APOCALIPSIS 9 - Quichua Imbabura 2016

1Chuscupaj cati ángel trompetata huacachijpica, jahua pachamanda cai pachaman, shuj luzero urmamundami ricurcani. Chai luzeromanmi, manllanayai yana yana ucupaj pascanata curca.

2Shina cujpimi, chai manllanayai yana yana ucuta pascajpi, jatun hornomanda cushni llujshimujshna llujshijurca. Chai llujshijuj cushnimi, inditapash, huairatapash yanayachirca.

3Chai cushnimandami, langosta jurucuna llujshishpa, alpapi purinajurca. Chai jurucunamanmi, cai alpapi alacrangunashna cachun, ushaita curca.

4Paicunataca: “Cai alpapi tiyaj jihuacunata, imapash verdellacunata, ima quirucunatapash, na huaglichinachu canguichi, ashtahuangarin, Taita Diospaj sellota frentepi na charij gentecunatami llaquichina canguichi” nishpami mandarca.

5Shina cashpapash, gentecunataca na huañuchishpa, ashtahuangarin, picha quillacaman llaquichinajuchunmi ushaita curca. Chai gentecunaca, alacranguna canijpishnami, jatun llaquita apanajurca.

6Chai punllacunapi causanajuj gentecunaca, huañungapa munashpapash, na huañungachu. Paicuna huañungapa ninanda munanajujpipash, huañuica na tiyangachu.

7Chai langostacunaca, jatun macanajuiman ringapa alichirishca caballocunashnami ricurirca. Umacunapica, curi coronatashna churajushcami carca. Paicunapaj ñavica, gentepaj ñavishnami carca.

8Ajchacunatapash, huarmipaj ajchatashnami charirca. Quirucunapash, leonbaj quirucunashnami carca.

9Paicunaca, jirru churajunacunata churajushcashnami carca. Paicunapaj alascunapash, ashtaca caballocuna carretacunata aisashpa, jatun macanajuiman rinajunshnami, ninanda huacanajuj uyarirca.

10Chupacunapash, alacranbaj chupashnalla tujsishpa llaquichingapa, racu aujatashnami charirca. Paicunapaj chupacunapica, gentecunata picha quillacaman llaquichina ushaitami charirca.

11Chaicunataca, manllanayai yana yana ucupi mandaj angelmi mandajurca. Chai angelpaj shutica, hebreo rimaipica, Abadón shutimi. Griego rimaipica, Apolión nijunmi.

12Punda llaquicunaca yalircami, ricui, caipaj catica, ishcai llaquicuna shamujunrami.

13Pichapaj cati ángel trompetata huacachijpica, Taita Diospaj ñaupajpi tiyajuj curi altarpaj, chuscundi cachu chaupimanda rimajujtami uyarcani.

14Trompetata charijuj pichapaj cati chai angeltaca: “Éufrates jatun yacu manñapi huatai tucushca shayanajuj, chuscu angelcunata cachagriri” nijujtami uyarcani.

15Shina nijpimi, chai chuscu angelcunataca cacharigrirca. Paicunami, cai pachapi causanajuj gentecunata, quimsapi chaupishpa, shuj chaupitaca huañuchingapa ushaita charirca. Paicunaca, chai punlla, chai quilla, chai huata pactajpi rishpa huañuchingapami shuyanajurca.

16“Caballopi tiyarishca macanajuj runacunaca, ishcai patsaj millonmi tiyan” nijtami uyarcani.

17Chai caballocunata, caballopi tiyanajujcunataca, chashnatami muscuipishna ricurcani. Paicunaca, ninashna, zafiroshna, azufreshna jirru churajunacunatami churajushca tiyanajurca. Chai caballocunapaj umapash, leonbaj umacunashnami carca. Paicunapaj shimimandaca ninapash, cushnipash, azufrepashmi llujshijurca.

18Chai caballocunapaj shimimandaca, ninapash, cushnipash, azufrepashmi llujshijurca. Chai quimsa llaquichinahuanmi, cai pachapi causajcunata, quimsapi chaupishpa, shuj chaupi gentecunataca huañuchinajurca.

19Chai caballocunaca, shimipi, chupapimi ushaita charirca. Chupacunapash, culebracunashna umata charishpami, chaicunahuan ninandapacha llaquichinajurca.

20Shina llaquichinajujpipash, na huañushpa puchushca gentecunaca, paicuna na alita rurashcamandaca, napacha llaquirishpa Diospajman tigrarcachu. Curita, culquita, bronceta, rumita, caspita rurashca dioscunata, ayacunata mañanatapash napacha saquircachu. Chai rurashcalla dioscunaca, ricuitapash, uyaitapash, puritapash na ushanllu.

21Chai gentecunaca, huañuchishpa, brujurishpa, huainayashpa, shuhuashpa causashca cashpapash, napacha Diospajman tigrarircachu.