ROMANOS 11 - Quichua Imbabura 2016

Israelcunaca huaquinllami puchushca

1Caitami tapuni: ¿Taita Diosca, pai agllashcacunataca jichushcachu? Napacha shinachu. Ñucapash, Israel runallatami cani. Abrahambaj mirai, Benjamín ayllupurami cani.

2Taita Diosca, pundamandapacha Pai rijsishpa agllashcacunataca, napacha jichushcachu. Eliasmanda Dios quilcachishca Shimipi nijujtaca, ¿nachu yachanguichi? Paica, Israelcunata fiñashpami, Taita Diosta mañashpa cashna nijushca:

3“Jatun Dioslla, Cambaj profetacunataca huañuchishcami. Cambajlla altarcunatapash urmachishpami tucuchishca. Ñucalla saquirishca cajpimi, ñucatapash huañuchingapa munanajun” nijushcami.

4Ashtahuangarin Dios tigrachishpaca, cashnami nin: “Baal shuti diospaj ñaupajpi na cungurishca, canchis huaranga runacunatami, Ñucapajlla cachun huacaichircani” nijunmi.

5Shinallatami cunanbipash, Diosca ninanda juyashpa huaquingunatalla agllashpa huacaichishca.

6Juyaimanda cashpaca, na imatapash alita rurashcamandalla canllu. Na chashna cashpaca, Diospaj ninan juyaica, na yangamanda juyaichu canman. Alicunata rurashcamandalla cashpaca, na Diospaj ninan juyaichu canman. Shina cashpaca, alicunata rurashcapash na rurashcashna yangami canman.

7¿Cunanga ima nishunda? Israelcunaca, mascanajushcataca na japi ushashcachu. Ashtahuangarin, Dios agllashcacunaca japi ushashcami. Chaishujcunaca, shinlli shungucunami tucushca.

8Quilcashcapica cashnami nijun: “Taita Diosmi, paicunamanga muspayachij yuyaita curca. Ñavita charishpapash ama ricunajuchun, rinrita charishpapash ama uyanajuchunmi, cunan punllacaman chashnata saquirca” nijunmi.

9Davidpash cashnami nijun:

“Paicuna jatun micuita ruranajushcapash,

tugllapi huashajujshna, huascapi huatarijshna tucushpaca alichari canman.

Chaipi nitijashpa, ninanda llaquichi tucushpaca alichari canman.

10Paicunapaj ñavipash ama ricuchun, ñausa tigrashca cashpa ali canman.

Paicunapaj huashacunapash,

causaita causaicaman curcuyashpa saquirishpami ali canman” nijunmi.

Na Israelcunapash quishpiringami

11Caitapashmi tapuni: Israelcuna urmangapaca, ¿nitijanshnachu pandarishcanga? Napacha shinachu. Ashtahuangarin, paicuna na cazujpimi, na Israelcunatara quishpichijun. Israelcuna chaita ricushpa fiñarichunmi chaitaca rurarca.

12Israelcuna na cazushpa pandarishcamandami, tucui cai pachapi causaj, na Israelcunapajpash bendición chayamushca. Ashtahuangarin, Israelcuna Diosman tigrarijpica, ¿nachu tucuicunapaj ashtahuan bendición tiyanga?

13Na Israelcuna, cangunamanmi villajuni. Na Israelcunaman villaj apóstol cashpami, Diospajta rurajushcataca ninanda alicachijuni.

14Ñuca ayllupuracuna, cangunata ricushpa fiñarishpaca, imashnallapash cutin yarishpa, huaquinllapash quishpiringapashchari yashpami cashna villajuni.

15Israelcunata jichujpimi, cai pachapi causajcunara Dioshuan ali tucushca. Israelcunata cutin chasquijpica, huañushcacuna causarishcashnami canga.

16Punda rurashca tandapash Diospajlla cajpica, puchushca tucuilla masapash Paipajllami. Shinallata, sapipash Diospajlla cajpica, malquicunapash Paipajllatami.

