunata fiñajcunapaj llactapi huañunguichi.

39Cangunapuramanda huaquin puchushcacunaca, paicuna na alita rurashcamandami, paicunata fiñajcunapaj llactapi huañunajunga. Paicunapaj taitacuna na alita rurashcamandami, chashnaca tucunga.

40Shinamandami, paicuna na alita rurashcatapash, paicunapaj taitacuna na alita rurashcatapash, yachashpata na cazushcatapash, Ñucaman llaquirishpa villanajunga. Shinallata, imashpa Ñucata fiñashpa purinajushcatapashmi villanajunga.

41Ñucapash paicunahuan fiñarishpami, paicunata fiñajcunapaj llactaman cachasha. Shinamandami paicunapaj shungupi, circuncisionda na rurashcacunaca, pingai tucushpa, urai cumurishpa, paicunapaj juchatapash llaquirishpa villanajunga.

42Shina villajpimi Ñucapash, Jacobhuan, Isaachuan, Abrahamhuan ari nijushcata yarisha. Shinallata, cangunaman carashca llactatapashmi yarisha.

43Shina cajpipash, paicunapaj jahuallata jichushca saquirishca cashpami, chai punllacunapica samajunga. Ñuca mandashcacunata yangapi churashpami, pactachinajuchun cushca shimicunatapash na ricunayachinajurca. Shinamandami, paicunallata na alita rurashcamandaca, jatun llaquipi churai tucunga.

44Chashna rurashpapash, paicunata fiñajcunapaj llactapi llaquinayaita causanajujpipash, na jichushachu. Ñuca paicunahuan ari nijushcataca, ama yangapi churangapami, paicunataca na millanayachisha. Mandaj Dios Ñucami paicunapaj Taita Dios cani.

45Ashtahuangarin Ñucaca, paicunapaj Taita Dios cangapa, shuj llactacunapi causajcuna ricujta, Egipto llactamanda llujchimushcatami yarisha. Chaipi paicunahuan ari nijushcatapashmi yarisha. Ñucami Mandaj Dios cani’ nishpa villai” nijurcami.

46Tucui caicunaca, pactachinajuchun Mandaj Dios mandashca shimicunami. Chaicunataca, Israelcunahuan, Mandaj Dioshuan, pactachingapami, Moisespaj maquipi, Sinaí urcupi curca.