NEHEMÍAS 12 - Quichua Imbabura 2016

Sacerdotecunamandapash, levitacunamandapash

1Salatiel shuti runapaj churi Zorobabel runahuan, Jesúa shuti sacerdotehuan tigramuj sacerdotecunapaj, levitacunapaj shuticunaca, caicunami: Seraías, Jeremías, Esdras,

2Amarías, Maluc, Hatús,

3Secanías, Rehum, Meremot,

4Iddo, Gineto, Abías,

5Mijamín, Maadías, Bilga,

6Semaías, Joiarib, Jedaías,

7Salú, Amoc, Hilcías, Jedaías shuti mandaj sacerdotecunami, paicunapaj huauquicunandi Jesúa causajui punllacunapi tigramurca.

8Levitapuramandaca: Jesúa, Binúi, Cadmiel, Serebías, Judá, Matanías shuti runacunami tigramurca. Matanías runaca, paipaj huauquicunandimi, Diosta alicachishpa candanacunata candachinajurca.

9Bacbuquías shuti, Uni shuti levitacunapashmi, paicunapaj huauquicunandi, tucuicunallata Diospajta ruranajurca.

10Jesúa shuti runaca, Joiacim shuti churitami charirca. Joiacim runaca, Eliasib shuti churitami charirca. Eliasib runaca, Joiada shuti churitami charirca.

11Joiada shuti runaca, Jonatán shuti churitami charirca. Jonatanga, Jadúa shuti churitami charirca.

12Joiacim shuti sacerdote causajui punllacunapica, caicunami sacerdotecunapaj aylluta mandajcuna carca: Seraías shuti runapaj ayllutaca, Meraías shuti runami mandajurca. Jeremiaspaj ayllutaca, Hananías runami mandajurca.

13Esdraspaj ayllutaca, Mesulam shuti runami mandajurca. Amarías shuti runapaj ayllutaca, Johanán shuti runami mandajurca.

14Melicú shuti runapaj ayllutaca, Jonatanmi mandajurca. Sebanías shuti runapaj ayllutaca, Josemi mandajurca.

15Harim shuti runapaj ayllutaca, Adna shuti runami mandajurca. Meraiot shuti runapaj ayllutaca, Helcai shuti runami mandajurca.

16Iddo shuti runapaj ayllutaca, Zacariasmi mandajurca. Ginetón shuti runapaj ayllutaca, Mesulam runami mandajurca.

17Abías shuti runapaj ayllutaca, Zicri shuti runami mandajurca. Miniamín shuti runapaj ayllutaca, Moadías shuti runahuan, Piltai shuti runahuanmi mandanajurca.

18Bilga shuti runapaj ayllutaca, Samúa shuti runami mandajurca. Semaías shuti runapaj ayllutaca, Jonatanmi mandajurca.

19Joiarib shuti runapaj ayllutaca, Matenai shuti runami mandajurca. Jedaías shuti runapaj ayllutaca, Uzi shuti sacerdotemi mandajurca.

20Salai shuti runapaj ayllutaca, Calai shuti runami mandajurca. Amoc shuti runapaj ayllutaca, Eber shuti runami mandajurca.

21Hilcías shuti runapaj ayllutaca, Hasabías shuti runami mandajurca. Jedaías shuti runapaj ayllutaca, Natanaelmi mandajurca.

22Eliasib, Joiada, Johanán, Jadúa shuti runacuna causanajui punllacunamanda, Persia llactata jatun mandaj Darío mandajui punllacunacamanmi, levitacunapaj, sacerdotecunapaj ayllucunata mandajcunapaj shuticunataca, shuj libropi quilcanajurca.

23Shinallata, Eliasib shuti runapaj churipaj churi Johanán shuti runa causajui punllacunacamanmi, Leví shuti runapaj mirai ayllucunata mandajcunapaj shuticunataca, shuj libropi quilcanajurca.

24Levitacunata mandajcunaca: Hasabías shuti runapash, Serebías runapash, Cadmiel shuti runapaj churi Jesúa shuti runapashmi carca. Paicunapaj huauquicunaca, Taita Diospajta ruraj David quilcachishcapi nijujshnallata, Diosta pashi nishpa alicachingapami, paicunapaj ñaupajman yaicuna chayajpi rishpa candanajurca.

25Matanías, Bacbuquías, Obadías, Mesulam, Talmón, Acub shuti levitacunaca ricujcunami carca. Paicunaca, yaicuna pungucunapimi ricunajurca.

26Paicunaca, Jesúa shuti runapaj churi Joiacim shuti runa causajui punllacunapi, Judá llactata mandaj Nehemías causajui punllacunapi, quilcaj sacerdote Esdras causajui punllacunapimi ricuj carca. Joacim shuti runaca, Josadac shuti runapaj churipaj churimi carca.

Jerusalén muyundi pircata, Diosman mingashcamanda

27Jerusalén muyundi jatun pircata tucuchishpa Diosman mingangapami, tucuilla levitacunataca maipi causanajujpipash, mascashpa Jerusalenman pushamugrirca. Paicunataca, platillocunahuan, salteriocunahuan, cítaracunahuan, Diosta alicachishpa candashpa, Taita Diosman minganajuchunmi pushamugrirca.

28Shina pushagrijpimi, Jerusalén muyundi llactacunapi causanajuj, Netofa shuti pueblo muyundi uchilla pueblocunapi causanajuj candajcunapaj churicunapash tandanajurca.

