2 CRÓNICAS 6 - Quichua Imbabura 2016

Diospajlla huasitami, Diosmanllata mingashca(1 Rey. 8:12-66)

1Salomonga, cashnami nirca: “Mandaj Dioslla, Canga yana fuyupimi causasha nircanguimi.

2Shina cajpipash, Can causajuchunga, shuj huasita shayachishpami, causaita causaicaman Can chaipi causachun, shuj ucutapash rurarcani” nircami.

3Jatun mandaj Salomonga tigrarishpa ricushpami, chaipi tandanajushca shayanajuj tucui Israelcunata bendiciarca.

4Paica cashnami nijurca: “Israelcunata Mandaj Taita Diosca, alicachi tucushca cachun. Ñuca taita Davidman imatalla nishcataca, Paipaj maquihuan rurashpami pactachishca. Paica cashnami nishca carca:

5‘Ñuca agllashca Israelcunata, Egipto llactamanda llujchimushca punllamandapacha, tucui Israel ayllucunapaj pueblocunamandaca, maijan pueblotapash, Ñuca causana huasita shayachijuchunga, na agllarcanichu. Ñuca agllashca Israelcunata mandachumbash na pitapash churashcanichu.

6Ashtahuangarin ñuca shuti chaipi causachunmi, Jerusalendaca agllarcani. Ñuca agllashca Israelcunata mandachunga, Davidtami agllarcani’ nishcami carca.

7Chaimandami ñuca taita Davidca, Israelcunata Mandaj Taita Diospaj shutipi mañana huasita rurangapa, paipaj shungupi yarijushca carca.

8Ashtahuangarin Mandaj Diosca, ñuca taita Davidtaca cashnami nishca carca: ‘Ñucata mañana huasita shayachinatami, cambaj shungupi yarijushcangui. Can chaita yarijushpaca, alitami yarijushcangui.

9Shina cashpapash, chai huasitaca na can shayachinguichu. Ashtahuangarin, cambaj churimi, Ñucata mañana huasitaca shayachinga’ nishcami carca.

10Mandaj Diosca, Pai chashna nishcatami pactachishca. Chaimandami, Mandaj Dios imashna nishcashnallata, ñuca taita Davidpaj randi, Israelcunata mandashpa tiyarinapi tiyarircani. Shinallata, Israelcunata Mandaj Taita Diospaj shutipi mañana huasitapashmi shayachircani.

11Chai huasipimi, Diospaj arcata churangapa shuj ucuta rurarcani. Chai ucupica, ñucanchi ñaupa taitacunahuan, Mandaj Dioshuan ari ninajushpa quilcashcata alichishcami tiyajun” nircami.

12Shina nishca jipami Salomonga, Mandaj Diospaj altar ñaupajpi shayarishpa, tandanajushca Israelcuna ricujta, maquicunata vichai churarca.

13Salomonga, pai shayarina shuj pushtutami broncehuan rurachishca carca. Chai pushtuca, largomanbash, anchomambash ishcai metro, ishcai chunga picha centimetromi carca. Shinallata, shuj metro, quimsa chunga picha centímetro jatunmi carca. Chaitaca, chaupi patiopimi rurashca carca. Chai jahuapi shayarishpami, Israelcunapaj ñaupajpi cungurishpa, maquita jahua pachaman vichai chutashpa cashna nijurca:

14“Israelcunata Mandaj Taita Dioslla, can Taita Diosman rijchajca, jahua pachapipash, cai pachapipash na tiyanllu. Canda tucui shunguhuan cazushpa, Cambaj ñaupajpi ali purij, Cambajta rurajcunata llaquishpami, Can imata ari nishcatapash pactachijungui.

15Cambajta ruraj, ñuca taita Davidman cushami nishcataca pactachishcanguimi. Cambaj shimihuan villashcataca, Cambaj ushaihuan rurashpa pactachijtami, cunan punllapi ricunajunchi.

