1Tucui ushaita charij Diospaca, imapash na pacallachu.
¿Imashpata Paita rijsijcunaca, na cazushpa causanajun?
2Huaquingunaca, alpa mujungunatami suchuchin.
Shuhuashca huagracunatami michinajun.
3Taita mama illaj huahuacunapaj burrutapash quichunllami.
Sapalla mamagupaj huagratapash, prenda japishpami apan.
4Ñambi mañashpa tiyajuj huajchacunatapashmi calpachin.
Imagutapash na charijcunaca, paicunata manllashpami pacajunajun.
5Chai gentecunaca, jichushca pambapi causaj sacha burrucunashnami,
tutamandata jatarishpa shuhuangapa rinajun.
Paicunapaj huahuacunapaj micuna tiyachunmi chashna shuhuanajun.
6Paicunaca, shujcunapaj pambacunapimi jihuata pallanajun.
Diosta na manllajcunaca, shujcunapaj uvacunatami pallanajun.
7Churajuna illajtapash, lluchulla puñuchun saquinllami.
Paica, chirimanda imahuan quilparingapapash na charinchu.
8Urcu tamiahuanmi paicunaca shutunajun.
Chirimanda quilparina illajpimi, jatun rumi ucucunapi pacajunajun.
9Chuchunajuj taita illaj huahuacunatapash, quichushpami apanajun.
Imagutapash na charijcunatami, prenda japishpa llaquichinajun.
10Churajuna illajtaca, lluchullatami purichun saquinajun.
Huajchacuna micunatapash quichushpami apanajun.
11Paicunapaj huasi ucupimi, aceiteta pacalla llujchinajun.
Uvata sarunajushpapash, yacunayaimanda huañunajunmi.
12Huajcha gentecunaca, yarjaimandami chai pueblopica caparinajun.
Huañunalla sirinajuj gentecunapashmi ninanda caparinajun.
Shina cajpipash Taita Diosca, paicuna mañanajujtaca na uyanllu.
13Paicunaca michatapash na ricunayachishpami,
Diospaj ñandaca na rijsinajurca.
Diospaj ñandaca napacha catingapa munarcachu.
14Punllayajhuanmi, huañuchij runaca jatarijun.
Imagutapash munashpa causaj,
imatapash na charij runata huañuchingapa jatarijun.
Tutaca shuhuangapami llujshijun.
15Cazarashca jahua shujcunahuan causaj runaca, tutayandami shuyajun.
Paica: ‘Pipash ñucataca, na ricuhuangachu’ yashpami, ñavita quilparishpa llujshijun.
16Shuhuaca, yana tutapimi huasita shuhuan.
Punlla ricushpa purishpami chashna ruran.
Paica, punllataca na ricunayachinllu.
17Tucui na ali gentecunapajca, punllayanaca huañui japinalla llandushnami.
Paicunata pipash rijsijpica, huañungashnami manllarin.
18Ninanda calpajuj yacushnami, ucha calpashpa pacajunajun.
Paicuna charishca alpacunapash, chai llactapica ninanda na alicachi tucushcami.
Paicunapaj uva chagrapica, pipash na pallangapa munangachu.
19Tamia pascarijpi ninanda rupashpami, razutaca yacuyachin.
Juchayu runacunataca, Seolpash chashnallatami apanga.
20Paicunataca, unguj mamapash cungangami.
Jurucunallami, paicunataca mishqui mishquita micunga.
Paicunataca, pipash na yarinajungachu.
Diosta na manllajcunaca, quiruta urmachijpishnami tucuchi tucunajunga.
21Huahuata na chari ushaj huarmicunatami llaquichijurca.
Sapalla mamagumambash, ima alitapash na rurarcachu.
22Ashtahuangarin, Diospaj ninan ushaihuanmi, shinlli runacunatapash tucuchirca.
Dios shayarijpica, pipash napacha causai ushanllu.
23Diosca, na manllashpa causaita charichunmi cun.
Paica, paicuna imashna purijtapash ricujunmi.
24Ashatalla alicachi tucushpami chinganajun.
Tucuicunashnallatami, paicunaca huañunga.
Paicunaca, trigota cuchujpishnami huañunga.
25Na chashna cana cajpica, ¿pita ñucataca llullajunguimi nihuangayari?
Na cashpaca ¿pita ñuca rimashcataca, yangatami nijungui, nihuangayari?” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
