ÉXODO 12 - Quichua Imbabura 2016

Pascua micuita callarichishcamanda

1Mandaj Diosca, Egipto llactapimi, Moisestapash, Aarondapash cashna nijurca:

2“Cai quillami cangunapajca, callari quilla, huatapaj callari quilla canga.

3Tucuilla tandanajushca Israelcunaman cashna nishpa villanguichi: ‘Cai quillapaj chunga punllapica, cangunapaj ayllucuna imashna cashcashnami, shuj maltun llamaguta shicanyachina canguichi. Chai llamaguca, shuj huasi ayllupuracuna micungapami canga.

4Ashtahuangarin maijan huasi ayllupash huaquinlla cashpaca, quimiriajlla causaj ayllucunata cayashpami, chai maltun llamagutaca micuna canguichi. Mashnapa pactanata ricushpami, chai maltun llamagutaca huañuchina canguichi.

5Chaica shuj huatata charij, ima huaglipash illaj jari animalmi canga. Chaitaca llamacunamanda cashpa, chivocunamanda cashpapashmi shicanyachina canguichi.

6Chai llamagutaca, cai callari quilla, chunga chuscu punllacamanmi shicanyachishpa charina canguichi. Chai llamagutaca, tucuilla tandanajushca Israel gentecunami, ña chishi tutayajujpi huañuchina canguichi.

7Chai yahuarmanda ashata japishpami, aichata micushpa tiyanajuna huasi punguta charijuj ishcandi caspipipash, jahua caspipipash javina canguichi.

8Chai tutaca, ninapi cusashca aichatapash, levadura illaj tandatapashmi, jayaj jihuacunahuan micunajunga.

9Chai aichataca, chahuatapash, yacupi timbuchishcatallapash na micunachu canguichi. Llamapaj umatapash, chaquitapash, chunllulitapashmi ninapi cusashpa micuna canguichi.

10Chai aichataca, imatallapash cayandipaca na puchuchinachu canguichi. Cayandipaj puchushca tiyajpica, tucuillatami rupachina canguichi.

11Chai llama cusashcataca: Ali chumbilirishcalla, chaquipipash churajushcalla, tauna caspitapash chaririyajmi ucha micuna canguichi. Mandaj Diosta yarina, Pascua cajpimi chashna micuna canguichi.

12Chai tutallatami Ñucaca, Egipto llactapi causajcunapaj punda churicunatapash, punda huacharishca jari animalcunatapash, tucuillata huañuchishpa Egipto llactataca yalijusha. Shinallata, Egiptopi causajcunapaj rurashcalla dioscunatapash tucuillatapachami tucuchisha. Ñucami Mandaj Dios cani.

13Canguna causanajuj huasi pungu caspicunapi javishca yahuarmi, Israelcunapaj huasi cajta ricuchingapa canga. Chai yahuarta ricushpaca yalishallami. Egipto llactapi causajcunata huañuchishpa llaquichijujpipash, cangunapurapica ima llaquipash na tiyangachu.

14Cai punllapi ima tucushcata yarishpami, causaita causaicaman Mandaj Diosman jatun cushijui punllacunata rurana canguichi. Chai punllacunataca, Ñuca mandashca shimipi nijujshnallata, tucui causaipi pactachinajuchunmi yachachina canguichi.

15Canchis punllacamanmi levadura illaj tandata micuna canguichi. Shina cashpaca callari punllapica, cangunapaj huasicunapica ima levadurapash napacha tiyanachu. Maijan cashpapash levadurahuan tandata, callari punllamandallata canchis punllacaman micushpaca, Israelpuramandaca calpachi tucungami.

16Callari punllapipash, canchis punllapipash, Ñuca shutipimi tandanajuna canguichi. Chai punllacunapica, imatapash na rurashpa, canguna micunatallami yanuna canguichi.

