1Rimaj uyarishpami cashna nihuarca: “Huañuna aichayuj runa, jatarishpa shayari. Canhuanmi parlangapa munani” nihuarcami.
2Shina nishca jipa, Diospaj Espíritu ñuca shunguman shamujpi shayarishpami, imatalla rimajta uyarcani.
3Chaipimi cashna nihuarca: “Huañuna aichayuj runa. Ñucami candaca, Israelcunapajman cachani. Paicunaca, ñucata na cazushpami jariyanajurca. Paicunapash, paicunapaj taitacunapash, cunan punllacunacamanmi na cazushpa causanajun.
4Ñucami, candaca, millai, shinlli shungu runacunapajman cachajuni. ‘Mandaj Jatun Diosca, cashnami nijun’ nishpa, paicunaman villangui.
5Paicunaca na cazuj mirai gentecunami, candaca napash uyangapa munangachu. Paicunapurapi profeta tiyashcataca, paicunapaj tucui causaipimi yachanga.
6Canga, paicunataca na manllanachu cangui. Paicuna rimajpipash, ama manllanguichu. Zarza casha chaupipi cashpapash, alacrangunapaj chaupipi causajushpapash, ama manllanguichu. Paicuna rimajpipash, paicunapaj ñaupajpi cashpapash na manllanachu cangui. Paicunaca napacha cazujcunami.
7Paicuna uyachun, ama uyachumbash, Ñuca shimicunataca villajunguilla. Paicunaca, napacha cazujcunami.
8Huañuna aichayuj runa, ashtahuangarin canga Ñuca ima nishcatami uyana cangui. Cambash, chai na cazujcunashnaca na canachu cangui. Ñuca imata carashcatapash, micunguilla” nihuarcami.
9Shina nishca jipaca, ñuca ñaupajman maquita ñapash chutamuntami ricurcani. Chai maquipica, carapi quilcashpa pillushcatami charijurca.
10Chai carataca, ñuca ñaupajpimi pascarca. Chaipica ñaupajmambash, huashamambash quilcashcami carca. Chaipica, llaquirishpa huacana shimicunata, llaquihuan cashpa candanacunata, shungumandapacha llaquirishpa rimana shimicunatami quilcashca carca.
Who We AreWhat We EelieveWhat We Do
2025 by iamachristian.org,Inc All rights reserved.
