1Damasco pueblota llaquichinatami cashna villashca:
“Damasco puebloca, tucuilla tucuchijpimi tucuringa.
Chaipica, rumi mundunllami tiyajunga.
2Aroer shuti pueblo muyundipi pueblocunaca, jichushcami saquirishca.
Chaipica, animalcunallami pipash na manllachijpi cungashca micunajunga.
3Efraín ayllu llactacunataca, pipash na yanapangachu.
Damasco pueblopica, pipash na mandajungachu.
Siria llactapi causajcuna saquirishcacunataca, Israelcunami mandanajunga” ninmi tucuita Mandaj Diosca.
Israelcunata llaquichinamanda4Chai punllacunaca, Jacobpaj miraicunaca ushai illajmi saquiringa.
Paicunaca tucuillami imapash illaj saquirinajunga.
5Grano fucushcata tandachijpishnami tucuringa.
Trigota maquihuan cuchujpishnami tucuringa.
Refaim shuti pambapi granota tandachishca jipa, pallajujpishnami tucuringa.
6Olivo yurapi fucushcata cuyuchishpa pallajpi,
malqui pundapi ishcailla, quimsalla puchushcashnami saquiringa.
Na cashpaca, ashtahuan ali fucuj malquicunapi chusculla, pichalla puchushcashnami canga.
Tucuita Mandaj Diosmi, chashna nijun.
7Chai punllacunami runacunaca, paicunata Ruraj Diosta mascanajunga.
Paicunapaj ñavihuanmi, Israelcunapaj jucha illaj Diostaca ricunajunga.
8Paicuna rurashca altarcunataca, na yarinajungachu.
Paicuna rurashca Asera shuti huarmi diosman rijchajtapash,
indiman rijchaj dioscunatapash, na ashtahuan yarinajungachu.
9Chai punllapica, jatun pircahuan jarcashca pueblocunapash, cutin viñashca malquipi huaquinlla grano puchushcashnami canga. Paicunaca, Israelcunapaj juchamandami, huaquinlla puchurca. Chaimandami, llaquillapacha saquirishca canga.
10¿Imashpata, cangunata quishpichij Taita Diostaca cungarcanguichi?
Jatun rumishna huacaichij Diostami, na yarircanguichi.
Chaimandami, juyailla yuracunatapash, shuj llactamanda apamushca yuracunatapash tarpushcangui.
11Can tarpushpami, chai yuracunataca viñachingui.
Shina viñashpami, jipamanga fucunga.
Chaicunataca, llaqui punllacunapimi tucuilla pallanga.
12Ashtaca gentecuna tandanajushpami,
mama cucha huacajunshna, ninanda caparinajunga.
Ashtaca jatun yacucuna, ninanda huacashpa shamujshnami,
shuj llactacunamanda runacunaca shamunajunga.
13Gentecunaca, ashtaca jatun yacucuna huacanshnami ninanda caparinajunga.
Shina cajpipash, Taita Dios rimajpimi, caruman pacajungapa rinajunga.
Urcupi viñashca ujshata huaira apajshnami, maitapash cachanga.
Ñutu alpata acapana jatarichijpishnami chinganga.
14Chishajpica, ninan llaquicunahuanmi musparinajunga.
Ashtahuangarin, nara pacarijpillatami, llaquichij gentecunaca tucuringa.
Imatapash quichushpa, shuhuashpa ñucanchita llaquichijcunaca, chashnami tucuringa.
Who We AreWhat We EelieveWhat We Do
2025 by iamachristian.org,Inc All rights reserved.