29Gilgal shuti pueblopi causanajuj huasi ucupurapash, Geba shuti, Azmavet shuti pambacunapi causajcunapashmi shamunajurca. Chai candajcunaca, Jerusalén pueblo muyundipi uchilla pueblocunata rurashpami causanajushca carca.

30Paicuna shamujpimi sacerdotecunapash, levitacunapash mapa illaj tucunajurca. Gentecunatapash, Jerusalén pungucunatapash, jatun pircatapashmi, mapa illaj cachun alichinajurca.

31Chai jipami ñucaca, Judá llactata mandajcunataca, jatun pirca jahuaman richun mandarcani. Tandanajushca ashtaca candajcunatapash ishcaipi shicanyachishpami, ñaupashpa rinajuchun churarcani. Shuj shicanyachi tucushca candajcunataca, Mapata llujchishpa shitana punguman, pirca jahuata richunmi churarcani.

32Chai candajcunapaj huashata catishpami, Osaías runaca, Judá llactata mandajcunata ishcaipi shicanyachishca caishuj mandajcunahuan rinajurca.

33Azarías, Esdras, Mesulam,

34Judá, Benjamín, Semaías, Jeremías shuti mandajcunapashmi rinajurca.

35Sacerdotecunapaj churicunami, trompetata huacachishpa rinajurca. Zacariasca, Jonatanbaj churimi, Jonatanga, Semaías runapaj churimi, Semaías runaca, Matanías runapaj churimi, Matanías runaca, Micaías runapaj churimi, Micaías runaca, Zacur shuti runapaj churimi, Zacur shuti runaca, Asaf runapaj churimi carca.

36Paicunapaj huauquipuramandaca, Semaías, Azarael, Milalai, Gilalai, Maai, Natanael, Judá, Hanani shuti runapashmi carca. Paicunami, Taita Diospajta ruraj Davidpaj taquinacunata taquinajurca. Chai taquijcunata ñaupashpaca, quilcaj Esdrasmi rijurca.

37Pugyuman llujshina punguca, paicunapaj chimbapurapi cajpimi, Davidpaj puebloman vichai rina gradacunata, pirca jahuaman vichai rina ñanda rinajurca. Davidpaj huasimandaca, Yacuman llujshina pungucamanmi vichai rinajurca. Chai punguca, indi llujshimujmanmi tiyajun.

38Caishuj chaupi candajcunaca, lluquimanmi rinajurca. Ñucaca, chaupi caishuj gentecunahuanmi, Horno shuti torrecunamanda ashtahuan ancho pircacaman paicunata catishpa, pirca jahuata rijurcani.

39Efraín shuti jatun pungumandaca, Mauca jatun pungutapash, Pijicunahuan yaicuna pungutapash, Hananeel shuti torretapash, Hamea shuti torretapash, Llamacunahuan yaicuna pungutapash yalishpami, Prezuna huasi pungupi saquirircanchi.

40Chai jipami, ishcaipi shicanyarishpa tandanajushca candajcunaca, Taita Diospaj huasiman chayarca. Ñucapash, ñucahuan purinajuj mandajcunandimi chayarcani.

41Trompetata huacachinajuj sacerdotecunaca, caicunami carca: Eliacim, Maaseías, Miniamín, Micaías, Elioenai, Zacarías, Hananías,

42Maasías, Semaías, Eleazar, Uzi, Johanán, Malquías, Elam, Ezer shuticunami carca. Candajcunaca, shinllitapachami candanajurca. Paicunata mandashpa candachijca, Izrahías shuti runami carca.

43Chai punllapica, ashtaca animalcunatami Diosman cushpa huañuchinajurca. Taita Diosllata samachishpa jatun cushijuita cujpimi, ninanda cushijunajurca. Chaipica huarmicunapash, huahuacunapashmi cushijunajurca. Jerusalenbi chashna ninan cushijunajuica, caru llactacamanmi uyarirca.

Sacerdotecunaman, levitacunaman micunata carashcamanda

44Chai punllapica, imapash ninan ali tiyashcacunata, Diosman imatalla carangapa apamushcacunata, punda fucushcacunata, chungamanda shujguta cushcacunata alichina ucucunapimi, ricuj runacunata churarca. Paicunataca, pueblo muyundi pambacunapi fucushcacunata, shinallata mandashcapi nijujshnallata sacerdotecunaman, levitacunaman caranacunata apamushcacunata, chai ucucunapi tandachinajuchunmi churarca. Judá llactapi causajcunaca, Diospajta ruraj sacerdotecunamanda, levitacunamandami, ninanda cushijunajurca.

45Sacerdotecuna, levitacunaca, paicunapaj Diospajta rurashpa, juchamanda cunatapash cushpami pactachinajurca. Candajcunapash, pungucunapi ricujcunapashmi pactachinajurca. Paicunaca Davidpash, paipaj churi Salomonbash quilcashpa mandashcashnami pactachinajurca.

46Jatun mandaj David, Asaf shuti runacuna causanajui punda huatamandapachami, Taita Diosta pashi nishpa alicachishpa candanacunata candachijcunaman yachachijcunaca tiyarca.

47Zorobabel runapash, Nehemías runapash causajui punllacunapimi, tucuilla Israelcunaca, candajcunamambash, pungucunapi ricujcunamambash, micunacunata cunajurca. Imata cuna cashpapash, punllandimi cunajurca. Shinallata levitacunaman cungapapashmi, shuj ashata shicanyachinajurca. Chai cushcacunamandaca, levitacunapashmi, Aaronbaj miraicunaman shuj ashata shicanyachinajurca.