1Quimsa huatatami Siria llacta gentecunahuan, Israelcunahuanga na macanajushpa causanajurca.
2Ña quimsa huata cajpimi, Judá llactata jatun mandaj Josafat runaca, Israel llactata jatun mandajta ricungapa rirca.
3Chaipimi, Israel llactata jatun mandaj runaca, paipajta ruraj runacunataca cashna nirca:
“Galaad llactapi tiyaj Ramot shuti pueblo ñucanchipaj cajtaca, ¿nachu yachanguichi? Siria llactata jatun mandajpaj maquimanda japingapaca, imatallapash na rurashcachu canchi” nircami.
4Shinallata Josafat runatapash, cashnami nijurca:
“¿Galaad llactapi tiyaj Ramot shuti pueblopi causajcunahuan macanajungapaca nachu ñucahuan risha ningui?” nircami.
Shina nijpimi Josafat runaca, Israel llactata jatun mandajtaca, cashna nirca:
“Ñucapash, cambash shujllami canchi. Ñuca gentecunapash, cambaj gentecunami, ñuca caballocunapash, cambaj caballocunami” nircami.
5Shina nishca jipapash Josafat runaca, Israel llactata jatun mandajtaca:
“Cunanga, Mandaj Dios ima nijta yachangapa tapupai” nircami.
6Shina nijpimi Israel llactata jatun mandajca, chuscu patsaj profetacunata tandachirca. Paicunataca, cashna nishpami tapurca:
“¿Galaad llactapi tiyaj Ramot shuti pueblopi causajcunahuan macanajungapa rinallachu cani, na cashpaca saquinallachu cani?” nirca.
Shina nijpimi:
“Vichai rilla. Mandaj Diosmi paicunataca cambaj maquipi churanga” nirca.
7Shina nijpimi Josafat runaca, cashna nirca:
“Imata cashpapash tapungapaca, ¿Nachu Mandaj Diospaj profeta tiyanga?” nircami.
8Shina nijpimi Israel llactata jatun mandaj runaca, Josafat runata cashna nirca:
“Mandaj Dios ima nijta tapungapaca, Imla shuti runapaj churi Micaias runami tiyan. Paica, ima alitapash na villashpa, llaqui apanatalla villajpimi, paitaca ninanda na ricunayan” nircami.
Shina nijpimi, Josafat runaca:
“Jatun mandajlla, ama chashna rimaichu” nirca.
9Shina nijpimi Israel llactata jatun mandaj runaca, paipajta ruraj runata cayashpa:
“Imla shuti runapaj churi Micaías runata, ucha pushamugri” nirca.
10Israel llactata jatun mandajpash, Judá llactata jatun mandaj Josafatpash, jatun mandajcuna churajunata churajushcami, Samaria puebloman yaicuna pungu plazapi, mandangapa tiyarinapi tiyanajurca. Chaipimi profetacunaca, ima tucunatapash villanajurca.
11Quenaana shuti runapaj churi Sedequías shuti runami, shuj jirru cachucunata rurashca carca. Paica chaita ricuchishpami, cashna nijurca: “Mandaj Diosca: ‘Siria llacta gentecunataca, cai cachucunahuan tupajshnami, tucuchingui’ ninmi” nijurca.
12Caishuj profetacunapash chashnallatami ninajurca: “Galaad llactapi tiyaj Ramot shuti pueblopi causajcunahuan macanajungapa vichai richilla. Mandaj Diosmi, jatun mandajpaj maquipi churanga” ninajurcami.
13Micaías runata cayangapa rishca runaca, cashnami nirca:
“Uyai, tucuilla profetacunami jatun mandajmanga alitalla villanajun. Cambash paicunashnalla, macanajuipi mishanata villagripai” nircami.
14Shina nijpimi Micaías runaca, cashna nirca:
“Mandaj Diosca ricujunmi. Ñucaman Mandaj Dios imata nishcatallami villasha” nirca.
15Jatun mandajpajman Micaías shamujpimi, cashna nirca:
“¿Galaad llactapi tiyajuj Ramot shuti pueblopi causajcunahuan macanajungapa rishallachu, na cashpaca shuyashallachu imata?” nirca.
Shina nijpimi Micaías runaca, cashna nishpa nirca:
“Vichai rilla, mishanguimi. Mandaj Diosmi paicunataca, can jatun mandajpaj maquipi churanga” nirca.
16Shina nijpimi, Jatun mandajca:
“¿Mashnacamanda candaca, Mandaj Dios ima nishcatapacha villahuai nijunalla cani?” nircami.
17Shina nijpimi cashna nirca:
“Ñucami, Israelcunataca michij illaj llamacunashna, lomacunapi caita chaita purinajujta ricurcani. Chaimandami Mandaj Diosca, cashna nihuarca: ‘Paicunaca mandaj illajcunami, shina cashcamanda, paicunapaj huasicunaman na macanajushpa tigranallami’ nihuarcami” nirca.
