1¡Cunanga shinllita caparilla!
¿Pita candaca uyangayari?
¿Maijan angeltata mañagringui?
2Shinlli shungu runataca, fiñarishpa causaimi llaquiman apajun.
Charishpapash, shujcunata yalishpa ashtahuan charingapa munaimi tucuchijun.
3Shinlli shungu runataca, ñapash charij tucujtami ricurcani.
Shina cajpipash, chaicunaca ñapash tucurijtami ricurcani.
4Paipaj huahuacunataca, pipash llaquichijpi causanajuchun.
Puebloman yaicuna pungupi mandajcunapash llaquichinajuchun.
Paicunataca, pipash ama yanapachun.
5Paipaj granocunataca, yarjaihuan causajcunami micunajunga.
Casha chaupicunamanda mascashpami apanajunga.
Yacunayaihuan shamujcunami, can charishcataca tucuchinga.
6Llaquicunata apanaca na yangamanda shamunllu.
Na alicachi tucunapash na yangamanda shamunllu.
7Nina rupajujta, huaira apajpishnami, causan.
Runaca llaquita apangapami huacharin.
8Taita Diostallami, ñucaca mascaiman.
Tucuitami, Paiman mingaiman.
9Paica, pipash na rurai ushanallata rurajmi.
Jatun manllarinacunata Pai rurashcapash, na yupai ushanallami.
10Cai pachapica, tucuimanmi tamiata cachamun.
Shinallata, tarpushca pambamambashmi yacutaca cachamun.
11Na jariyashpa causajcunatami, jatunbi churan.
Llaquilla causajcunataca, ama manllashpa aliguta causachunmi churan.
12Umachinata ali yachajcuna yarinajushcataca, yangapimi churan.
Paicunapaj maquihuan ama imatapash rurachunmi pandachin.
13Jatun yachajcunata, paipaj yachajushcallatami pandachishpa urmachin.
Na alita rurajcunataca, paipaj yuyaillatami ashtahuan pandachin.
14Punllapipash, yana tutapishnami nitijanajun.
Chaupi punllapipash, yana tutapishnami huajtarijta purinajun.
15Huajchacunataca, na ali gentecuna huañuchinamandapash, rimanamandapashmi Diosca quishpichijun.
Llaquichingapa munajcunamandapash chashnallatami quishpichijun.
16Huajchacunaca, Diospillami shuyanajun.
Na alita rurajcunaca, upallami saquirinajun.
17Dios llaquichijpi, llaquita apaj runaca ninandami cushijun.
Ninan ushaita charij Dios llaquichijpica, ama yangapi churanguichu.
18Taita Diosmi chugrichin, Paillatami alichin.
Pai chugrichishcataca, Paillatami jambin.
19Sucta llaquicuna japijpipash, quishpichingami.
Canchis llaquicunaca, na japingachu.
20Yarjaimanda huañunatapash quishpichinmi.
Jatun macanajuipi huañunatapash quishpichinmi.
21Astinshna llaquichij rimaimandapash pacangami.
Tucuchij llaquicuna shamujpipash, na manllanguichu.
22Tucuchij llaqui japijpipash, yarjai japijpipash asinguimi.
Sacha animalcunatapash, na manllanguichu.
23Alpapi sirij rumicunahuambash alimi cangui.
Sachapi causaj animalcunahuambash, aligutami causangui.
24Cambaj huasipipash, ali causai tiyajtami yachangui.
Can causana huasita ricungapa yaicujpipash, tucuimi tiyanga.
25Cambaj huahuacunapash, ashtaca mirajpimi cushijushpa ricungui.
Cambaj miraicunaca, pambapi jihuashnami miranga.
26Candaca rucuyashpa huañujpimi pambanga.
Ali fucushca trigotaca, tandachina punllapi tandachijpishnami, cambash huañungui.
27Tucui caicunaca, chashnapacha cajtami yachashcanchi.
Caitaca, cambaj alipajmi yachajuna cangui” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