17Levadura illaj tandata micushpa cushijuna punllataca pactachinami canguichi. Chai punllapimi cangunataca, Egipto llactamandaca tucuillata llujchimurcani. Chashna cashcamandami, cai mandashcataca cangunapaj mirai miraicunacaman, tucui causaipi rurashpa ricuchina canguichi.

18Callari quilla, chunga chuscu punlla chishimanda, ishcai chunga shuj punlla chishicamanmi, levadura illaj tandata micuna canguichi.

19Canchis punllacamanmi, cangunapaj huasicunapica ima levadurapash na tiyanga. Shuj llactamanda shamushca cashpapash, chai llactapi huacharishca cashpapash, levadurahuan tandata micushpaca, tandanajushca Israelpuramanda calpachi tucungami.

20Imatallapash levadurahuan chapushcataca na micunachu canguichi. Canguna causanajuj tucui huasicunapimi, levadura illaj tandata micuna canguichi’ nishpa villaichi” nijurcami.

21Shina nijpimi Moisesca, Israelcunata mandaj taitacunata tucuillata cayashpa cashna nijurca: “Tucui ayllupurami, maltun llamata japishpa, Diosman cushpa, pascua punllapica huañuchina canguichi.

22Shinallata, hisopo malquicunata japishpami, bateapi tandachishca yahuarpi mutiyachina canguichi. Chai yahuarhuanmi, pungu jahua caspipipash, punguta charijuj ishcandi caspicunapipash javina canguichi. Shinallata, cangunapaj huasi ucumandaca, punllayangacaman, maijanllapash na llujshinachu canguichi.

23Mandaj Diosca, Egiptopi causajcunata huañuchishpami yalijunga. Pungu jahua caspipipash, punguta charijuj ishcandi caspipipash, yahuarta javishcata ricushpaca, Mandaj Diosca yalingallami. Huañuchishpa purijuj angeltapash, cangunapaj huasicunapi yaicuchunga Mandaj Diosca na saquingachu.

24Cangunapash, cangunapaj miraicunapash ruranajuchunmi, Ñuca mandashca shimicunataca tucui causaipi pactachina canguichi.

25Mandaj Dios cangunaman carasha nishcashna, chai llactata carajpi chaiman chayashpaca, imashna rurachun mandashcataca pactachishpami causana canguichi.

26Cangunapaj huahuacuna: ‘¿Imashpata caitaca chashna ruranguichi?’ nijpica,

27cashna ninguichi: ‘Caica, Mandaj Diosman, pascua punllapi huañuchishca llamagumi. Mandaj Diosca, Egipto llacta gentecunata huañuchijushpapash, Israel gentecunataca na huañuchishpa yalircallami. Shinami, ñucanchi huasi ucupurataca, quishpichirca’ ninguichi” nijurcami.

Shina nijpimi Israelcunaca, cungurishpa Diosta ninanda alicachinajurca.

28Israel gentecunaca, Moisestapash, Aarondapash, Mandaj Dios mandashcataca, tucuitami pactachinajurca.

Punda huacharishcacunata huañuchishcamanda

29Chaupi tutapica cashnami tucurca: Mandaj Diosca tucuilla punda churicunatami, Egipto llactapica huañuchirca. Mandashpa tiyarinapi tiyajun Faraonbaj punda churimanda callarishpa, prezu tiyanajujcunapaj punda churicunacaman, punda huacharishca animalcunacamanmi tucuillata huañuchirca.

30Shina cajpimi Faraonbash, paipajta rurajcunapash, Egiptopi tucuilla causajcunapash manllarishpa jatarinajurca. Tucuilla huasicunapillata huañui tiyajpimi, Egipto llactapica ninanda caparishpa huacanajurca.

31Chai tutami Faraonga, Moisestapash, Aarondapash cayachun cachashpa cashna nirca: “¡Cangunapash, tucui Israelcunapash, cai llactamanda llujshishpa richi! Canguna imashna nishcashna, Mandaj Diosta alicachingapa richi.