18Shina nijpimi, Israel llactata jatun mandajca, Josafat runata cashna nirca:
“¿Nachu cai runataca chashnami canga nircani? ‘Paica, ima alitapash na villashpami, llaquicunatalla villanga’ nircanimi” nirca.
19Shina nijpimi Micaías runaca, cashna nirca:
“Cunanga Mandaj Dios ima nishcata uyai: Mandaj Diostaca, Pai tiyarinapi tiyajujtami ricurcani. Shinallata jahua pachapica, Paipaj alimambash, lluquimambash angelcunaca shayanajujtami ricurcani.
20Chaipimi Mandaj Diosca, cashna nirca: ‘Galaad llactapi tiyajuj Ramot shuti pueblopi, macanajungapa vichai rishpa llaquita apachunga, ¿pita Acab runaman panda yuyaita cugringuichi?’ nircami. Shina nijpimi, shujcunaca shuj yuyaita, caishujcunaca shuj yuyaita cunajurca.
21Shinamandami, Mandaj Diospaj ñaupajman shuj espíritu shamushpaca: ‘Panda yuyaicunataca, ñuca cugrishallami’ nirca. Shina nijpimi, Mandaj Diosca: ‘¿Ima shinata ruragringui?’ nirca.
22Shina nijpimi chai espirituca, cashna nirca: ‘Ñuca rishpaca, paipaj tucui profetacunapaj shimipimi llullachij espíritu casha’ nircami. Shina nijpimi: ‘Canga, chaicunata rurashpa pandachi ushanguimi, cunanga rilla’ nirca.
23Cunanga Mandaj Diosllatami cambaj tucui profetacunapaj shimipi, llullachij espirituta churashca. Mandaj Diosllatami, can llaquichi tucuchunga, ña chashna pactachun mandashca” nircami.
24Shina nijpimi, Quenaana shuti runapaj churi Sedequías runaca, Micaías runapaj ñavipi huactashpa cashna nirca:
“Mandaj Diospaj Espirituca, ¿ñucamandaca anchurishpachu, canmanra villangapa shamurca?” nircami.
25Shina nijpimi Micaías runaca:
“Canga, shuj ucumanda caishuj ucuman pacajushpa calpariyajushpami, chai pactashcataca yachangui” nircami.
26Shina nijpimi Israel llactata jatun mandaj runaca, cashna nirca:
“Cai Micaías runataca, pueblota mandaj Amón runapajman, jatun mandaj ñuca churi Joaspajmambash apaichi.
27Paicunamanga cashna nigrichi: ‘Jatun mandajca: Cai Micaías runataca, prezuna huasipi churashpa, micunatapash, yacutapash, ashatalla carashpa, llaquichishpa, ñuca ali tigramungacaman charinguichi’ ninmi nigrichi” nircami.
28Shina nijpimi Micaías runaca, cashna nirca:
“Ima llaquitapash na apashpa ali tigramushpaca, Mandaj Diosca na ñucaman villashcatami yachangui” nircami.
Shinallata:
“Caitaca, tucui gentecunami uyana canguichi” nirca.
29Israel llactata jatun mandajpash, Judá llactata jatun mandaj Josafatpashmi, Galaad llactapi tiyaj Ramot shuti puebloman vichai rinajurca.
30Israel llactata jatun mandajca, Josafat runataca cashnami nirca:
“Macanajungapaca, na rijsinalla churajunata churajushpami rigrini. Canga, cambaj churajunata churajushpa rilla” nircami.
Israel llactata jatun mandajca, na rijsinalla churajunata churajushpami, macanajungapa rirca.
31Ashtahuangarin Siria llactata jatun mandajca, carretacunapi purishpa macanajuj runacunata mandaj, quimsa chunga ishcai runacunataca, cashna nishpami cachashca carca: “Cangunaca shujcunahuanga na macanajunachu canguichi. Ashtahuangarin Israel llactata jatun mandajhuanllami macanajuna canguichi” nishcami carca.
32Carretacunapi purishpa, macanajujcunaca, Josafat runata ricushpami: “Paica, Israel llactata jatun mandajpachami” yashpa, paihuan macanajungapa shamunajurca. Ashtahuangarin, Jatun Mandaj Josafatca ninandami caparirca.
33Chaita uyashpami, carretapi purishpa macanajuj runacunata mandajcunaca, na Israel llactata jatun mandaj cashcata ricushpa, saquishpa anchurinajurca.