17Ali olivo quirumanda malquicunata cuchushcapi, sachapi viñashca olivo quirupaj malquita llutashcashnami canguichi. Shina cashpami, ali olivo quirupaj yacu viñachijpi, chai ali quirupaj sapimandalla causanguichi.

18Shina cashpami, anchuchi tucushca chai malquicunataca napacha jariyana cangui. Can jariyajushpaca, malquilla cashcatami yarina cangui. Canga na sapita charijunguichu, sapimi candaca charijun.

19“Chai malquicunataca, ñucata churangapami cuchushpa anchuchishca cashca” ninguichari.

20Ari. Na crishcamandami cuchui tucushca. Canga crishpallami, chai cuchushcapi llutai tucushcangui. Shina cashpami na jariyashpa, aliguta yarishpa causana cangui.

21Taita Diosca, chai quirupipacha viñashca malquicunatapash na perdonashpaca, candacarin napacha perdonangachu.

22Ricui, Taita Diosca ninanda juyajmi, shinallata, ninanda llaquichijpashmi. Pandashpa urmajcunatami Paica ninanda llaquichinga. Ashtahuangarin canda juyajushcata yarishpa causajujpica juyajungallami. Na shina causashpaca, cambash anchuchi tucunguimi.

23Paicuna, cutin tigrashpa crijpica, chai quirupillata cutinmi churanga. Taita Diosca, paicunata cutin churangapa ushaita charinmi.

24Canga, maipipash viñashca sacha olivo quirupaj malquimi cangui. Shina cajpipash candarami, chai ali olivo quirupi churarca. Paicunataca, chai ali quirumandapacha malquicuna cashcamandacarin ¿imashpata na cutin churai ushangayari?

Israelcunaca cutinmi Diospajman tigraringa

25Juyashca huauquicuna, pipash nara yachashcata yachachunmi munani. Chai yachashcahuan ama cangunallata jariyanajuchunmi munani. Huaquin Israelcunaca, shinlli shungucunami tucushca. Paicunaca, na Israelcunata Dios agllajpi crishpa yaicungacamanmi chashna causanajun.

26Chai jipami, tucuilla Israelcunapash quishpiringa. Quilcashcapica cashnami nijun:

“Sion pueblomandami Quishpichijca shamunga.

Paica, Jacobpaj miraicuna Diosta na cazushpa causanajushcatami anchuchinga.

27Paicunahuan pactachingapa ari nishcataca,

paicunapaj juchacunata anchuchishpami pactachisha” nijunmi.

28Quishpirinata villanamanda ricushpaca, canguna chaita crishcamandami, fiñashpa purinajun. Shina cajpipash, paicunapaj ñaupa taitacunata agllashca cashcamandami, paicunaca juyai tucushca causanajun.

29Taita Diosca, imaguta carashpapash na quichungachu. Shinallata, pita cayashpapash na cungangachu.

30Cangunapash pundaca, Taita Diostaca na cazushpami causarcanguichi. Shina cashpapash cunanga, Israelcuna na cazujpimi Diospaj juyaigutaca, cangunapash tarishcanguichi.

31Shinami cunanga, paicunapash na cazunajun. Dios cangunata juyashcamandaca, paicunapash Diospaj juyaita cutin tarichunmi, chashnaca tucushca.

32Taita Diosllatami, tucuicunatallata juyashcata ricuchingapaca, tucuicuna na cazuchun saquirca.

33¡Taita Diosca, tucui imatapash alipacha yachajmi! ¡Pai imata yarijujtapash pipash na yachai ushanllu! ¡Imashpa Pai chashna rurajujtapash, pipash na yachai ushanllu!

34Pai imata yarijujtaca, ¿pita yachai usharca? Na cashpaca, ¿pita Paiman ali yuyaita cuj tiyarca?

35¿Pita “cutin tigrachihuachun” nishpa, Paimanra punda cararca?

36Ima tiyashcapash Paipajmi, Paimandami tiyan, Paipajllatami. Shina cashcamandaca Paitaca, causaita causaicaman ninanda alicachishunchi. Chashna cachun.