1Chaimandami Job runaca cashna nirca:
2“¿Ima punllacamanda ñucataca llaquichigrihuanguichi?
¿Ima punllacamanda rimashpa llaquichigrihuanguichi?
3Ñucataca, ñamari chungacaman na alicachishpa rimanguichi.
Na alicachishpa ñucata rimangapaca, ¿nachu pinganayan?
4Pandashpa na alita rurashca cajpipash,
ñucapillatami llaquicunaca urmanman.
5Ashtahuangarin cangunaca, jatun tucushpami ñucataca rimanguichi.
Ñucata fiñashpami, na alicachishpa rimahuanguichi.
6Cunanga, Taita Diosllata ñucata llaquichishcata yachanguichimi.
Paipaj linllihuanmi japihuashca.
7Llaquichihuanmi nishpa caparijpipash, napacha uyahuangachu.
Ninanda caparijujpipash, pipash na yanapashpa alita rurahuangachu.
8Ñuca purina ñambica, pircahuan jarcajpimi, na yali ushani.
Ñuca purina ñangunatapash, yana yana tutatami rurarca.
9Tucui ñuca charishcatami quichuhuarca.
Ñuca alicachi tucushcatapashmi quichuhuashca.
10Caimanda, chaimanda llaquichijpimi, ña huañugrijuni.
Ñuca imata shuyajushcataca, yurata cuchunshnami anchuchirca.
11Paica ninanda fiñarishpami llaquichihuarca.
Paita fiñajcunatashnami ricuhuarca.
12Paipaj macanajuj runacuna tandanajushpa shamujshnami, muyundi jarcahuarca.
Ñuca huasi muyundipi, carpacunata shayachishcashnami tiyanajurca.
13Ñuca huauquicunatapashmi, ñucamanda caruyachirca.
Ñuca cumbacunapash, na rijsishca runacunashnami caruyarca.
14Ñuca ayllucunapash, na ricungapa shamurcachu.
Ñucata rijsijcunapash, cungahuarcami.
15Ñuca huasipi causajcunapash, ñucapajta ruraj huarmicunapash,
na rijsishca runatashnami ricuhuarca.
Paicunapaj ñavipica, caru llactamanda shamushca runashnami carcani.
16Ñucapajta ruraj runata cayajpipash, na tigrachihuarcachu.
Ninanda caparijpipash na uyarcachu.
17Na ali ashnajujpimi, ñuca huarmipash millanayachihuarca.
Ñuca huahuacunamanda tapujpimi chashna millanayachihuarca.
18Chairalla viñaicunapash, na ricunayachihuarcachu.
Ñucataca ricushcandimi, fiñashpa rimahuarca.
19Ñuca ali cumbacunapash, tucuillami fiñahuarca.
Ñuca juyashpa ricujcunapashmi llaquichihuarca.
20Ñucaca tullu carallami tucurcani.
Ñuca shimimanda quirucunapashmi urmanajuhuan.
21¡Ñuca cumbacunalla, ñucata llaquihuaichiyari!
Taita Diospaj maquimari, ñucataca llaquichihuashca.
22¿Imashpata Taita Dios llaquichijshnallata catiriyashpa llaquichihuanguichi?
Cangunaca, chashna llaquichinajushpapash, na shaijushpami puringuichi.
23¡Cunanga, ñuca rimashca shimicunata maijambash quilcashpachari, ali canman!
¡Chai shimicunataca, shuj libropi maijambash quilcashpachari ali canman!
24¡Causaita causaipaj tiyachun,
jirru cincelhuan, plomohuan, rumipi quilcashpachari ali canman!
25Ñucata Quishpichij Dios causajujtaca yachanimi.
Paimi, ñucamandaca shayaringa.
26Ñucapash, ismushpa chingashca jipami,
Taita Diostaca ñavi, ñavi ricusha.
27Paitaca, ñucallatami ricujusha.
Ñuca ñavihuambachami ricujusha.
Shungu ucumandapachami, chaita ricunataca munajuni.
28Ashtahuangarin: ‘¿Imashpata, catiriyashpa llaquichinchiyari?’ ninami canguichi.
Imamanda cashpapash, ñucami llaquita apajuni.
29Cangunaca espadapaj ñaupajpica, manllanami canguichiyari.
Na alita rurashcamandami, Diosca espadahuan llaquichijun.
Llaquichina tiyashcata yachachunmi, chashna rurajun” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