32Cangunapaj llamacunatapash, huagracunatapash, canguna imashna nishcashna apashpa richi. Ñucatapash bendiciashpa saquihuanguichi” nircami.

33Egiptopi causajcunaca: “Tucuillamari huañugrinchi” ninajushpami, Israelcunataca chai llactamanda ucha llujchishpa cachanajurca.

34Israelcunaca, levaduratapash nara churashpallatami paicuna masashcataca, fachacunahuan pillushpa aparishpa rinajurca.

35Israelcunaca, Moisés mandashcashnami, Egiptopi causajcunataca, culquimanda rurashca, curimanda rurashca juyaillacunatapash, churajunacunatapash mañashpa apanajurca.

36Mandaj Diosca, Egiptopi causaj gentecunapaj ñaupajpi, Israelcuna ali ricurichun rurajpimi, paicuna mashnata mañashcata cunajurca. Chashnami Israelcunaca, Egiptopi causajcuna charishcacunataca apashpa rinajurca.

Israelcuna, Egiptomanda llujshishcamanda

37Israelcunaca, Ramesés shuti pueblomandaca, Sucot shuti pueblomanmi rirca. Paicunaca chaquilla rinajuj jaricunallami, sucta patsaj huarangashna carca. Huahuacunataca na yupashcachu carca.

38Paicunahuanga, ashtaca gentecunapash, llamacunapash, ashtaca ashtaca shuj animalcunapashmi rinajurca.

39Paicunaca, Egiptomanda ucha llujchishpa cachajpimi, yanushca micunaca illajpi, Egiptomanda paicuna apashca levadura illaj masata, tandata rurashpa micunajurca.

40Israelpaj miraicunaca, Egipto llactapica chuscu patsaj quimsa chunga huatacunatami causashca carca.

41Chuscu patsaj quimsa chunga huatacuna yalijpica, chai punllallatami Mandaj Diospaj Israel gentecunaca, Egipto llactamanda tucuilla llujshinajurca.

42Mandaj Diosca, Israelcunataca cai tutami Egipto llactamandaca llujchirca. Shinamandami, cai tutataca tucuilla Israelcuna, mirai miraicunacaman, Mandaj Diospaj cashcata yarishpa causana canguichi.

43Mandaj Diosca, Moisestapash, Aarondapash cashnami nijurca: “Pascua punllapica, cashna rurachunmi mandashca. Chai micuitaca, shuj llactamanda shamushca cashpaca na micui ushangachu.

44Ashtahuangarin culquipaj randishca tucui gañancunaca, circuncisionda rurashca jipami, chai micunata micui ushanga.

45Shuj llactamanda shamuj runapash, chaipi imata rurashpa causaj shuj llactamanda runapash na micui ushangachu.

46Chai micuna aichataca, maimambash na apashpami chai huasipilla micuna canguichi. Chai llamagupaj tullutapash na faquinachu canguichi.

47Tucui Israelcunami chaitaca rurashpa pactachina canguichi.

48Ashtahuangarin maijambash, shuj llactamanda shamushca cangunahuan causajushpaca, paipash Mandaj Diospaj pascua jatun micuita micungapa munashpaca, circuncisionda rurarinami. Chai jipami, cangunapaj llactapurashnallata cashpa, chaita micuitaca ushanga. Circuncisionda na rurashca cashpaca, maijambash napacha micui ushangachu.

49Chai llactapillata huacharishca runapash, shuj llactamanda shamushpa cangunahuan causajuj runapash, cai mandashcataca pactachinapachami canga” nijurcami.

50Shina cashcamandami tucuilla Israelcunaca, Mandaj Dios imashna Moisesman, Aaronman mandashcashna rurashpa pactachinajurca.

51Chai punllallatami, Mandaj Diosca, tucui Israelcunataca Egipto llactamanda llujchirca.