1Mandaj Diosca cashnatapashmi nihuarca:
2“Huañuna aichayuj runa, Tiro shuti pueblomandaca, ninanda llaquirishpami huacana cangui.
3Mama cucha manñapi tiyaj ashtaca pueblocunahuan jatushpa, randishpa causanajuj, Tiro shuti pueblotaca, cashna ningui:
Mandaj Jatun Diosmi, cashna nin:
‘Tiro shuti pueblolla, canga tucuimanda yali juyailla barcoshnami cani’ nijurcanguimi.
4Canga mama cucha chaupicamanmi tucuita ricushpa purijungui.
Canda rurajcunami, juyaillagutapacha rurarca.
5Senir urcumanda haya caspicunahuanmi, candaca tucuilla quilparca.
Barco chaupipi tucuita charijuj caspitaca,
Líbano urcumanda cedro quirutami churarca.
6Barcota purichina caspicunataca, Basán llactamanda encina caspicunatami ruranajurca.
Tiyarinacunataca, Quitim llactamanda pino caspicunapi marfilta churashpami ruranajurca.
7Barcota purichingapa huairata japina linohuan rurashca jatun fachacunaca,
Egiptopi sirashca, ali juyaillacunami carca.
Jahuata quilpana fachatapash, mama cucha manñacunapi tiyaj Elisa llactamanda,
azul, yana puca fachatami ruranajurca.
8Caspicunahuan canda purichijcunaca, Sidón, Arvad pueblocunapi causajcunami carca.
Tiro pueblolla, alipacha yachajushca runacunaca, cai pueblopimi causanajurca.
Paicunami, candaca jatun barcotashna purichinajurca.
9Gebal pueblomanda ancianocunapash,
barcota ruranata ali yachaj runacunapashmi, chijtarishcacunata alichinajurca.
Tucui barcocunapash, chai barcocunata purichijcunapashmi,
jatungapa, randingapa cambajman shamunajurca.
10Cambaj, macanajunata ali yachaj runacunaca,
Persia, Lud, Fut shuti llactacunamanda carca.
Paicunaca, jarcarina jirrucunata, umapi churajuna jirrucunatapash, pircapimi huarcunajurca.
Chaicunahuanmi canga juyailla ricujurcangui.
11Arvad pueblomanda runacunaca, cambaj ali macanajuj runacunandimi, muyundi jatun pirca jahuacunapi shayanajurca. Gamadeo gentecunaca, cambaj torrecunapimi shayanajurca. Paicunapaj jarcarina jirrucunataca, muyundi pirca jahuacunapimi huarcunajurca. Chaicunahuanmi, canga ashtahuan juyaillagupacha tucurcangui.
12Canga, imatapash ashtacatapacha charijpimi, Tarsis pueblopi causajcunaca, culquita, jirruta, estañota, plomota apashpa, cambaj plazacunapi randishpa jatungapa shamunajurca.
13Javán, Tubal, Mesec shuti llactacunamandapashmi, randishpa jatungapa cambajman shamunajurca. Paicunaca gañangunatapash, broncemanda imatapash rurashcacunatapash apashpami, jatuna pambacunapi, randishpa jatungapa shamunajurca.
14Togarma llactamanda gentecunapash, caballocunahuan, macanajuipi ali calpaj caballocunata, mulocunata apashpami, randingapa jatungapa shamunajurca.
15Dedán llactamanda gentecunapashmi, cambajman randingapa, jatungapa shamunajurca. Mama cucha manñacunapi tiyaj pueblomanda gentecunaca, tucuita randishpami apanajurca. Paicunaca, animalcunapaj marfil quirucunata, ébano caspicunata canman cushpami tucuita apanajurca.
16Edom llactapi causajcunapashmi, cambajman shamunajurca. Paicunaca: Perla rumicunata, yana puca fachacunata, ali linohuan rurashca churajunacunata, coralcunata, rubí rumicunata apashpami, cambaj plazacunaman shamunajurca.
17Judá llactapi causajcunapash, Israelcunapashmi, randishpa jatungapa cambajman shamunajurca. Paicunaca: Minit, Panag pueblocunamanda, trigota, balun mishquita, aceiteta, resinata apashpami, cambaj plazacunapi jatungapa shamunajurca.
