ISAÍAS 31 - Quichua Imbabura 2016

Egiptopi causajcunaca, runacunalla cashcamanda

1Egiptopi causajcunata, yanapahuai ningapa urai rij gentecunaca, ¡aij imachari tucunga!

Paicunapaj caballocunapi, carretacunapi, caballopi tiyarishpa macanajuj runacuna yanapanga yashpami shuyanajun.

Ashtahuangarin, Israelcunapaj jucha illaj Diostaca, na yarinajunllu.

Mandaj Diostaca, na mascanajunllu.

2Mandaj Diosca tucuitami ali yachan.

Paica na cungashpami llaquichinga.

Na alita rurajcunatapash, chaicunata yanapajcunatapash, fiñashpami llaquichingapa shuyajun.

3Egiptopi causajcunaca, runacunallami.

Paicunapaj caballocunapash, na espirituchu.

Mandaj Dios fiñarishpa llaquichijpica, yanapajcunapash, yanapachun mañajcunapash, tucuillami tucuringa.

4Mandaj Diosmi, cashna nihuarca: “Leonga llamata, apashpa paipaj huahuacunahuan micujushpaca,

tauca michijcuna, tandanajushpa caparishpa manllachijpipash na manllarinllu.

Chashnallatami Mandaj Diospash, Paipaj Sion lomapi macanajungapa urai shamunga.

5Mandaj Diosca, alasyu animalcuna jahuamanda ricuriajshnami,

Jerusalenbi causajcunataca, llaquimanda llujchishpa, huacaichishpa quishpichinga.

6Israelcuna, cangunata Jatun Mandaj Diostami na cazurcanguichi.

Cunanga, chai Diospajmanmi tigrarina canguichi.

7Cangunapaj jucha maquihuanmi,

curita, culquita, cangunapaj dioscuna cachun rurarcanguichi.

Chaicunataca tucuillami, cangunapaj maquihuan shitangapa rina canguichi.

8Chai punllapimi, Asiria llactapi causajcunaca huañunga.

Paicunataca, runacunapaj espadahuanga, na huañuchingachu. Espadahuanga, na tucuchi tucungachu.

Chai llaqui punllacunamanda quishpiringapami, pacajushpa calpanajunga.

Chairalla viñaicunaca, shujcunapaj gañanmi causanga.

9Paicunapaj ushai tucurijpimi, ninan manllaihuan causanajunga.

Mandajcunapash ninanda manllarishpami, banderacunata saquishpa calpanajunga” ninmi Mandaj Diosca.

Paica, Sion lomapimi ninata japichishca charijun.

Jerusalenbimi, hornota rupajyachishpa shuyajun.