34Ashtahuangarin, shuj runa arcohuan flechata yangata cacharishpami, Israel llactata jatun mandajtaca, macanajungapa churajushca jirru churajuna chaupita yalichishpa chugrichirca. Chaimandami Acab runaca, paipaj carretata purichij runataca:
“Chugrishcami cani. Caimanda tigrashpa, ucha pushahuai” nirca.
35Chai punllapica, ashtahuan macanajuica shinlliyajpimi, jatun mandajpash paipaj carretapi, Siria llacta gentecunahuan macanajushpa chishajushpa huañurca. Paipaj yahuarca, carretamandami urai jicharijurca.
36Ña indi huashajujpimi shuj runaca, carpacunata shayachishca pambapica: “¡Tucuicuna cangunapaj pueblocunaman, cangunapaj llactacunaman tigraichilla!” nishpa caparijurca.
37Jatun mandaj huañushcataca, Samaria puebloman apamushpami pambarca.
38Carretataca, Samaria pueblopi, yacuta alichishpa cuchayachishcapimi maillanajujpimi, yahuartaca, alcucuna lambinajurca. (Chai yacupica, culquimanda huainayaj huarmicunami arman carca). Mandaj Dios villashca pactachunmi chashna tucurca.
39Acab runa ashtahuan imatalla rurashcacunapash, marfil huasita huasichishcapash, pueblocunata rurashcapash, ¿nachu Israel llactata jatun mandajcuna imashna causashcata quilcashca libropi tiyajun?
40Acab runa huañushpa paipaj ñaupa taitacunahuan tandanajungapa rijpica, paipaj churi Ocozías runami, paipaj randi mandajurca.
Josafat mandajushcamanda(2 Crón. 20:31-37)41Israel llactata jatun mandaj Acab runa, chuscu huatata mandajujpimi, Asa shuti runapaj churi Josafat runaca, Judá llactata mandai callarirca.
42Josafat runaca, quimsa chunga picha huatata charishpami, mandai callarirca. Paica, ishcai chunga picha huatatami, Jerusalenbi mandajurca. Paipaj mamaca, Silhi shuti runapaj ushi, Azuba shutimi carca.
43Paipaj taita Asa shuti runashnami, Mandaj Diospaj ñaupajpica aliguta rurashpa, tucuita cazushpa causajurca. Shina cashpapash, lomacunapi tiyaj altarcunataca, na anchuchircachu. Chai altarcunapi animalcunata huañuchishpa, inciensota cushnichishpa catinajujpimi na anchuchirca.
44Israel llactata jatun mandajhuan, Josafat runahuanga na macanajushpami causarca.
45Josafat runa, imatalla rurashcapash, pai ninan shinlli cashcapash, macanajuipi imatallata rurashcapash, ¿nachu Judá llactata jatun mandajcuna imashna causashcata quilcashca libropi tiyajun?
46Paica, paipaj taita Asa shuti runa mandajui punllacunapi saquirishca, jaripurallata huarmihuanshna causaj sodomita runacunatapashmi, chai llactamanda anchuchirca.
47Chai huatacunapica, Edom llactata jatun mandajca illarcami. Jatun mandajpaj randi churashca mandajllami tiyarca.
48Josafat runaca, Ofir shuti llactamanda curita apangapa ringapami, Tarsis llactapi tiyaj barcocunatashna rurarca. Chaicunaca, Ezión-geber shuti pueblopi faquirishpa tucurijpimi na ri usharca.
49Shinamandami Acab runapaj churi Ocozías shuti runaca, Josafat runataca cashna nirca: “Ñucapajta rurajcunahuan, cambajta rurajcunahuanmi barcocunapi cachana canchi” nirca. Chaitaca Josafat runaca na munarcachu.
50Josafat huañushpa, paipaj ñaupa taitacunahuan tandanajugrijpica, paipaj taitacunata pambashca utujupillata, paipaj taita Davidpaj pueblopi pambarca. Paipaj randica, paipaj churi Joram shuti runami mandajurca.
Israel llactata, Ocozías runa mandajushcamanda51Judá llactata Josafat runa, chunga canchis huatata mandajujpimi, Acab runapaj churi Ocozías runaca, Israel llactataca Samaria pueblopi mandajurca. Paica ishcai huatatami, Israel llactataca mandajurca.
52Ocozías runaca, paipaj taita mama na alita rurashcashnami, Mandaj Diospaj ñaupajpica na alita rurarca. Shinallata, Nabat shuti runapaj churi Jeroboam shuti runa, Israelcunata juchata rurachishcashnami, rurachishpa catirca.
53Paica, Baal shuti diospajta rurashpami, ninanda alicachishpa, Israelcunata Mandaj Taita Diostaca ninanda fiñachirca. Paipaj taita, na alita rurashpa causashcashnami chashna rurashpa causajurca.
Who We AreWhat We EelieveWhat We Do
2025 by iamachristian.org,Inc All rights reserved.