18Damasco pueblopi causajcunaca, can tucuita ashtacatapacha charijpimi, paicunaca Helbón shuti pueblomanda vinota, yuraj milmata apashpa, canman cungapa shamunajurca.
19Shinallata, Dan shuti llactapi causajcunapash, Javán shuti llactamanda, caita chaita purij gentecunapashmi, cambaj plazacunaman shamunajurca. Paicunaca, jirruhuan juyaillaguta rurashcatapash, mishquilla ashnajun mirratapash, virutapash apashpami, cambaj plazacunaman shamunajurca.
20Dedán shuti llactamanda runacunaca, carretacunapi churana juyailla pañocunatami canman jatunajurca.
21Arabia llactapi causajcunapash, Cedar shuti aylluta mandajcunapash, maltun llamacunata, jari llamacunata, jari chivocunata apamushpami, jatungapa cambajman shamunajurca.
22Sabá shuti llactamanda, Raama shuti ayllumanda jatujcunaca, cambajman shamushpami, randinajuj, jatunajuj carca. Paicunaca, tucuimanda yali mishquilla ashnajuncunata, juyailla rumicunata, curita apamushpami, cambaj plazacunaman shamunajurca.
23Harán, Cane, Edén pueblocunapi causajcunapash, Sabá, Asiria, Quilmad shuti llactacunapi causajcunapashmi, imatapash randishpa jatungapa, canhuan ari ninajurca.
24Paicunaca, juyaillaguta sirashca azul churajunacunata, churajunacunata alichina cajongunata, racuta caupushca puchacunahuan huatashca churajunacunata, cedro caspicunatapashmi jatungapa shamunajurca.
25Tarsis shuti pueblomanda ashtaca barcocunami, can imatalla randishcacunataca apamunajurca.
Chaimandami canga, ninan charij tucurcangui.
Mama cucha manñapica, imata cashpapash ninandapachami mirachijurcangui.
26Canda caspihuan purichijcunami, ashtaca yacu chaupiman aparca.
Indi llujshimujmanda huaira shamushpami candaca, mama cucha chaupipi faquirca.
27Chai punllapimi, tucui can charishcacuna, cambaj jatunacuna, randinacuna,
canda ricushpa pushajcuna, ama huaglichun ricujcuna,
cambaj jatunacunata ricujcuna, macanajunata ali yachajcuna, cambi tucui rinajuj gentecunapashmi
Canda llaquichijui punllacunapica, paicunapashmi mama cucha chaupipi tucuringa.
28Shinallata, yacupi purinata yachajcuna ninanda caparijta uyashpami,
mama cucha manñapi causajcunaca ninanda manllarinajunga.
29Barcocunata caspihuan purichijcunaca, tucuicuna uriajunajunga.
Barcota caspihuan purichijcunapash, pushajcunapashmi, mama cuchamanda llujshishpa alpapi causanajunga.
30Shina cajpimi, jatun llaquihuan cashpa ninanda caparinajuj uyaringa.
Umapipash alpata churarishpami, uchufapi tiyarinajunga.
31Can chashna llaquipi cajpimi, ajchatapash ruturinajunga.
Cañamutami huatarinajunga.
Canmandaca, ninandapacha llaquirishpami caparishpa huacanajunga.
32Paicunaca, ninanda llaquirishpami huacanajunga.
Chashna huacanajushpami cashna ninajunga:
‘Mama cucha chaupipi tucurishca Tiro shuti puebloshnaca, ¿pita tiyarcayari?’ ninajungami.
33Cambaj jatun barcocunamanda imata apamushcata uriajuchishpaca,
tucui pueblo gentecunatami cushichijurcangui.
Llactacunata jatun mandajcunapash, cambaj plazacunapi jatushpa randishpami, ninanda charijyanajurca.
34Mama cucha chaupipi llaquita apana punllapica,
cambaj jatujcunapash, randijcunapashmi canhuan pacta tucuringa.
35Mama cucha manñacunapi tucui causajcunaca canda ricushpami manllarinajunga.
Paicunata jatun mandajcunapash, ninandami manllarinajunga.
Paicunapaj ñavicunapash, ninanda manllarishcami ricunajunga.
36Shuj pueblocunapi randishpa jatujcunaca, candaca na alicachishpami caparinajunga.
Canga, tucuicuna manllarishpa ricujtami, cutinga na jataringapa tucuringui” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
