1Ñucata Mandaj Taita Dioslla,
Candallami yariashpa causajuni.
Ñucata catiriyashpa llaquichijcunamanda quishpichishpa cacharichihuayari.
2Leongunashna, ñuca aichata asha asha fitishpa tucuchinajuchunga ama saquihuaichu.
Pipash na yanapaj tiyajpira ñutushpa tucuchihuanman.
3Ñucata Mandaj Taita Dioslla,
¿ima pandatata rurapashcani?
¿Ñuca maquihuanga, ima na alitapash rurapashcanichu?
4¿Alitalla rurajcunataca, pitallapash llaquichishcanichu?
(Ashtahuangarin, ñucata yangamanda fiñajcunatapash, llaquishpami cacharichircani).
5Ñuca na ali cajpica, ñucata fiñajcuna japishpa llaquichihuachun.
Ñuca causaitaca, alpapi sarujshna tucuchihuachun.
Ñucata ninanda alicachishcapash, ñutu alpashna chingachun. Selah
6Ñucata Mandaj Dioslla,
Can ninanda fiñarishpa shayaripailla.
Ñucata ninanda fiñashpa llaquichijcunapaj ñaupajpi, shayaripailla.
Can llaquichinapacha cashcapash, ama ñucapica tacarishca cachun.
7Gentecunaca tandanajushpami, Cambaj muyundipi shayaringa.
Paicunataca, jahua pachamandami mandajungui.
8Mandaj Diosmi, gentecuna imatalla rurashcataca tapuchishpa llaquichinga.
Mandaj Dioslla,
ñucamambash, Can alitalla ruraj cashcashnallata, imata cuna cashcata cuhuailla.
Ñuca ima alita rurashcata ricushpa cuhuailla.
9Na alita ruraj runacunaca, paicuna na alita rurashcamanda tucurishca cachun.
Ashtahuangarin, alitalla rurajtaca, Cambaj maquipi charipayari.
Alitalla ruraj Taita Diosmi, gentecunapaj shungutapash, yuyaitapash imashna cajta yachan.
10Taita Diosca, ñuca jarcarina escudoshnami.
Ali yuyaita charijcunataca, Paimi quishpichin.
11Taita Diosca, alitalla ruraj Juezmi.
Taita Diosca, Paita na cazuj runataca, tucui punllami fiñashpa ricujun.
12Juchata rurashpa na llaquirijpica, Diospaj espadaca shuyajunmi.
Arcotapash, alichishcallami ña charijun.
13Shinallata, imahuan huañuchinatapash, ñami alichishcalla charijun.
Flechacunatapash, ninata japichishcallami shuyajun.
14Diosta na manllaj runaca, jatun na alita rurashpami causajun.
Paica tucui causaipimi na alitalla rurangapa yarijun.
Paimandaca, llullashpa causanaca yuyaillami llujshijun.
15Yacuta llujchingapa jatun utujuta allashcatashnami mirachishca.
Chai allashca utujupillatami urmanga.
16Paicuna na alita rurashcacunaca, paicunapaj uma jahuapillatami urmanga.
Paicuna llaquichinata yarinajushcapash, paicunapaj umapillatami urmanga.
17Mandaj Diostaca, alitalla ruraj cashcamandami ninanda alicachisha.
Jahua pachapi causajuj Mandaj Diospaj shutitami jatunyachisha.
Who We AreWhat We EelieveWhat We Do
2025 by iamachristian.org,Inc All rights reserved.
