1 TIMOTEO 1 - Quichua Imbabura 2016

“Alillachu capangui” nishcami

1Ñucanchita Quishpichij Taita Dios mandajpi, Apunchi Jesucristo agllashca apóstol Pablomi cani. Jesucristotami, ñucanchica shuyanajunchi.

2Timoteoca, Jesusta crishcamandaca, ñuca huahuashnapachami. Shinamandami, ñucanchi Taita Diospash, ñucanchi Apunchi Cristo Jesuspash, ninan juyaita, ninanda llaquinata, ali causaiguta canman carashca cachun nijuni.

Llullashpa yachachijcunataca, na uyanachu nishcami

3Macedonia llactaman ñuca rijushpaca, pandata yachachijcunataca, na chashna yachachinachu canguichi nishpa jarcachunmi, can Timoteotaca, Éfeso pueblopillata saquiripai nircani.

4Yanga rimaicunata, ñaupa taitacunapaj na tucurinalla rimaicunataca, uyangapallapash na munanachu canguichi nishpami canman mingarcani. Chai rimaicunaca, Taita Diosta crishpa ashtahuan shinlli catingapa randica, fiñanajuimanmi apan.

5Shina cajpimi, na mapa shunguhuan aliguta yarishpa, na nij tucushpalla aligutapacha crishpa, juyarinajuchun mandani.

6Huaquingunaca chashna causanata saquishpami, yanga rimaicunatara parlashpa causangapa tigrashca.

7Paicunaca, mandashca shimicunata alipacha yachachijcuna cangapami munanajun. Shina cashpapash, chashnapachami nishpa yachachinajushpapash, paicunallata na yachai ushashpami causanajun.

8Ashtahuangarin, mandashca shimicunapi ima nijushcatapash aliguta pactachishpaca, alipacha cajtami yachanchi.

9Mandashca shimicunataca, alitalla rurajcunamanga na cushcachu. Ashtahuangarin, na alita rurajcunaman, cazungapa na munajcunaman, na alicunaman, juchata rurajcunaman, Diostapash na manllashpa, na crishpa causajcunaman, taitata, mamata cashpapash huañuchijcunaman, pitapash huañuchijcunamanmi cazuchun cushca.

10Huainayajcunaman, jaripurallata huainayajcunaman, genteta shuhuashpa jatujcunaman, llullajcunaman, yangata juramentujcunaman, Diosmanda alita yachachishcatapash na cazujcunamanmi, mandashca shimicunataca cushca.

11Ninanda alicachi tucushca, ninan ushaita charij Taita Dios quishpichina cashcamanda villajuj shimicunami, chashna yachachijun. Chaitami ñucaman mingahuarca.

Diospajta Pablo rurajushcamanda

12Ñucanchi Apunchi Cristo Jesustaca, Paita ali catichun shinllichishcamandami “pashi” nijuni. Paita ali cazuj cajpimi, Paipajta rurashpa causachun churahuarca.

13Pundaca Jesusta, ninanda na alicachishpa rimashpami, catiriyashpa llaquichishpa, na ali shimicunata rimashpa causarcani. Ashtahuangarin nara crishpa, na yachaimanda chashna rurajushca cajpipash, Diosca llaquishpami chasquihuashca.

14Shina cajpipash, ñucanchi Apunchi Jesusmi ninandapacha juyahuarca. Cristo Jesusta crishpa, juyashpa causachumbashmi ushaita carahuarca.

15Cai shimicunataca napacha llulla cajpimi chasquinapacha canchi: Juchayu gentecunata quishpichingapami, Cristo Jesusca cai pachaman shamurca. Chai gentecunamandaca, ñucami ashtahuan yali juchayu cani.

16Chashna cajpipash, Jesucristoca, na ñapash fiñarij cashpa, llaquij cashcata ñucapi ricuchingapami punda chasquihuarca. Shinallata, ñuca causaita ricushpa, jipalla crijcunapash causaita causagrinata charichunmi, chashna chasquihuarca.

17Causaita causaicaman Jatun Mandaj, huañuitapash na huañuj, pipaj ñavipipash na ricurij, tucuita yachaj, shujlla Taita Diosmi causajun. Paitaca, causaita causaicamanmi “ninan ushaitamari charingui” nishpa, ninanda alicachina canchi. Chashna cachun.

18Timoteo, canga ñuca churishnapachami cangui. Shina cajpimi, “ali macanajuj runashna, Diospajta rurangui” nishpa mingani. Dios yarichijpimi, shuj huauquicunaca ña pundata chashna villanajurca.

19Aliguta crishpa, ali yuyaihuan causashpa catingui. Huaquingunaca crishcatapash saquishpami, yacupi huashajujshna chingashca.

20Himeneopash, Alejandropashmi chashna tucushca. Paicunataca, Jesusta ama ninanda na alicachishpa rimashpa purichunmi, Satanasman cushpa saquircani.