16Israelcunata Mandaj Taita Dioslla. Cunanga, Cambajta ruraj ñuca taita Davidman pactachishami nishcataca pactachipayari. Chaipaca, Canga cashnami nishcangui: ‘Cambaj miraicunamanda, Ñuca ñaupajpi Israel llactata mandangapa tiyarinapi tiyarij runaca na illangachu. Ñuca ñaupajpi can ali purishcashnallata, cambaj churicunapash, Ñuca mandashcata cazushpa, ali purijpillami chashna pactanga’ nishcanguimi.

17Shina cashcamanda Israelcunata Mandaj Taita Dioslla, cunanga, Cambajta ruraj ñuca taita Davidman pactachishami nishcataca pactachipailla.

18Shina cajpipash ¿Taita Diosca, cai pachapi runacunahuan pacta causangallachu imashi? Jahua pachapash, ashtahuan jahuaman jahua pachapash, Can Dios causachunga na pactangachu. Ñuca shayachishca cai huasicarin, ¿maitata pactangayari?

19Shina cajpipash, ñucata Mandaj Taita Dioslla. Cambajta ruraj ñuca caparishpa mañajujtaca uyapailla. Cambajta ruraj ñuca, Cambaj ñaupajpi caparishpa cunan chashna mañajujtaca, uyashpa pactachipailla.

20Cai huasitaca, tutapash, punllapash ricuriajupanguilla. ‘Ñuca shutica, chaipimi causanga’ nishca pushtutaca ricuriajupanguilla. Cambajta ruraj ñuca caipi mañajujtaca uyapanguilla.

21Cambajta ruraj ñucapash, Can agllashca Israelcunapash, Canda mañajujtaca uyapanguilla. Cai huasipi mañanajujtaca, jahua pachamanda uyashpa, ñucanchi juchacunataca anchuchipanguilla.

22Maijan cashpapash, paipaj cumbatallata fiñashpa juchata rurajpica, Cambaj cai huasi ucupi tiyajuj altar ñaupajpimi juramentuchun pushamunga.

23Shina rurajpimi, jahua pachamanda uyashpa, Cambajta rurajcunataca aliguta ricushpa, imata rurana cajpipash rurapangui. Canda na manllajtaca ninanda llaquichishpami, pai na alita rurashcashnallata llaquichingui. Ali cashcatalla rurajtaca, chashna rurashcamandami, alitalla rurashpa causachun chasquipangui.

24Can agllashca Israelcunaca, Canda na cazushpa juchata rurashcamandami, paicunata fiñajcunahuan mishai tucunga. Chashna cashpami, Cambaj ñaupajman tigrarishpa, ninanda llaquirishpa, cai huasipi mañanajunga.

25Chashna mañajpica, jahua pachamanda uyashpami, can agllashca Israelcunapaj juchata cungashpa, paicunapaj ñaupa taitacunaman, Can carashca llactaman tigrachimupangui.

26Canda na cazushpa, paicuna juchata rurashcamanda, jahua pacha vicharishpa na tamiashpa llaquichijpimi paicunaca, Cambaj shutita alicachishpa, Cambajman tigrarishpa, cai huasipi mañanajunga.

27Shina rurajpica, jahua pachamanda uyashpami, Cambajta rurajcunapaj juchatapash, Can agllashca Israelcunapaj juchatapash cungapangui. Canda cazushpa purichumbash, ali ñanda ricuchishpami yachachipangui. Shinallata, Can agllashcacunaman carashca, Cambaj llactapipashmi tamiachipangui.

28Cai llactapica, jatun ungüicuna, lanchacuna, langosta jurucuna, shuj jurucuna tarpushcacunata tucuchijpimi jatun yarjaipash tiyanga. Na cashpaca, paicunata fiñajcuna shamushpa, paicuna causanajuj pueblota, chaupipi churashpami llaquichinga. Imapash shuj llaqui cashpa, ungüi cashpapashmi tiyanga.

