ECLESIASTÉS 7 - Quichua Imbabura 2016

Alipacha yachajushcamandapash, juizu illajmandapash

1Mishquilla ashnajujta javirishpa puringapa randica,

tucuicuna alicachijpi causanami ashtahuan ali.

Huacharina punllapaj randica, huañuna punllami ashtahuan ali.

2Jatun micuita ruranajuj huasiman rinapa randica,

huañui tiyaj huasiman rinami ashtahuan ali.

Chai punllami, tucui runacunapaj causaica tucurin.

Causaj runaca chaita ricushpami, shungupi yaringa.

3Yangata asingapa randica, llaquilla canami ashtahuan ali.

Chashna llaquilla cashpami, shungupica ashtahuan shinlli tucun.

4Alipacha yachajushca runacunaca,

huañuna punlla chayamunataca alimi yachan.

Ashtahuangarin juizu illaj runacunaca, cushijunatallami yarinajun.

5Juizu illaj runa canda alicachishpa rimanapa randica,

alipacha yachajushca runa jarcashpa rimashcami ashtahuan ali.

6Juizu illaj runa asishcapash, ninapi casha yamda tugyashpa rupajujshnami.

Chaipash yangallatami.

7Llaquichishpa charijpica,

alipacha yachajushca runapash, juizu illajman tigrangallami.

Imatapash pacalla carashcacunaca, shunguta huaglichinllami.

8Imatapash rurashpa callaringapa randica,

imata ruranatapash ña tucuchinami ashtahuan ali.

Jariyashca yuyaihuan canapaj randica,

na ñapash fiñarij yuyaita charinami ashtahuan ali.

9Cambaj yuyaipica, ama ñapash fiñaringuichu. Juizu illaj runacunapaj yuyaipimi, chashna fiñarinaca tiyajun.

10Canga: “Punda huatacunami, cunan huatacunata ashtahuan yali ali carca” nishpaca ama ninguichu. Shina nishpaca, na ali yachajushca runacunashnami nijungui.

11Cai pachapica, aliguta yachajushca cashpa, ali canaca alimi. Shinallata, aliguta yachajushca cashpa, charij canacarin ashtahuan alimi.

12Ali yachajushca canaca, jarcarina jirrushnami, culquipash jarcarina jirrushnallatami. Ashtahuangarin, ali yachajushca canami, alipacha causaita cuj cashcamanda ashtahuan ali.

13Taita Dios rurashcata ricungui. Paillata rurashcataca, ¿pita ashtahuan shujta rurai ushangayari?

14Cushijuna punlla chayamujpica, chai punllapi cushijunguilla. Llaqui punlla chayamujpica, aligutami yarina cangui. Cushijuitapash, llaquitapash Taita Diosmi churarca. Chaitaca, caya punllacuna ima canatapash runa ama yachachunmi shina churarca.

15Tucui caicunatami, ñuca huajcha causaipica ricushcani: Alitalla rurashcamanda huañuj runapash tiyanmi. Diosta na manllajcuna ashtahuan unaita causajcunapash tiyanmi.

16Alitalla rurashpapash, alipacha yachashpapash, ama yapata alipi ricurichu.

¿Imashpata, canllata llaquipi urmagringui?

17Pandarishpapash, ama juizu illajshnapacha ruranguichu.

¿Imashpata canllata uchalla huañunata mascanguiyari?

18Ima ali cajta, na ali cajtapash, alipachami yachana.

Taita Diosta manllaj runaca, tucuipimi ali llujshinga.

19Ali yachajushca cashpami, ashtahuan ushaita charingui.

Chashna cashpaca, shuj pueblopi causaj, chunga shinlli runacunatapash yali ushaitami charingui.

20Cai pachapica, alitalla ruraj cashpapash, juchata na rurashpa causaj runaca, shujllapash napacha tiyanllu.

21Pi ima parlashcatapash ama uyanayachinguichu. Shinami, cambajta rurajcuna, canda huasha rimajtaca na uyangui.

22Cambash, chashnallatami shujcunata na alicachishpa rimashcangui. Chaitaca canllata yachanguimi.

23Tucui chaicunatami, aliguta callarishpa ricujurcani. Ñucaca: “Alipacha yachajushcami casha” yajurcanimi. Ashtahuangarin ali yachajunaca, ñucamanda anchurircami.

24Cai pachapi tucuita yachajunaca, napacha ushanallami. Chaitaca, ¿pita yachai ushangayari?

25Chaimandami, ali yuyaita charinata, ali yachajushca canata, callarimandapacha yachajungapa munarcani. Shinallata, juizu illaj canatapash, na alita ruranatapash, imapi pandarinatapash alipacha yachangapami munarcani.

26Shinallata, shuj na ali pandachijlla huarmica, huañuitapash ashtahuan yali llaquichij cashcatami yacharcani. Taita Diosta cazuj runallami, chai huarmimandaca quishpiringa. Ashtahuangarin juchata ruraj runaca, chai huarmihuanmi prezu japi tucushcashna saquiringa.

27Yachachij runaca, tucui caicunatami yachaj chayarcani ninmi. Tucuita alipacha ricushpa, yachashpami, imashna cajtaca yachangapa munarcani.

28Shina cashpapash, tucui shunguhuan mascajushpapash, na tari ushanichu. Huaranga jaricunamandaca, shujtallami ali cashcata tarircani. Tucui huarmicunamandaca, shujllatapash na tarircanichu.

29Ñucaca caitallami ricurcani: Taita Diosca, runataca tucui alitami rurashca. Ashtahuangarin, paicunalla na alicunata rurashpami, ima llaquicunapi yaicun.