Psalms 18 - Quichua Imbabura 2016

Macanajuipi mishachijpi, pashi nishpa candashcamanda(2 Sam. 22:1-51)Candajcunata mandaj candachijuchun, Mandaj Diospajta ruraj David rurashca Salmomi. Paita tucui fiñajcunapaj maquimandapash, Saulpaj maquimandapash, Mandaj Dios cacharichijui punllami, Mandaj Diosman cai shimicunata candashpa, cashna nijurca:

1Ñucata shinllichij Mandaj Dioslla,

Candaca ninandami juyani.

2Mandaj Diosca, jatun rumishna, shinlli jatun huasishna,

llaquicunamanda huacaichij Diosmi capangui.

Ñuca shinlli torreshna, ñuca Taita Dioslla, Candallami yariajusha.

Paica, ñuca jarcarina escudoshna,

ninan ushaita charij ñucata quishpichijmi.

Paica, ñuca pacajuna jatun pircashnami.

3Mandaj Diostami mañasha. Paillami, ninanda alicachi tucunata charin.

Ñucata fiñajcunapaj maquimandaca, Paimi quishpichihuanga.

4Huañuchij llaquicunami ñucataca japihuarca.

Jatun na alicunapash, ninanda jatarij huaicu yacushnami manllachihuarca.

5Seolca huatashpami, muyundi pillushpa charijuhuarca.

Huañuchij lazutami churahuarca.

6Chashna ninan llaquihuan cashpami, Mandaj Diostaca mañarcani.

Ñuca Taita Diostami caparircani.

Paimi, ñuca mañajujtaca, Paipaj huasimandapacha uyahuarca.

Ñuca caparishcapash, Paipaj ñaupajman chayajpimi, Paica uyahuarca.

7Cai pachaca, ninanda cuyuchijpimi chujchurca.

Urcucunata charijuj rumicunapashmi cuyurirca.

Dios fiñarijpimi, chashna chujchunajurca.

8Paipaj singamandaca, cushni llujshishpami vichai rijurca.

Paipaj shimimandaca, tucuchij ninami llujshijurca.

Carbongunapash, Pai ninata japichijpimi japirirca.

9Diosca, jahua pachata pascashpami urai shamurca.

Paica, yana fuyu jahuapimi shamurca.

10Paica, shuj querubín ángel jahuapi tiyarishpami shamurca.

Huaira jahuatami urai shamurca.

11Paitaca pacachunga, yana yana fuyutami churarca.

Paica, tamianalla yana yana fuyu ucutami shamujurca.

12Pai punchapamba ricurimujpimi, chai fuyucunaca anchurirca.

Rundupash, rupajuj carbongunapashmi urmamurca.

13Mandaj Diosca, jahua pachapimi culun nichirca.

Jahua pachapi causajuj Diosmi rimamurca.

Rundupash, rupajuj carbongunapashmi urmamurca.

14Paipaj flechacunata cachamushpami, fiñajcunataca caita chaita cacharca.

Punchapambata shitamushpami paicunataca tucuchirca.

15Shina cajpimi, mama cucha yana yana ucupash ricurirca.

Cai pacha callari rumicunapashmi, ricunalla saquirirca.

Mandaj Dios shinllita rimashpa,

Paipaj singa samaihuan fucujpimi, chashna tucurca.

16Jahua pachamanda cachamushpami

Ashtaca yacu chaupimanda llujchihuarca.

17Ninan ushaita charij, ñucata fiñajcunamandami quishpichihuarca.

Ñucata millanayachij runacunamandami cacharichihuarca.

Ñucata yali shinllicuna runacunapaj maquimandami, cacharichihuarca.

18Ninan llaqui punllapimi, ñucataca llaquichingapa japihuarca.

Ashtahuangarin Mandaj Diosmi, ñucataca yanapahuarca.

19Jatun pambamanmi llujchihuarca,

ñucata juyashpami cacharichihuarca.

20Mandaj Diosca, ñuca alita rurashcamandami alicunata carahuarca.

Ñuca maquihuan ima mapatapash na rurashcamandami, alitalla carahuarca.

21Mandaj Dios mandashcatami cazushpa pactachircani.

Ñuca Taita Diosmanda na anchurishpami, Paita manllashpa causarcani.

22Pai mandashca shimicunatami, pactachishpa causajurcani.

Pai mandashca shimicunamandaca, na anchurishcanichu.

23Paipaj ñaupajpica, tucuita pactachishpami causarcani.

Na alita ruranamandapash jarcarircanimi.

24Chaimandami Mandaj Diosca, alitalla rurashcatashna chasquihuarca.