29Shina cajpica, maijan runa cashpa, Can agllashca tucui Israelcuna cashpapashmi, Canda mañanajunga. Maijan cashpapash, huañuchij ungüihuan japi tucushcata yachashpami, cai huasiman paicunapaj maquicunata chutashpa ninanda mañanajunga.

30Shina mañajpica, Can causajuj jahua pachamanda uyashpami, paicunapaj juchacunata cungashpa, paicuna imata rurashpa causashcashna tucuicunaman cupangui. Paicunapaj shungutaca, Canllami rijsipangui. Canllami, huañuna aichayuj tucuilla runacunapaj shungutaca rijsipangui.

31Ñucanchi ñaupa taitacunaman Can carashca llactapi causanajui tucui punllacunapi, Canda manllashpa, cazushpa causanajuchunmi chashna rurapangui.

32Shinallata, shuj llactamanda shamushca, na Israelpura cashpapash, Cambaj shutita alicachingapami shamunga. Cambaj jatun shutitapash, ushaitapash, Can imatalla rurashcatapashmi yachanajunga. Chashna yachashpami, cai huasipi Canda mañaj shamunga.

33Chashna mañajpica, Can causajuj jahua pachamanda uyashpami, shuj llactamanda cajpipash, paicuna imata mañashcashna rurashpa pactachipangui. Chashna rurajpimi, tucui cai pachapi causajcunaca, Cambaj shutita rijsishpa, Can agllashca Israelcunashnallata, Canda manllashpa causanga. Shinallata, ñuca shayachishca cai huasipica, Cambaj shutita jatunyachishpa mañana cashcatami yachanajunga.

34Can agllashca Israelcunaca, paicunata fiñajcunahuan macanajungapami, Can maita cachashca ñanda rinajunga. Chashna rinajushpami, Can agllashpa cushca pueblotapash, Cambaj shutipi mañangapa ñuca shayachishca cai huasitapash ricushpa, Can Mandaj Diostaca mañanajunga.

35Tucui shunguhuan chashna ninanda mañajpica, jahua pachamanda uyashpami, imatapash cashcatapacha rurapangui.

36(Jucha illaj runaca, shujllapash na tiyanllu). Canda na cazushpa juchata rurajpimi, paicunahuan ninanda fiñarishpa, caru llactaman cashpapash, caimanlla cashpapash prezu apachun, paicunata fiñajcunapaj maquipi churangui.

37Paicunaca, prezu apai tucushca llactapi cashpami, Cambajman tigrarishpa cashna nishpa mañanajunga: ‘Diosta na cazujcunashnami, Juchata rurashpa, jatun na alita rurashcanchi’ ninajungami.

38Paicunata fiñajcunapaj llactaman prezu apai tucushca cashpami, paicunapaj tucui shunguhuan, tucui almahuan Cambajman tigrarinajunga. Chashna tigrarishpaca, paicunapaj ñaupa taitacunaman Can carashca llactamambash, Can agllashpa cushca pueblopi, ñuca shayachishca cai huasimambash tigrarishpami, Canda mañanajunga.

39Paicuna ninanda mañajpica, Can causajuj jahua pachamanda uyashpami, ali cashcatapacha rurapangui. Shinami, Can agllashca gentecuna juchata rurashcataca perdonapangui.

40Cunanga ñuca Taita Dioslla, caipi Canda ninanda mañanajujtaca, Cambaj ñavihuan ricupailla, Cambaj rinrihuan uyapailla nipanimi.

41Mandaj Taita Dioslla, cunanga Cambash, Cambaj ushaita ricuchijuj arcapash, Can samana pushtupi causangapa ripashunlla.

Mandaj Taita Dioslla, Cambaj sacerdotecunapash, quishpirishcata ricuchij churajunata churajushcami canga.

Cambajlla causajcunaca, Can alita rurashcacunahuanmi cushijunga.

42Mandaj Taita Dioslla, aceiteta talishpa javishca Cambaj jatun mandajtaca, ama jichushpa saquipanguichu.

Cambajta ruraj Davidta llaquijushcataca yaripanguilla” nijurcami.