1Maijan runapash, shuj huarmihuan cazarashpa, chai huarmi na ali cashcata yachashpaca, jichushpa saquina shuj quilcata cushpaca, huasimanda llujchishpa cachangallami.
2Chai huasimanda llujshishpa rishpaca, chai huarmica, shuj runahuan cazarai ushangallami.
3Shinallata, jipa cusapash na ricunayachishpa, jichushpa saquina shuj quilcata cushpa, huasimanda llujchishpa cachajpi, na cashpaca, jipaman cazarashca cusa huañujpica,
4paipaj punda cusaca, chai huarmita na ricunayachishpa cachashca cashcamandami, paipaj huarmi cachun cutin japitaca na ushanga. Chashna ruranaca, Mandaj Diospaj ñaupajpica millanayaipachami. Canda Mandaj Taita Dios carashca llactataca, chai na alicunata rurashpaca na mapayachinachu canguichi.
5Maijan runapash, chairalla cazarashca cashpaca, jatun macanajuiman llujshitaca na ushangachu. Maipi imata rurangapapash na yaicungachu. Paipaj huarmi cachun cazarashca huarmihuan cushijushpa causangapami, huata tucungacaman na maimambash llujshinga.
6Imata mañachishpapash, cutana rumicunataca na prenda japinachu cangui. Chaicunata apajpica, chai runaguca imapipash na cutai ushashpami, micuna illaj canga.
7Maijan cashpapash, Israelpura paipaj huauquitallata, paipajta rurachun, na cashpaca, shujcunaman jatungapa shuhuashca cashpaca, huañuchi tucunapachami. Chashna rurashpami, cangunapuramanda chai na alitaca anchuchinguichi.
8Huañuchij lepra ungüi tiyajpica, sacerdote levitacuna imashna tucuita yachachishcashna, na cungashpa pactachinguichi. Ñuca mandashcacunataca, tucuitami pactachina canguichi.
9Egiptomanda llujshishca jipa, ñanda shamunajujpi, canda Mandaj Taita Dios, Mariata imashna llaquichishcataca yarinami canguichi.
10Cambaj cumba runaguman imata mañachishpapash, na paipaj huasiman yaicushpa, chai mañachishcamanda imatapash apanachu canguichi.
11Canga, canllapi shuyanguilla. Chai mañaj runallatami imata cuna cashpapash apamunga.
12Chai runa imagutapash na charij cajpica, pai imata cushcataca, chai punllallatami tigrachigrina cangui.
13Imata cushca cajpipash, indi huashajunhuanmi, na cungashpa tigrachina cangui. Shina tigrachijpimi, candaca bendiciashpa, paica cushijushpa puñunga. Shinami, canda Mandaj Taita Diospaj ñaupajpica, alita rurashca ricuringui.
14Culquigumanda imagutapash rurashpa purij, huajcha runagutaca, cangunapura cajpipash, shuj llactamanda shamushca cajpipash, na llaquichishpa charinachu canguichi.
15Imata rurachishpapash, indi nara huashajujpillatami culquita cuna cangui. Paica chai culquihuanmi micushpa causangapa randinga. Na cashpaca, Mandaj Diosta caparishpa mañajpimi, canga juchata rurashca ricuringui.
16Taitacunaca, huahuacuna juchata rurashcamandaca na huañungachu. Huahuacunapash, taitacuna juchata rurashcamandaca na huañungachu. Maijambash juchata rurashpaca, paillatami chai juchamandaca huañunga.
17Shuj llactamanda shamushca runatapash, taita mama illaj runatapash, napacha llaquichinachu cangui. Sapalla mamagupaj churajunatapash, mañashcamandaca na japinachu cangui.
18Ashtahuangarin Egiptopica, cambash shujcunapajta rurashpa causashcatami yarina canguichi. Chai llactamandami, canda Mandaj Taita Diosca llujchimurca. Shinamandami, caicunataca pactachinajuchun mandajuni.
19Pambapi cozechashpa, shuj marcai trigota pambapi cungashpa saquishpaca, na cutin tigrashpa apagrinachu cangui. Chaitaca, shuj llactamanda shamushca runaman, taita mama illaj runaman, sapalla mamaguman saquinguilla. Cambaj maquihuan tucui imatalla rurashcatapash, canda Mandaj Taita Dios bendiciachunmi chashna rurana cangui.
20Olivota pallajushpaca, malquicunapi saquirishcataca na tigrashpa pallajunachu cangui. Chai puchushcacunataca, shuj llactamanda shamushcacuna, taita mama illajcuna, sapalla mamacunami pallajunga.
21Cambaj uvacunata pallashpapash, saquirishcataca na tigrashpa pallajunachu canguichi. Chai puchushcacunataca, shuj llactamanda shamushcacuna, taita mama illajcuna, sapalla mamacunami pallajunga.
22Egiptopica, cambash shujcunapajta rurashpa causashcatami yarina cangui. Shinamandami, caicunata pactachinajuchun mandajuni.
Who We AreWhat We EelieveWhat We Do
2025 by iamachristian.org,Inc All rights reserved.