Ñuca maquihuan, Paipaj ñaupajpi ima mapatapash na rurashcatashnami chasquihuarca.

25Ninan juyaita charij runataca, cambash chashnallatami juyangui.

Alitalla ruraj runataca ninandami llaquingui.

26Ali yuyaihuan causaj runataca, chashnallatami Cambash ricushpa charingui.

Ashtahuangarin, na alita ruraj runataca, ninandami llaquichingui.

27Canmi, llaquihuan causaj gentecunataca quishpichingui.

Ashtahuangarin, jariyashpa causajcunataca, llaquipimi churangui.

28Canmi, ñuca purina ñandaca punchayachingui.

Ñucata Mandaj Taita Diosmi, yana tutapishna cajpipash punchayachinga.

29Canhuanga, ashtaca gentecunatapash mishashallami.

Ñuca Taita Dioshuanga, jatun pircacunatapash urmachishpa yalishallami.

30Taita Diosca, imatapash na pandata ruranllu.

Mandaj Dios rimashca shimicunaca, ima pandapash illajmi.

Paita shuyajcunataca, jarcarina escudoshnami jarcajun.

31Shina cashpaca, ¿Mandaj Dios shinashnalla shuj tiyangachu?

Jatun rumishna, ñucanchi Taita Diosmanda ¿Shuj tiyangachu?

32Taita Diosmi, ushaita cuhuangui.

Canmi, ali ñambi pushahuangui.

33Canmi, tarugashna calpana ushaita carahuangui.

Urcu jahuacunapi purichunmi ushaita carahuangui.

34Canmi, jatun macanajuipi macanajuchumbash, ushaita carahuangui.

Bronce arcota ñuca rigrahuan chutachumbash, Canmi ushaita carahuangui.

35Macanajuipi jarcarishpa quishpirina, jirrutami cuhuarcangui.

Cambaj ali maquihuanmi charihuarcangui.

Can juyashpami, jatumbi churahuashcangui.

36Ñuca maita purichumbash, ri ushanallatami rurarcangui.

Chaimandami na urmashpa ri ushasha.

37Ñucata fiñajcunataca, catishpami japigrircani.

Paicunata tucuilla tucuchingacaman na tigramurcanichu.

38Paicunataca, na jatari ushangacamanmi tucuchircani.

Paicunaca, tucuillami huañushca sirinajurca.

39Macanajushpa mishachunmi, ninan ushaita cuhuarcangui.

Ñucata fiñajcunataca, ñuca ñaupajpimi pingaichircangui.

40Ñucata fiñajcunataca calpachircanguimi.

Ñucata na ricunayachij runacunataca tucuillami tucuchircani.

41Caparinajujpipash, paicunata quishpichijca pipash na tiyarcachu.

Mandaj Diosta mañanajujpipash, na uyarcanguichu.

42Paicunataca, ñutu alpata huairapi shitajshnami tucuchircani.

Turu alpatashnami, canlla ñanman shitarcani.

43Na alicachishpa rimajcunamandaca cacharichihuarcanguimi.

Llactacunata umashna mandachunmi churahuarcangui.

Ñuca na rijsishca gentecunami, ñucapajta rurajcuna tucurca.

44Ñuca ima nishcatami cazunajurca.

Na rijsishca gentecunapaj churicunami, ñucata cazushpa causanajurca.

45Na rijsishca gentecunaca, ushai illaj tucushpami,

paicuna pacajushca ucumandaca, ninan manllaihuan llujshinajurca.

46Mandaj Diosca causaita causachun.

Jatun rumishna ñuca Diosca, alicachi tucushca cachun.

Ñucata quishpichij Taita Diosca, jatunyachi tucushca cachun.

47Ñucata llaquichijcunataca, chashnallata llaquichij Taita Diosmi capangui.

Shuj gentecuna, ñuca mandashcata cazuchunmi churashcangui.

48Paimi, ñucata fiñajcunamandaca cacharichihuan.

Ñucata llaquichingapa jatarinajujpipash, ashtahuan alipi churashpami jatunyachihuan.

Huañuchij runapaj maquimandapashmi cacharichihuarca.

49Mandaj Dioslla,

shinamandami shuj llactacunapipash, Canmanda villajusha.

Cambaj shutitapash alicachishpami candajusha.

50Can churashca jatun mandajtaca, jatun macanajuicunapi mishachunmi ushaita caran.

Can agllashca jatun mandajtaca, ninandami llaquingui.

Davidtapash, paipaj miraicunatapash causaita causaicamanmi juyashpa charingui.